تحويل الرصيد لو كمل ليكم حافز خالد النعسان ما قصر معاكم

يعني إلّا يقول ليكم (احمد) ميسي…إلّا يقولها ليكم عديل كدا..ميسي عندنا في الرد كسل ..البخلينا نمشي الكامب نو شنو؟
اول ما تقعد في الحافلة..والكمساري يقفل باب الحافلة ، والحافلة تتحرك ..يظهرن ليك سبعة نسوان من نسوان الحلة ..راكبات وراك ، محل ما تقبل ما تعرف
اللاعب يخطفوه ..ويلبسوه شعار المريخ ..ويجيبوه الاتحاد العام ..يكتشفوا ان اللاعب المخطوف هذا غير مفكوك
عشان (فلسكم) دا وحيرتكم ..الاتحاد العام مدد ليكم فترة التسجيلات اسبوع تاني
*****************************************************************************
حكاية المريخاب الايامات دي مع التسجيلات زي حكاية الزول البيركب المواصلات.
ويقعد في الحافلة.
الدنيا دي كلها مقفلة في وشو.
وهو ما عندو قروش ..غير قروش تذكرتو…البتوصلو الحلة.
قروش قدرو بس.
قرش ما زايدة.
زولكم اول حاجة يركب (الحافلة) خايف…يتلفت متل الطالب الما حافظ جداول الضرب.
وخايف زول يجيب ليه سيرة جدول سبعة.
من الحاجات البتذكرها ..جدول سبعة دا زمان كان متعب شديد – تقول عاوز منك قروش.
تركب الحافلة وانت ما عندك غير قروش نفر واحد.
اول ما تقعد في الحافلة.
والكمساري يقفل باب الحافلة ، والحافلة تتحرك ..يظهرن ليك سبعة نسوان من نسوان الحلة ..راكبات وراك.
لو راكبات قدامك ..ما في مشكلة ..بتعمل فيها ما شايفهن.
السبعة يكوركن ليك في زمن واحد – والكمساري ماشي عليك.
ما تعرف تمشي وين؟.
محل ما تقبل ما بتعرف.
تقرب تنط بالشباك.
الدنيا دي تمرق من نفسك.
آخر حاجة تعمل فيها لا شايف ولا سامع حاجة.
تكمل الدغالة دي في حافلتك.
لكن تأكد – ومن غير قطع شك – النسوان ديل ح يشيلن حالك في الحلة ..ويقولون عليك اتغابيت فيهن العرفة.
الحالة دي ..زي حالة المريخاب الآن.
نفس الملامح والشبه ..وقومة النفس.
حالة صعبة شديد.
اللاعب يخطفوه ..ويلبسوه شعار المريخ ..ويجيبوه الاتحاد العام ..يكتشفوا ان اللاعب المخطوف هذا غير مفكوك.
حمدي الامل نسيتوه.
خطفوه ..ودخلوه في غرفة تسجيلات المريخ اسبوع كامل.
ولبسوه شعار المريخ.
ومشوا بيه مباني الاتحاد العام.
صوروه ورجعوه من غير ما يوقع.
زي عربية السيرة الما عارفة بيت العروس.
بتقيف ليها في بيت تاني …ما عندو علاقة بي بيت العرس.
جماعتكم افتكروا الاتحاد ممكن يسجل ليهم حمدي الامل …طالما بحول ليهم في النقاط بدون سبب.
مجلس المريخ حمدي الامل …جابوه ولبسوه ورجعوه.
زي حملة التطعيم.
وجرايد المريخ بتتكلم (21) يوم عن صانع العاب الامل الخطير حمدي الامل.
غايتو نحن حالة زي دي اصلو ما شفناها.
اللاعب الآن اتسجل في الاهلي شندي.
اللاعب يلبس شعار المريخ وتصلوا بيه مباني الاتحاد العام وما تقدروا بعد دا تسجلوه.
زي دي اصلو ما حصلت قبل كدا.
حمدي الامل خلوه.
اعلام المريخ شغال لينا 45 يوم بتكلم عن (عطرون).
ولجنة تسيير المريخ تنشر في صور اعضاء اللجنة مع عطرون.
وعطرون ذاتو يصرح في الجرايد حققت رغبة حياتي.
والمحللين الفنيين بتكلموا عن مواصفات عطرون الفنية وعن امكانياته الهائلة.
وناس مزمل ابوالقاسم يكتبوا في جرايدهم ان رئيس نادي مريخ كوستي تكفل لهم بتسجيل اللاعب في المريخ العاصي.
وكلو يوم ..يقولوا ليك عطرون يوقع في كشوفات المريخ اليوم.
وقت الموضوع بقى على (القروش)…الجماعة اختلفوا على (500) الف جنيه.
500 الف جنيه خلت ليك الصفقة تطرشق.
وزي ما طرشق موضوع (عطرون) وبي كل بساطة كدا قالوا ان المريخ يصرف النظر عن عطرون…طرشق موضوع بكري بشير.
بكري بشير دا كمان حكايتو حكاية.
جماعتك اعاروا (عنكبة) لهلال الابيض عشان ما يدفعوا في بكري بشير قروش.
واعلام المريخ اتكلم ان موضوع بكري بشير اتحسم.
تتخيلوا ناس الصدى والزعيم طلعوا خبر وقالوا فيه ان بكري بشير وقع في بحر دار في اثيوبيا…عشان الهلال يبعد من الصفقة.
وقالوا ان شقيق بكري بشير استلم حافز تسجيل شقيقه في الخرطوم.
كضب من امو.
ولا في حاجة زي دي حصلت.
لا وقع ولا حاجة.
كلو كضب ساكت زي (حل مجلس الهلال).
بكري بشير صفقتو مع المريخ توشك ان تتطرشق.
ويا ريت.
يا ريت لو الموضوع وقف على بكري بشير.
تعالوا شوفوا موضوع اللاعب الجنوب سوداني الوك.
دا كمان حكايتو حكاية.
خطفوه.
وجابوه من جوبا.
واتصوروا معاه.
ولبسوه شعار المريخ.
وحاموا ليك بالصورة واللاعب في المواقع.
وقالوا المريخ يوجه ضربة قاضية للهلال.
ووقت الحكاية بقت على القروش – جماعتك ظهر انهم ما عندهم قرش.
ناس شيكات ساكت.
انتوا وقت ما عندكم قروش ..بتخطفوا اللاعب ليه؟.
تخطفوا الزول وتلبسوه شعار المريخ وما عندكم قروش.
الاخطر من ذلك ان اللاعب الوك قضيتو كبيرة ومشاكله كتيرة وهذا هو السبب الذي جعل مجلس الهلال يتأخر في قيده.
اللاعب مسجل في مريخ كوستي ..وقد لعب معهم محليا.
في نفس الوقت اللاعب مسجل في الملكية جوبا وقد لعب معاهم افريقيا.
وما معروفة (جنسية) اللاعب طلعت كيف؟.
مشاكله كتيرة ..والكاردينال كان قادر على حل هذه الاشكالية.
الموضوع ما خطف ساكت.
ولا صور.
والموضوع اصلو ما في انكم تلبسوا اللاعب شعار المريخ وتعتبروا الموضوع انتهى على كدا.
القصة ما كدا.
الوك خلوه.
انتوا عارفين المريخاب ديل الهلال عمل فيهم شنو في (الرديف)؟.
عمل فيهم اي شيء.
مسخ ليهم حياتهم.
خلاهم يشوفوا ليك الرديف دا تسعة – تسعة.
في التسجيلات الماضية الهلال سجل من رديف المريخ كابتنه وطرفه الايسر الخطير محمد عبدالوهاب.
وهو موهبة ما فيه اي كلمة.
موش مفروض الجماعة ديل يتعظوا.
يتعلموا من (الدرس) دا.
تصوروا ما اتعلموا.
ولا اتعظوا.
المريخاب ديل الهلال دخلهم ليك مدرسة تاني في احمد ميسي.
قلبهم اتقطع عليهم.
وما عرفوا يتصرفوا كيف؟.
ما عرفوا يعملوا شنو؟.
الكاردينال قال ليهم قبل كدا في قناة النيل الازرق لو عاوزين ميسي بنجيبو.
جماعتكم افتكروا الكاردينال قاصد ميسي بتاع برشلونة – وهو ميسي معاهم في فريقهم.
الجماعة لمن الهلال سجل ميسي …حتين عرفوا ليك الكاردينال قاصد منو؟.
يعني إلّا يقول ليكم (احمد) ميسي.
إلّا يقولها ليكم عديل كدا.
ميسي عندنا في الرد كسل ..البخلينا نمشي الكامب نو شنو؟.
ويا ريت.
يا ريت بس بعد الدروس دي كلها لو اتعلموا.
ما بستفيدوا اصلو من الدروس.
الهلال طبق فيهم النظرية تاني.
وقدام عيونهم.
وبعد ان سلموا اللاعبين حافز تسجيلهم.
الهلال قام ليك.
وثب ليك فيهم.
سجل ليك باسل واباذر عبدالباقي.
خلى ليك الجماعة عاوزين يتخابطوا في مكاتب الاتحاد.
باسل واباذر ديل ..مستقبل جاهز.
ما فيهم اي كلمة.
جماعتكم المساكين ديل …التسجيلات دي كلها ما طلعوا ليك منها إلّا بـ (خالد النعسان).
تقول عندهم حولية.
خالد النعسان ذاتو كان مقفول في غرفة تسجيلات المريخ لمن النوم طار من عينو.
سجلوه بعد تلاتل.
فلسكم كعب.
ما كنا قايلين انو موضوع الفلس دا ممكن يصل بيكم لهذا الحد.
التسجيلات استمرت شهر …ما سجلوا فيها غير خالد النعسان.
وعشان (فلسكم) دا وحيرتكم ..الاتحاد العام مدد ليكم فترة التسجيلات اسبوع تاني.
وبرضو ما عندهم غير خالد النعسان.
وبابكر سلك المسكين شغال ترويج للتبرع وتحويل الرصيد على الرقم 2870.
جمال الوالي فات وخلاهم ليك لتحويل الرصيد على الرقم 2870.
فلس شديد.
………………
ملحوظة : الاتحاد لو عارف فلستكم دي كان لغى (التسجيلات).
هوامش
التسجيلات مفروض تنتهي اليوم.
لكن عشان خاطر المريخ مددوه برضو.
جماعتكم مصعب عمر ما وصلوا معاهو لاتفاق.
يا مصعب بعد كدا ممكن تمشي اهلي شندي مرتاح الضمير.
الجماعة ديل ما عندهم ليك قروش.
حمدي الامل جابوه واتصوروا معاهو وشالوا منهم.
عطرون جابوه واتصوروا معاهو وما قدروا يسجلوه.
بكري بشير جابوه وقالوا وقع في كشوفات المريخ ..وما سجلوه.
الوك خطفوه واتصوروا معاهو ولبسوه شعار المريخ وما قدروا عليه.
ديل تاني يعملوا ليهم شنو؟.
شن يسوا ليهم؟.
انتوا ردفيكم دا لو غالبكم كدا مسكوه فوزي المرضي.
ادهو خالد النقر يمسكوا ليكم.
رديف المريخ الرافد الاول للهلال.
عشان كدا يا ناس المريخ عليكم اللـه رديفكم دا السنة دي سجلوا لينا فيه مواهب كويسة.
السنة القادمة ح نشيلهم منكم.
نحن اهم حاجة عندنا رديف المريخ.
كما انصح رئيس نادي الهلال اشرف الكاردينال بدعم رديف المريخ.
اقول ليكم حاجة.
اعملوا ليهم ورشة عديل كدا.
علموهم اي شيء ..عدا ان تعلموهم كيف يحافظوا على لاعبي رديفهم.
بس دي الما تعلموهم ليها.
خلوهم دايشين كدا.
بالمناسبة لو التسجيلات دي مدوها تاني اسبوع ..لاعب واحد من رديف المريخ ما بقعد ليهم.
ولا لاعب.
تسجيلات المريخ هذا العام ….الموسم الجديد (وصيف) ما بتجيبو.
اقنعوا منها.
…………
عاجل : جمال الوالي اذا كان بعمل الحاجات دي كلها روابط المشجعين في المريخ لزومها شنو؟.