الوالي فشل في (ولاءالدين) وغارزيتو زعل في (عمار) ولجنة التسيير صدمت في (ابوعاقلة)

ناس المريخ …لاعب دخلوا ليه بالزي الرسمي ولاعب مشوا ليه بي عربيات النظام العام..مع ذلك فشلوا في الحصول على اي لاعب رغب فيه الهلال
خالد النعسان دا قالوا ليك (الشوط التاني) ما بنتظرو (صاحي) …زولكم من بداية الشوط بيكون في سابع نومة
ما يهمنا الآن هو النجاح الكبير الذي حققه الكاردينال في تسجيلات هذا العام مع فوزي المرضي وخالد النقر
الكاردينال سجل (احمد ميسي) من المريخ ..وداخل بفرصتين في (امير كمال) والمحترف الاجنبي (كوفي)
في صحيفة (الصدي) امس : (قال رئيس نادي المريخ المهندس اسامة ونسي انهم سيقومون باعادة قيد اللاعب امير كمال خلال الساعات القادمة مع زميله راجي عبد العاطي فضلا عن الاجنبي كوفي واكد رئيس المريخ انهم ينفذون توصية اللجنة الفنية وفق ما هو متفق عليه ووارد في التقرير انهم لن يتعاقدوا مع اي لاعب اجنبي وفقا للخانات والحاجة الفنية).
امير كمال دا من السنة الماضية بقولوا ليك سوف يعيدوا قيده خلال الساعات القادمة.
انتوا وقت ما عاوزين تتعاقدوا مع اجنبي ..في التسجيلات المحلية كان تشدوا حليكم شوية.
البيسمع الجماعة وهم بتكلموا وبيقولوا انهم لن يسجلوا لاعبا اجنبيا يفتكر الجماعة محليا سجلوا (ولاءالدين) او (ابوعاقلة)…او (عمار الدمازين).
ما عندهم تسجيلات اجنبية وبسجلوا لي في (خالد النعسان).
خالد النعسان دا قالوا ليك (الشوط التاني) ما بنتظرو (صاحي) …زولكم من بداية الشوط بكون في سابع نومة.
اسمو كدا – خالد النعسان.
ناس يسجلوا في ناس (ابوعاقلة) دخلوها وصقيرها حام ..وناس المريخ بسجلوا في خالد النعسان.
لو دي تسجيلاتكم المحلية من هسع احسن شوفوا ليكم لاعب اجنبي قاطع كدا.
الكاردينال السنة دي ما خلى ليه لاعب محلي.
اي موهبة ..وان كانت في المريخ …جابها.
سجل احمد ميسي من المريخ ..وداخل بفرصتين في (امير كمال) والمحترف الاجنبي (كوفي).
السنة دي إلّا خالد النعسان.
خالد النعسان طبعا المنافسة الوحيدة فيه مع ناس المريخ كانت من ناس الخرطوم الوطني.
ما في زول عاوزو.
لكن تعالوا شوفوا تسجيلات الهلال هذه السنة.
ناس المريخ …لاعب دخلوا ليه بالزي الرسمي ولاعب مشوا ليه بعربيات النظام العام..مع ذلك فشلوا في الحصول على اي لاعب رغب فيه الهلال.
الهلال هذا الموسم سجل افضل مهاجم في الساحة (ولاءالدين) وسجل افضل لاعب وسط في البلد (ابوعاقلة) وسجل افضل مدافع في الممتاز (عمار الدمازين).
اخذ الافضل في كل خط – وبعد كدا فتح ليك (البلف) لي ناس المريخ عشان يسجلوا (خالد النعسان).
اذا بدأنا من عمار الدمازين ..لاعب الامل عطبرة فقد كان اللاعب محط انظار وترشيحات كل الخبراء الفنيين.
غرفة الهلال رصدته من وقت مبكر وظلت متابعة لاداء اللاعب الذي يتميز بالطول وصغر السن.
عمار الدمازين هو المدافع الافضل في الممتاز الآن.
اللاعبون القادمون من الامل عطبرة دائما ما يحققوا النجاح في الهلال – ويكفى النجاحات التى حققها نزار حامد مع الهلال.
عمار الدمازين نفس الطول والمهارة وصغر السن.
المريخ حاول الدخول في مفاوضات والظفر باللاعب لكن مشكلة المجلس مع الامل عطبرة سدت عليهم الطريق.
مع ذلك لم يتخل المريخ عن اللاعب وظل يبحث عن منفذ وسبيل للوصول لللاعب.
لكن العلاقة المميزة التى تجمع بين الهلال والامل عطبرة ..اثمرت عن انتقال هذا اللاعب للهلال والذي ينتظر توقيعه في كشوفات الهلال في التسجيلات القادمة.
علاقة الهلال بالامل ليس هي نتاج المواقف الاخيرة – علاقة الهلال بالامل كانت سببا في ان يقدم الامل لاعبه نزار حامد والذي فشل مجلس المريخ بقيادة جمال الوالي في الظفر به.
وقد كان انتقال نزار حامد للهلال سببا في صيام جمال الوالي ثلاثة ايام حسبما اشيع في ذلك الوقت.
عمار الدمازين يكفى على تميزه انه كان قد طالب به المدير الفني للمريخ الفرنسي غارزيتو.
وقد نقلت المواقع عن عضو بالمجلس الاحمر قوله ان عمار الدمازين كان من ضمن ترشيحات غارزيتو الشيء الذي جعله يغضب عندما علم بانضمامه للهلال.
اما اللاعب ابوعاقلة ..وهو نجم المنتخب الاولمبي الذي حجز موقعه وهو في ام بدة في المنتخب الوطني رغم زحمة لاعبي الوسط في المنتخب ، فهو لا غبار عليه ولا خلاف.
مع ابوعاقلة حجز موقعه في تشكيلة المنتخب …وليس هناك شهادة اكبر من ان ابوعاقلة كان قد رشحه للمنتخب الخبير احمد بابكر.
تبقى الدلالة كبيرة وعظيمة في ان يلعب لاعب من الدرجة الاولى في المنتخب الوطني.
ابوعاقلة كان لنا مشاهدته في عدد من المباريات وهو لاعب ذو امكانيات مهولة.
ويمكن القول ان الهلال الآن قد جاء بلاعب وسط سوف ينفعه كثيرا في المباريات الافريقية فهو صاحب مجهود بدني كبير.
ابوعاقلة لاعب حوام …وبتحرك بطريقة سلسلة وجميلة ويتواجد في حالات الدفاع وهو في حالات الهجوم.
المريخ طارد ابوعاقلة كثيرا ..لكنهم فشلوا في الوصول اليه.
مفاوضات المريخ ظلت مع اللاعب حتى وهو ضمن المنتخب الاولمبي خارج البلد.
واستمرت الملاحقات والمفاوضات مع اللاعب وهو في المنتخب الوطني حيث فشل وفد المريخ في خطف اللاعب بعد مباراة المنتخب الوطني الاخيرة امام يوغندا.
وظل وفد المريخ بعرباته النظامية في ملاحقة مستمرة للاعب حتى ان مواقع المريخ اكدت ان اللاعب في قبضة المريخ في الوقت الذي كان فيه ابوعاقلة مع رئيس نادي الهلال.
ولا احد يستطيع ان ينافس رئيس الهلال اذا لبس (الكسكتة) ..ليحصل الهلال على توقيع لاعب سوف يكون باذن اللـه من اهم اللاعبين في السودان في الفترة القادمة.
ابوعاقلة لاعب فيه مواصفات من عمر بخيت ومن الشغيل ومن علاءالدين يوسف.
الهلال حصل على لاعب بمواصفات نادرة صعب ان تتوفر في ملاعبنا السودانية في هذه الفترة.
الموهبة الاخرى والتى اسعدت الهلال كثيرا وكانت احدى امانيهم حصول الهلال على توقيع اللاعب ولاءالدين بعد مفاوضات طويلة مع مجلس ادارة نادي الاهلي مدني كان فيها مجلس ادارة نادي الاهلي مثل مجلس ادارة نادي ام بدة في كلمته وموقفه.
ولاءالدين ظل محور صراع بين الهلال والمريخ لمدة (6) شهور – نجح فيها الهلال بقيادة الكاردينال في الحصول على توقيع اللاعب عبر سبل شرعية ومفاوضات حضارية.
مع ذلك ومع ان اللاعب في غرفة تسجيلات نادي الهلال والاوراق طرف المجلس ظل مجلس المريخ السابق بقيادة جمال الوالي في ملاحقة مستمرة للاعب ولاءالدين.
لاعب بمثل هذه الموهبة صعب التفريط فيه.
لذلك ظل اعلام المريخ يختلق الاكاذيب ويحاول الصيد في الماء العكر حتى يصل مع مجلس الاهلي مدني الى اللاعب.
حاول مجلس المريخ بقيادة جمال الوالي مع مجلس الاهلي الذي كان كبيرا وعند كلمته ..وحاول مجلس المريخ مع اسرة اللاعب.
لكن التعامل الحضاري والذكي من مجلس الهلال ..جعل كل محاولات المريخ تنتهى بالفشل الذريع.
ومثلما زعل وغضب غارزيتو في التفريط في عمار الدمازين …كان غضب جمال الوالي وزعله كبيرا في فقدان ولاءالدين.
اما لجنة تسيير المريخ فقد وجدت كل الفشل في الوصول لابوعاقلة ..لتفشل كل قطاعات المريخ ومجالسه واجهزته الفنية في الحصول على موهبة قصدها الهلال او ارادها.
اذ لم يخرج المريخ في هذه التسجيلات بشيء ..إلّا بعد ان يرفع الهلال يده من الساحة وقد اكتفى الهلال محليا من المواهب وتبقى له خانات محددة.
الذي يهمنا الآن هو النجاح الكبير الذي حققه الكاردينال في تسجيلات هذا العام مع فوزي المرضي وخالد النقر واللذان يحسب لهما ذلك النجاح والاختيار.
اما الكاردينال فيحسب له ادارة العمليات بذكاء كبير ..والقدرة المادية الكبيرة على تسديد قيمة الصفقات مهما كلفت الكاردينال.
طبعا في ظل هذه النجاحات لا نستطيع ان نهمل الموهبة (احمد ميسي) والذي جاء من رديف المريخ وهو موهبة لم تجد المناخ الملائم لتنجح وتبدع.
وينتظر جماهير الهلال الكثير من الاخبار والصفقات المفرحة.
……..
ملحوظة : قولوا ما شاءاللـه.
هوامش
المريخ كله هذه الايام مركز مع امير كمال.
وكوفي.
ما قادرين يتنفسوا.
لذلك كان نجاح الهلال في الحصول على توقيع ولاءالدين وابوعاقلة وعمار الدمازين واحمد ميسي.
شكرا كتير لامير كمال.
اصلك ما قصرت.
خالد النعسان لاعب قصير وذو بنية جسمانية ضعيفة ..وقت شفت اللاعب بين معاوية الجاك وهيثم كابو في الصورة افتكرت المصور نشن برة اللاعب.
نحمدك يا رب.
ضباط الاتحاد العام في ظل هذه الازمة بتفسحوا في القاهرة.
والمنتخب خسران.
قلنا ليكم الجماعة ديل ما ناس كورة ..ديل بفتشوا في مصالحهم فقط.
الموسم في نهاياته …والمركب سايقها محمد سيد أحمد.
منتهى الفوضى.
ليها حق الكورة تتدهور بهذه الصورة.
لكن اي حاجة عندها نهاية.
…………
عاجل : الكسكتة تحتها شنو تاني؟.