جـــو فـــــول

> المثل بقول أعطي العيش لخبازو ولو ياكل نصو
> وأنا بقول أعطي الكمونية لمرة مقعدة ما تديها لي بنيه
> والواقع بقول خت القروش في البنك بعد تملي التنك
> لأنو لو وديت القروش البنك قبل تملي التنك
> مع قطعة الغاز دي
> وقطعت بنزين
> مع الشبكة البتطش كتير دي الصراف الآلي ما بنقذك
> طوالي بقول ليك (is out of service)
> العبارة دي شدة ما كتيرة في ناس قايلنها ماركة الصراف
> أيها الناس
> نحنا بنريس ونتيس
> ونعمل فيها كجونكات كبار
> زي ناس المحلية ولا ناس شنو هم ما عارف
> زمان كان اسمهم ناس البلدية
> تلقى العمال بنضفوا في الشارع
> شغالين شغل شديد
> وواحد ما شغال أية حاجة
> تلقاهو رئيس الناس ديل كلهم
> وبصرف أكتر منهم
> وينظر ليك
> شيل الكيس ده
> كأنو لو ما قال كده العامل ما بشيل الكيس
> ياخ العامل شايل الكرك والمقشاشة والقفة
> وعرف ينضف الشارع كلو
> ما بعرف يشيل الكيس
> خليهو ياخ هو عارف شغلو
> أيها الناس
> في مرحلة وفي غفلة ارتفع سقف اللاعب الأجنبي عندنا
> وبقينا أكبر سوق للاعبي كرة القدم الأجانب
> جبنا من إفريقيا كلها
> حبشي إريتري يوغندي كيني مالي نيجيري ونيجري
> ومصري وتونسي وزامبي و كمروني وجابوني وتشادي (تجميع محلي)
> وأنجولي ومنقولي وحنفولي
> زيمبابوي وصومالي بي رقم وطني قدييييييييم
> وموريتاني بالشنقيطي
> وجنوب سوداني من أولاد قلب أبيي
> وجنوب سوداني ما من أولاد قلبا
> من اولاد كوبر
> عاجي وعادي وعادي جداً
> وغاني وسنغالي وغالي شديد
> وزامبي وزائيري
> ولم نكتفِ بذلك
> مرقنا بره إفريقيا
> برازيليين تجميع هندي وعمك نجاد وكواريزما
> وفرنسي بمكنة كيبي
> كنا نتسارع في التنافس عليهم
> ملينا البلد مواسير لمن قطعت مويتنا
> ولأننا بنريس ونتيس
> أوكلنا لشداد أمر إدارة الكرة ببلادنا بوصفه رئيساً للاتحاد السوداني
> شداد شاف إنو استجلاب الأجانب بالهبل ده بضر الكورة
> حدد الأجانب بي تلاتة
> حفاظاً على خانات الوطنيين
> ومنع استقدام حراس المرمى حفاظاً على هذه الخانة الحساسة والتي تعاني ندرة عالمية
> لأننا نريس ونتيس
> احتلنا على خبرة شداد وقوانين البلد بالتجنيس
> ساعدتنا في ذلك الدولة
> جينا بالتجنيس
> الأجانب بقوا ستة
> وياريتهم لو نفعوا المحتوى ورفعوا المستوى
> شداد لحق القصة بي لائحة تحدد مشاركة المجنسين
> نطَّ الارباب في قضية سولي شريف معللاً رفضه بان اللعب للمجنس حق دستوري مكفول له
> وكأن الحقوق الدستورية خلاص كملت بس الفضل حق الاجنبي المجنس في اللعب
> طيب ياخ الاجنبي المجنس ده بقدر يبقى رئيس جمهورية مثلاً ؟؟؟؟
> بقدر يدخل الجيش ؟؟؟؟
> قول سوداني عدييييييل كده
> ما مجنس
> اشتراط شروط ومواصفات لوظيفة معينة او مهنة او تولي منصب
> مثلاً ألا يقل العمر عن 18 و ألا يقل الطول عن ستة أقدام وأن يكون غير متزوج
> العمرو عشرين وطولو تلاتة أقدام ومتزوج
> هل تعتبر تلك الشروط مخالفة للدستور لأنها تمنع من لاتتوافر فيهم الشروط من تولي تلك الوظائف والمناصب؟؟؟
> المهم احتلنا على شداد والقانون بموجب السلطات الممنوحة بالقانون
> بالقانون نكسر رقبة القانون
> زي من دقنو وأفتلو
> أسي الناس عرفت إنو شداد كان صاح
> ألغينا التجنيس البدعة
> سوق المواسير بدا يقيف
> وانتعش سوق الاشبال والرديف من ابناء الوطن
> ودي الفكرة
> وهدأت الأسعار
> ووفرنا الدولار
> ولو وثقنا في المدرب الوطني بنتقدم أكتر
> أيها الناس
> لما نريس حقو ما نتيس
> المهم
> ونسي رئيسي
> ياربي قدر يسجل عطرون وبكري وألوك
> ولا نلوك الصبر لسه يا رئيسي ؟؟؟؟
> أيها الناس
> الحاصل شنو في الغاز !!!!!
> في ام درمان بجيبوهوا في حوش الخليفة
> والمولد في حوش الخليفة
> والمولد جا
> آها الغاز نمشي ليهو وين تاني؟؟؟؟ حوش الحجر!!
> أيها الناس
> إن تنصروا الله ينصركم ويسدد خطاكم
> باقي ورا الغاز ده خطاويكم حا تكتر لمن تفتر
> ايها الناس
> نشاطر الأرباب صلاح إدريس وأسرته الأحزان في مصابهم الجلل حاتم أحمد ادريس
> نسأل الله للفقيد الرحمة ولأهله الصبر وحسن العزاء.
> آها
> نجي لي شمارات والي الخرتوم
> كان شفت يا والينا
> الجو الأمس جا علينا
> كان جو سمك يا والينا
> لقينا الجو من رباً كريم علينا
> السمك كيف يا والينا ؟؟؟؟؟
سلك كهربا
ننساك كيف والكلب لما شاف الغيمة كتل عويناتو وجدع بسيمة..قال في سرو جو فول لكن الفول وين مع الفحم الغالي والحطب المعدوم ده !!!!
والي لقاء
سلك