بابكر سلك

كان أخد مجراهو البلد ما بتتطمبج


* شفتوا شوارعنا لما المطره تجى؟
* شفتوا الطمبجه البنعيش فيها لمن الخريف يفوت؟
* طمبجه مشهودة
* حتى قادتنا يكفكفوا بناطلينهم ويتصوروا سيلفى مع الطمبجه
* قربوا يكتبوا لينا الآن أنا أتطمبج
* كأنو الطمبجه تانى ما بلقوها
* والخريف البعدو نفس الطمبجه
* إذا فى تغيير بتغيير من المشهد المسئول وبس
* بجى فى المشهد مسئول جديد
* برضك مكفكف لينا ويتصور سيلفى متطمبج ومكفكف
* لكن لو كان عندنا صرف وتصريف محترم
* والسيل كان عرف حاجه
* وكان أخد مجراهو
* ولو أخد مجراهو البلد ما كانت إتطمبجت
* أصلو ما بجيب الطمبجه إلا إذا ما أخذ مجراهو
* لذا السيل ياخذ مجراهو عشان ما نتطمبج
* ويبقى مافى مسئول حا ياخد لقطه سيلفى مكفكف مع الطمبجه
* والقانون ياخذ مجراهو عشان ما نتطمبج
* ووقتها مافى كاوبوى حاياخد لقطة سيلفى بالكسكته
* وإذا أصر الكاوبوى على السيلفى
* صدقونى حاياخدها فى الليق
* هات اجمل تعليق
* أيها الناس
* قول فى الف رابطه
* قول فى كلو رابطه عشرة فرق
* يبقى عندنا عشرة آلاف فريق
* قول فى كلو فريق فى تلتين لاعب يساوى تلتمية الف لاعب
* يبقى عندنا كم لاعب روابط؟
* عشرة آلاف فريق فى تلتين لاعب يساوى تلتمية الف لاعب
* تصدقوا الهلال إتصل بى اربعمية وخمسين الف لاعب رابطه من
التلتمية الف العندنا!!!!
* يا شيخ فوزي
* ديل لو داير تسجلهم كلهم الكمبيوتر ما بشيلهم ليك
* يشيلهم كشف كيف ؟؟؟؟
* ولا احتمال تكونوا يا شيخ فوزي فكرتوا تعملوا اتحاد عام براكم وبي
انديتو جاااااهز !!!!
* طيب ده تودوهوا وين ؟؟؟
* ده ماحقكم من بدري برضو
* الاتحاد الفيهو لجنة حكام تخطئ ولا تظلم ده
* الاتحاد المابعرف يقرأ برتغالي ده
* الاتحاد البسجل سيدي بيه كوطني اعتبار ما يكون ده
* الاتحاد البنسي تقرير الحكم اليوغندي الادار مباراتكم ضد الفريق
النيجيري الوديه المعلنه ده
* الاتحاد ده
* اسي بقي ككا ؟؟؟؟؟
* ايها الناس
* مجلس ونسي ماشي صاح
* والعضويه تحتاج مراجعه دقيقه
* ودقيقه جدا
* ودقيقه اسي بجيكم
* رجعنا
* العضويه بالراس دي زمانها فات وغنايا مات
* دايرين العضويه ام راس
* لانو العضويه بالراس
* بتجيب ناس لو بقوا فاس ما بشقوا الراس
* دايرين عضويه ام راس
* تجيب ناس هينين علينا ولينين علينا وصعبين المراس
* لذا
* نراجع العضويه يا ونسي
* حرف حرف
* زول زول
* زنقه زنقه
* دار دار
* الخوف نطلع مواسير كتيره من جوه الماسوره الكبيره
* اها
* كلنا حول المجلس
* نتشاور
* وما خاب من استشار
* نشاور الجميع
* الاحياء منا والاموات
* كلهم لازم تشاورهم يا ونسي
* بالذات الاموت ديل
* الناس ديل قدموا الكتير جدا
* ورايهم مهم
* المهم
* قطاع المراحل السنيه شغال شغل صاح
* والشجره المثمره من هي شتله بتتعرف
* وما يشتله طارق المعتصم ورفاقه من قدامي اللاعبين
* يبشر بثمار حايكتر حولها الشمار
* الشفتو امس ده
* اداني امل كبير
* وطمني
* ايها الناس
* دائما في فترة الاحلال والابدال تكتر الاقتراحات
* ناس بيقولوا المريخ محتاج اطراف
* يمين وشمال
* وثيردباك وامير يمشي المحور
* وناس بقولوا المريخ محتاج مساك شمال
* وصانع لعب مهول ومهاجم مع بكري
* وناس بقولوا المريخ محتاج طرف شمال وثيردباك طويل وراس حربة
موديل ايداهور مع بكري
* وفي ناس بقولوا المريخ داير مهاجم وطني وطرف شمال مستورد
* والناس تقول كلام
* وربك رب الخير يقول كلام
* لكن فيها ايه لو جبنا ثيردباك مصري اصلي
* نستفيد من مصرنتو
* وطرف شمال افريقي لمن غلط
* علي النعسان واولاد الرديف كفايه
* برضك رأي
* مجرد رأي
* هو الكلام بقروش !!!!
* لو الكلام بقروش كردنه كان فلس
* تفليسه كيف يا كردنه !!!!
* زابطه !!!!!
* ايها الناس
* كفانا طمبجة مواطن وسيلفي مسئول رغم انها مطينه علينا كمان يكفكف
لينا
* الغريبه زمان في الشكله
* الزول اول حاجه بكفكف كم القميص
* حتي الشكله تبدأ
* وفي ناس بحجزوهم قبل الشكله
* تلقي الواحد حاجزنوا وهو بتكلم مع الزول المشاكلو من بعيد
* تكفكف لي انا ؟؟؟
* اصبر بوريك
* زمان الكفكفه كانت حقاره
* اسي الكفكفه بقت حضاره
* ويكفكفوا من كبارها
* المهم
* لازم ياخد مجراهو
* ايها الناس
* ان تنصروا الله ينصركم
* اها
* نجي لي شمارات والي الخرتوم
* أكان شفت يا والينا
* ناس كتار بتكلموا فينا
* يحكوا بي حكاوينا
* وبضربوا بينا المثل كمان يا والينا
* ناس يقولوا ليك السودانيين كسلانين ومابشتغلوا لينا
* ناس يقولوا ليك جنهم يتكوا وهاك يا قصص يبوظوا الشغل علينا
* وناس بفخروا بينا
* وناس بفتكرونا جنينه
* لكن اجمل قصة سمعتها عننا وعجبتني يا والينا
* قالوا السوداني ما بعرس البحبها وما بحب مرتو
سلك كهربا
** ننساك كيف والكلب ياخ ,,, بحب مرتو ونسابتو كمان….هو دي
مابقولها قدامهم؟!
ﻭﺍﻟﻲ ﻟﻘﺎﺀ
ﺳﻠللللللك