من هو اليساري الخرونج ؟
من هو اليساري الخرونج ؟
هو شخص حاطط صورة ” جيفارا ” بروفايل بيكتشر .. بيشيرلنا طول اليوم صور أبيض وأسود للكفاح المسلح للثوار في أمريكا الجونبية ضد الديكتاتوريات هناك .. ويتكلم بكل فخر وإعتزاز عنهم وعن صمودهم وثوراتهم المسلحة ضد القمع والظلم وشايف إن دا حق أصيل للشعوب في مقاومة الديكتاتوريات .. ولكنه يرفض أي مظهر من مظاهر التظاهر بعد 30 يونيو .. وليل نهار يشيرلنا صور لمتظاهرين معاهم مولوتوف .. علشان يقول إنها مظاهرات غير سلمية وحشة وكخة أهيه .. ومن حق النظام إنه يقتلهم .
– من هو المتدين البأف ؟
هو إللي إنزعج جدا من تصريحات ” دونالد ترامب ” العنصرية .. وشايف إن دعوة المرشح الرئاسي بمنع دخول المسلمين بلادهم وإغلاق المساجد .. دعوة حقيرة وقذرة .. في نفس الوقت إللي هوا بيمارس نفس كل أنواع العنصرية ضد المختلفين معاه دينيا جوا مصر .. وبيصادر حقوقهم في حرية الإعتقاد وبناء دور عبادة .. وبيعمل من ” بنها ” كل ما يشوف أقباط بيسيبوا بيوتهم ويتهجروا برعاية الأمن في أي خنافة بربع جنية .
– من هو الليبرالي الكروديا ؟
هو إللي درس تاريخ دولة زي رواندا .. وعرف إنهم قتلوا من بعض في الحرب الأهلية أكتر من مليون بني أدم .. وتلاقيه بيحكيلنا بكل فخر تجربة المصالحة والتصالح هنا .. وإزاي ناس كانت وجهة نظرهم في الحياة هي قتل وإلغاء الأخر تماما .. قدروا يكملوا ويلاقوا صيغة يتعايشوا فيها مع بعض .. زي بالظبط ما حصل في جنوب أفريقيا وأمريكا ذات نفسها .. حروب أهلية وقتل وخراب .. لكن في النهاية الناس قدرت تتعايش وتلاقي عقد اجتماعي وديموقراطية نحتكم ليها .
لكنه في الحالة المصرية .. يصاب بالذعر والهسهس أول ما تقوله تنسيق أو حتسوية سياسية أو حتى صيغة للحياة مع الناس إللي مختلفين معاه فكريا .. تبقى فورا خاين وعميل وإخوان إذا لزم الأمر .
– من هو المهاجر الوسخ ؟
هو إللي بينعم في أوربا أو امريكا بكل أنواع الحرية والكرامة الإنسانية .. بيتمتع بكل حقوقه في التظاهر والإنتخاب والتعبير عن رأية .. لكن أول ما يبقى الأمر يتعلق بمصر .. تلاقيه يقف قدام السفارة يترقص دعما للديكتاتور ويفضل يقنع الناس في أهمية الحكم العسكري وقوانين التظاهر والطوارئ .
محمود حجازي
