اعملوا حسابكم من (العسقلاني)

غريب ان يحارب غارزيتو لاعبين طالب بهم ونادي بتسجيلهم مثل (ديدي) – واغرب من ذلك ان يرفض غارزيتو اللاعب (كوفي) بعد كل النجاحات التى حققها
لجنة تسيير المريخ واللجنة المكلفة بالتعاقد مع الفرنسي غارزيتو هي لجنة ايضا تفتقد للخبرة وهي مثل (العسقلاني) تماما جاءت ايضا عبر التعيين
اللاعبون الذين طالب بهم غارزيتو الآن لاعبين مغمورين وهم مجرد اسماء بدون خبرة وبدون نجومية
غارزيتو لم يسلم منه حتى (جمال الوالي) الذي اتهمه بانه كان سببا في ان يفقد المريخ اللقب الافريقي
في الهلال في فترة مجلس الامين البرير المنتخب ، ورط عضو مجلس ادارة نادي الهلال الذي جاء عبر التعيين (العسقلاني) وقتها الهلال في ورطة كبرى عندما اوكل المجلس له امر التعاقد مع الفرنسي غارزيتو ليمنحه عرضا خرافيا كلف خزينة الهلال كثيرا.
فوق ذلك فان عقد الهلال مع غازرتيو منحه كل الصلاحيات بسبب ضعف خبرة (العسقلاني) الذي دخل مجلس الهلال عبر بوابة التعيين.
الآن لجنة تسيير المريخ تقع في نفس الاخطاء التى وقع فيها (العسقلاني) وهي تتعاقد مع (غارزيتو) بعرض خرافي آخر.
لجنة تسيير المريخ واللجنة المكلفة بالتعاقد مع الفرنسي غارزيتو هي لجنة ايضا تفتقد للخبرة وهي مثل (العسقلاني) تماما جاءت ايضا عبر التعيين.
والتعيين دائما يدخل شخصيات لا خبرة لها ولا معرفة بالعمل الاداري فيدفع الهلال والمريخ ثمن تدخل السلطة.
اللجنة المكلفة بالتفاوض مع المدير الفني للمريخ الفرنسي غارزيتو وصلت لاتفاق معه واصبح الفرنسي قريبا من التوقيع على موسم جديد مع فريق المريخ.
رغم هزائم المريخ في الممتاز – خمس مرات.
وهذا للتذكير.
مرتين في استاده.
الى جانب هزائمه الكبيرة في البطولة الافريقية امام عزام ومازيمبي ، ولولا جهود (الحكام) ما كان للمريخ ان يصل للمربع الذهبي في بطولة الاندية الافريقية.
مع ذلك نجح غارزيتو بالخروج بالعقد الذي يريده مع المريخ.
التجديد مع غارزيتو في المريخ ..نحن كهلالاب اسعدنا كثيرا ..فهذا يعني ان (الصراعات) والخلافات والحرب سوف تكون مستمرة في المريخ.
وسوف يظهر ضحايا جدد لغارزيتو من اللاعبين في المريخ.
بكري المدينة نفسه سوف يدخل دائرة (الخطر).
وقريبا سوف يتم تشفير بكري المدينة …(خلي سكينك جاهزة يا اخوي).
في الموسم الماضي حارب غارزيتو تراوري واكرا ، وبدأ في خواتيم هذا الموسم حربا على علاء الدين يوسف.
غارزيتو في هذه الفترة بدأ اعتراضا واضحا على المحترف ديدي وكوفي..رغم نجاحهما الكبير مع المريخ في الموسم الماضي …(باعتبار ان تمديد الموسم غير قانوني).
غريب ان يحارب غارزيتو لاعبين طالب بهم ونادي بتسجيلهم مثل (ديدي) – واغرب من ذلك ان يرفض غارزيتو اللاعب (كوفي) بعد كل النجاحات التى حققها.
ذلك يعني ان غارزيتو عنده (مصالح) في استقدام محترفين جدد …وقد اعلن عن حاجته للتعاقد مع خمسة محترفين.
قديمة يا غارزيتو.
في كل تسجيلات تطالب باسماء جديدة!!.
هذا يعني ان المريخ سوف يتخلص من كل محترفيه الموجودين في الكشف الحالي بعد ايقاف التجنيس.
يعني ذلك ايضا ان الاتهامات التى تطال المدرب غارزيتو بـ (السمسرة) اتهامات حقيقية والفرنسي في كل فترة تسجيلات يرفض الذين استقدمهم ويطالب بتسجيل لاعبين جدد.
اللاعبون الذين طالب بهم غارزيتو الآن لاعبين مغمورين وهم مجرد اسماء بدون خبرة وبدون نجومية.
ديل لو احضرتوهم له من (الميناء البري) يكون احسن – بدل ما تدوا الناس السهر ساكت في مطار الخرطوم.
بعضهم يتمرن مع المريخ الآن …ويدعى اعلام المريخ ان جمهور المريخ طالب بهم.
اشكال كدا …تقول جايبنهم من ميدان عقرب.
وما من الملعب كمان – من المدرجات.
قالوا ليكم نحن ما بنعرف الناس البيعرفوا يلعبوا.
يبدو ان استفادة غارزيتو من التعاقد مع لاعبين جدد كبيرا ..وإلّا ما رفض ديدي وكوفي وطالب باسماء مغمورة للتعاقد معها.
تعاقد غارزيتو مع المريخ سوف يحول المريخ الى منطقة كوارث وسوف تصل الحرب حتى الى علاء الدين يوسف.
ولا نستبعد ان تشمل القائمة اسماء جديدة من لاعبي المريخ ..هذه طبيعة لغارزيتو عرف بها في كل الاندية التى اشرف عليها.
الزول دا بفتش للمشاكل ..ما بعرف يقعد ساكت ..وهدفه القادم (بكري المدينة).
اسمعوا الكلام دا.
السيناريو مرسوم كدا عند غارزيتو.
الاخطر من ذلك ان غارزيتو كان قد اشاد في حواره مع صحيفة (قوون) بدائرة الكورة في الهلال بقيادة خالد بخيت وابوشامة في الوقت الذي وجه فيه انتقادات حادة لدائرة الكورة في المريخ.
شفتوا الفرق.
وذلك يعني ان غارزيتو وجد المعاونة والمساعدة من دائرة الكورة في الهلال..ولم يجدها في المريخ ..وهذا امر يزيد مخاطر غارزيتو في الموسم الجديد.
غارزيتو لم يسلم منه حتى (جمال الوالي) الذي اتهمه بانه كان سببا في ان يفقد المريخ اللقب الافريقي ..واحسب ان غارزيتو رغم اختلافنا معه إلّا انه وافقه الصواب في هذا التصريح.
الكل يعرف تدخلات جمال الوالي في الشأن الفني هذا امر عرف به جمال الوالي وهو شيء لا بد من انه ادخل الوالي في صدامات كبيرة مع المدرب الفرنسي.
واضح ان العلاقة بين غارزيتو وجمال الوالي لم تكن على ما يرام ..وقد ابقى على غارزيتو في المريخ (عقده) الذي ضمن به الخواجة الاستمرار في المريخ.
غارزيتو الآن فعل نفس الشيء وآمن نفسه وابنه بعقده الذي ينتظر ان يوقعه مع المريخ.
الغريب ان لجنة تسيير المريخ إلتزمت ونفذت كل طلبات وشروط المدرب الفرنسي.
قالوا سوف نقلل من قيمة الصفقة المادية ..فزادوها.
قالوا لن نقبل باستمرار ابن غارزتيو انطونيو في المريخ ..فقبل به ورفع له راتبه.
بل ان غارزيتو قال في حواره مع الزميل محمد عوض ان انطونيو هو مدرب المريخ الحقيقي.
قالوا سوف نفرض عليه مدرب وطني كبير في السن وعنده خبرات فرفض غارزيتو ذلك وطالب بامير كمال واحمد الباشا.
غارزيتو يريد ان يشكل الاشياء كما يشاء …ما في زول بقدر يقول ليه حاجة.
غارزيتو لخبط اي شيء ..لدرجة انه طالب بكابتن المريخ أحمد الباشا (مساعدا) له.
دي بالغت فيها.
يعني لو قال ليكم عاوز (همد) مدرب للحراس …ما تستغربوا …ممكن غارزيتو يعملها.
في حوار غارزيتو امس مع قوون …اطلق المدرب الفرنسي الكثير من التصريحات التى كشف بها المريخ.
غارزيتو قال ان ابنه لم يتسلم راتبه منذ 6 شهور.
طيب يا جماعة جمال الوالي دا كان بعمل في شنو؟.
اوعكم زول يسأل لجنة التسيير في المريخ ..اذا كان انطونيو 6 شهور في فترة جمال الوالي ما صرف مرتب.
بس فالحين لي يا مزمل ابوالقاسم وبابكر سلك على (اسامة ونسي).
اوعكم – اسامة ونسى دا نحن ما بنقبل فيه اي شيء.
زول منظم وحقاني.
من اهم اعترافات غارزيتو التى اباح بها لمحمد عوض وقوله ان جمهور المريخ (راقي) وجمهور الهلال (متعصب).
هذا امر يكشف عشق جمهور الهلال لفريقها وتعصبه له.
غارزيتو قال في هذه النقطة : (جمهور المريخ وقف مع الفريق في الفترة الماضية بقوة وبالاخص في مباريات بطولة الاندية الافريقية الابطال وآزر الفريق كثيرا خلال المباريات واضاف ان جمهور الهلال متعصب ولا يحب ان يرى فريقه مهزوما).
عشان ناس الاتحاد وناس البرلمان ذاتهم يكونوا عارفين.
جمهور الهلال متعصب وما بحب يشوف فريقه مهزوما.
غارزيتو براهو قال كدا.
شفوت انتوا.
جمهور الهلال صعب.
لجنة تسيير المريخ قطعت حبل الود بينها وبين جمال الوالي بعد التصريحات التى راجت عن الفرنسي في حق جمال الوالي.
كما ان شعرة معاوية بين لجنة التسيير وجمال الوالي كانت متمثلة في وجود (همد).
وهمد استقال.
ذلك يعني الحرب الباردة بين المجلس وجمال الوالي في الفترة القادمة.
والما بشوف من الغربال يبقى اعمي.
لا سيما وان جمال الوالي ترك حمل تقيل على لجنة التسيير عندما ترك لهم امر امير كمال وراجي وكوفي ومصعب عمر وصرح انه تكفل بمستحقاتهم وحسم امرهم.
طلع ما في كلام زي دا.
……………….
ملحوظة : وح نشوف كتير.
هوامش

الليلة يوم فاصل في تاريخ الهلال.
ننتظر التسجيلات.
وننتتظر القرار المفصلي من البرلمان.
ونشوف البحصل شنو؟.
يا باظت.
يا الحكاية استعدلت.
اللجنة بتكون وصلت لحلول مرضية.
المشكلة ما الحلول المرضية.
المشكلة الحلول تنفذ.
وتكون في جهة قادرة على تنفيذ القرارات.
الهلال في ظل هذه الاوضاع استمراره يبقى مستحيل.
الغاء الموسم الخسران الاول هو الهلال باعتبار ان البطولة كانت محسومة للهلال.
مع ذلك ضحي الهلال بالبطولة في سبيل موقفه.
ويمكن ان يضحي الهلال بالموسم القادم بما في ذلك البطولة الافريقية اذا بقت الازمة على ما هو عليه.
غارزيتو عاوز ليه خمس محترفين ..والتسجيلات باقى ليها ايام.
يجيبوهم ليك من وين يا غارزيتو …إلّا من السوق الشعبي.
الزول دا بحلم.
ايمن سعيد الذي كانوا يدافعون عنه ..الآن يتعرض لاقسى هجوم.
حتى غارزيتو قال ايمن سعيد كبير في السن ودائما مصاب واستنفذ اغراضه.
عشان تعرفوا.
موضوع مصعب عمر وراجي ..وصل وين؟.
المنتخب خسر ..والسبب الاتحاد.
اين علاء الدين يوسف واين كاريكا ونزار والشغيل وبشه؟.
تساهل الاتحاد ..وتهاونه هو الذي اوصل المنتخب الى هذه المرحلة.
خطأ كريمة كان من رمضان عجب.
وخطأ مباراة الامس كان من سفاري.
……………
عاجل : الفرح جاكم..امسكوا (اللقيمات).