هو البقولوهوا الناس شويه

> اخوتنا الاهله عودونا دائماً على تبخيسهم لانجازاتنا
> وهم يعلمون انهم لم يحققوا مثل انجازاتنا
> ان لم يكن لن يحققوا ما حققناه
> عودونا على خلق مشاكل قانونيه حول صحة تسجيل من نعاركهم في تسجيلهم
> فقالوا ما قالوا عن تسجيل اسامه ام دوم
> وافتوا بخطأ تسجيل العجب
> ونبزوا الماده «37» جنس نبز
> ما خلوا ليها جهه ترقد عليها
> وقالوا ما قالوا في تسجيل بكري المدينه
> قالوا ماشين لوزان
> وقالوا ماشين الثراء الحرام
> وقالوا بكري لا محال ماشي الهدي
> سجن الهدي
> وقالوا المسألة مسألة وكت
> بكري ما بدقها تاني
> هو البقولوهوا الناس شويه !!!!
> وبعد ده اعلامهم يقصد نجم من نجومنا عديييييييييل كده
> يطلعوهو ما عندو شيء
> عشان يتحطم
> قصدوا وارغو
> وقصدوا فيصل عجب
> وقصدوا بكري المدينه
> يقصدون مواطن الابداع في المريخ
> قصدوا جمال الوالي
> وقصدوا القلعه الحمراء تشنيفاً وتعنيفاً
> وهم ما عارفين القاصدنا بنضره
> والغريبه يخلقون جواً مستقراً لمواسيرهم حتى تثبت
> ما بجيبوا سيرة لمواسيرهم
> في كشفهم التعاون وخليفه
> وفي كشفنا العجب ووارغو
> وينتقدون العجب ووارغو
> يمدحون خليفه والتعاون
> تأكيد مدح بما يشبه الذم هو تفسيرنا لمدحهم لتلك المواسير
> استراتيجية الاهله واضحه
> هي التركيز على استهداف المريخ واعاقته
> يساعدهم على ذلك ناساً لينا
> هم من باقي اهلينا
> يذهبون لاذاعات زرقاء
> والى صحف زرقاء
> يوجهون نقدهم للمريخ
> تلك الاذاعات التي تدعي الحياد
> لا تفتح لهم استوديو الا نكاية في المريخ
> ومثلها تفعل الصحف الزرقاء
> والناس المحسوبين علينا لا يعلموا حجم المؤامره
> ولو قدر لهم ان ينخرطوا في العمل من اجل الكيان
> نفس تلك الاذاعات والصحف التي كانت تمجدهم
> ستعمل على نقدهم وانتقادهم وتمسح بيهم الواطه مسح بعد الاحتفاء الزائف داك
> ايها الناس
> يهتم الاهله باعاقتنا
> لذا يهملون درب البطولات الجويه
> وبالتالي يجددون العهد للظفر بها سنوياً
> سبعه وتمنين سنه وهم يكررون المحاوله
> طعم البزيانوس وصفر الهلال لم يتغيرا سبعه وتمنين سنه
> ايها الناس
> الحرب على الواك
> الحرب حول تسجيل الواك
> مجالس الافتاء التي تنعقد يوميا لتخرج علينا ببطلان تسجيله
> كلها اساليب قديمه ومعروفه
> واذا قمت بعمل بالطبع تتحصل على نتيجه
> ولكن اذا اردت نتيجه غير
> يجب ان تقوم بعمل مختلف
> لانه لا يمكن ان تكرر نفس العمل وتتوقع نتيجة مخالفة
> غيروا تلك الاساليب يمكن الواك يتعقد وما يلعب
> يمكن تجيبوا بطولة جويه
> ان شاء الله بالبرشوت
> واتبرشتي
> المهم
> اكتب ولجنة العضويه في اجتماع الآن
> اتمنى ان يخرج الاجتماع بتوصيات تتلاءم مع المرحله وخطورتها
> اتمنى ان نركز على العضويه ام رأس
> لا علي العضويه بالرأس
> المهم
> امس قريت خبر على صفحة صحيفه
> قال الخبر انو المدرب الفرنسي الجديد بتاع الهلال
> قال شفت الهلال مرة واحده امام اتحاد الجزائر
> واستغربت كيف فريق زي ده طلع من البطوله وماشال الكاس
> ده الخبر
> لكن الخبر الاكبر لو كان الزول ده ما قال الكلام ده
> لانو لو قالوا ببقي ما ناقش كورة
> فالخبراء والاهله الشرفاء زاتهم
> لي اسي ما عارفين الهلال ده وصل دور الاربعه كيف؟ وليه؟ وما ممكن
> يا المدرب شتل
> يا الجريده شتااااااااااله
> صدقوني شهر سته بكون في مدرب رهيب جديد للهلال
> المهم
> بمناسبة المدرب الاجنبي
> مجلس التسيير على قلة فترته
> عودنا على التروي في التصريحات
> وعلى التروي قبل اصدار قرار او تنفيذه
> لذا لا نتوقع ان يسموا لنا المدرب الاجنبي بسرعه
> لكن كمان يا مجلسنا
> ما تخلوا العجين يخمر شديييييييييييد
> لانو لو خمر شديد
> ببقي مر وما بنقدر نهضمو
> ايها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> قلنا نربي اودلانا ونقتطع ليهم من زمنا لينا
> لقينا يا والينا
> ما في زمن لدينا
> لانو لو اقتطعنا من زمنا يا والينا
> الا يأكلونا وحته ما يفضلوا لينا
سلك كهربا
ننساك كيف والكلب قال يا نربي الجريوات يتأدبن ويموتن جوع.. يا نفتش ليهم عن كرته ويعيشن قليلات ادب.
والى لقاء.
سلك