كتابة (الشعر) على طريقة (كورة) بلة جابر

بقبق (شويقاتك) حِبن…
دفق (وصيفاتك) حِرن…
ما كان تعشم بالظهور…
محجوزة في عُقر السجن…
مكتوبة في اخر السطور…
اقدارنا لا تلين لا تحِن…
كمل حزيناتك هناك..
بي اشواقنا ما ترجع تمِن…
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الخيل الحرة بتجي في (اللفة) او في (الشنقيطي).
اخوك لو بقى (عسل)..ما تقول ليه فك لينا (الوك).
(كفاية) العملوه ليكم في الموسم الماضي ..ناس اسامة عطا المنان ما فاضل ليهم إلّا يوزعوا ليكم (فراخ).
ناس المريخ دخلوا مباراة الامل الاخيرة وهم بيحملوا لافتات كتبوا فيها (كفاية) ..وطالبوا باطلاق سراح الوك.
تقول (الوك) دا معتقل في (كوبر).
انا قلت ناس الجامعة العربية ديل الجابهم الاستاد شنو؟.
شعارات الجامعة العربية بقوا يعملوها لينا في الاستاد.
الايامات دي ناس المريخ بقوا بتاعين (شعارات) ساكت.
قايمين ليهم في (حنكشة) – نحن من الله خلقنا ما شفناها في البلد دي.
مرة يلبسوا في (الكمامات) ومرة يرفعوا في شعارات (كفاية).
خلوا القضية الفلسطينية.
وحلايب.
وانفصال الجنوب.
ومسكوا لينا في (الشعارات) حقتهم دي.
الجنيد تاني بدل ما يقعد يشجع ويدق طبلتو ..اتوقع في المباراة القادمة يعمل ليكم (ركن نقاش).
البيتو من قزاز ..احسن يشوف ليه (شقة) يرحل ليها.
عينك في الفيل …وتضرب في (الطحنية).
طبعا (الطحنية) ما عندها علاقة بالموضوع.
لا من قريب ولا بعيد.
بيت ابوك لو خرب ..ارفع الدعم عن الغاز.
القرد في عين امو (مهند)…بتاع مسلسل نور.
الخيل تجقلب ..والشكر للناس البنقلوا لينا الكورة.
الما عندو كبير ..يعينوا ليه لجنة تسيير.
الفي ايدو القلم …ما بكتب ليه شيك بدون رصيد.
اتنين لو قالوا ليك رأسك ما فيك …(اشطبو) في التسجيلات القادمة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
لو دخلوك في امتحان – وقالوا ليك اكتب لينا قصيدة على طريقة كورة بلة جابر .. ح تكتب شنو؟.
صبت مطرة..
جات نازلة…
الشارع قفل..
دي (قصيدة)…زي كورة بلة جابر.
ما اكتب ليكم اكتر من كدا ..دا شعر قدر كورة بلة جابر.
قالوا ليك في واحد تعب شديد.
تعب مبالغ فيه.
ناس الحلة قالوا الزول دا بدل ما يموت لينا هنا ويشيلوا حالنا ساكت ..احسن نوديه المستشفى ..لو عاوز يموت ..يموت لينا هناك ..قدام الدكاترة.
الجماعة اتلملموا وشافوا ليهم (لوري) ومشوا على المستشفى.
الدكتور قابلهم ليك في الباب.
دخلوا ليك (المريض) للدكتور طوالي.
الدكتور عاين ليه كدا – قرب يقول ليهم الزول دا ميت منذ (40) دقيقة ..لكن اتراجع ..قال احسن يصبرهم شوية.
يمشى معاهم خطوة – خطوة.
الدكتور مسك ليك ايد المريض ..قال ليه ..نحن ح نشيل ليك (الطوحال).
المريض فتح عينو ..وقال ليه (الطوحال) شالوه.
الدكتور اتحرج في الدنيا دي جنس احراج.
قال ليه نحن ح نشيل ليك (المرارة).
المريض قال ليه ..(المرارة) شالوها.
الدكتور ما عرف يعمل شنو؟.
مسك ايدو التانية ..قال ليه ح نشيل ليك (الزايدة).
المريض قام ليك من النقالة ..وقال ليه الزايدة شالوها.
الدكتور بقى اقل من السمسمة.
قال ليه خلاص ح نشيل ليك (اللوز).
المريض قال ليه ..اللوز شالوها.
قال ليه : نشيل ليك جزء من المعدة.
قال ليه شالوها.
الدكتور وقف ليك على حيلو ..وقال لي اهلو ..انتوا الزول دا قبل ما تجيبوه لينا هنا كان وين؟.
الاهل كلهم بي صوت واحد قالوا ليه كان في (المحلية).
الدكتور قال ليهم طيب يا جماعة ناس المحلية ديل (مصران) ساكت ما يخلوا لينا عشان نشتغل عليه!!.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
ما عاوز اقول ليكم اكتبوا لينا شعر زي كورة علي جعفر – عشان ما تشخبطوا لينا ساكت.
شخلم…
كحلم…
تلومل..
ح اخليكم مع (بلة جابر)…عاوزين (شعر) زي كورتو.
اتلفحت شمس الصباح …
طلعت على البنوت شعاش…
كسرت ضلع..
والتاني خش على الصداع..
قابلتك قصيدة زي (الكورة) دي.
عشان ما تعتبروا الموضوع مخارجة.
وكباري ساكت..
الليلة الهلال عندو مباراة في كوستى.
الروعة ح تكون حاضرة عصرا.
مريخ كوستي عايش على انه هزم الاهلي شندي برباعية.
زي كأنو اهلي شندي مقاس.
تغلبوا اهلي شندي اربعة.
سبعة.
عشرة.
الهلال فهمو براهو ..وعندو رأي مختلف.
نحن بنغلب عديل كدا.
لا بنلبس لينا (كمامات).
ولا عاوزين لينا (ضربة جزاء).
كوستى الليلة كلها حاضرة في (عصراوي) الهلال.
تعالوا شوفوا الشيخ موكورو الايامات دي عندو (جنية) كروية كدا.
يمسك ليك الكورة (يرقص) الملعب كلو.
ذكرتونا حفلات حنان بلو بلو زمان.
اي (باك) يقابلوا الشيخ موكورو بيعمل ليه (اللول اللول اللولية).
الملعب كلو بيرقص.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
عندنا حارس مرمى ما شاءالله عليه …(اسد).
الله يغطي عليه.
ما عاوزين نتكلم عن (مكسيم) كتير.
خلونا في عمار الدمازين.
الليلة يا ربي في طلعة جوية كدا ما يجيب ليه قون.
الليلة زي عمار الدمازين ح يسجل.
يجيب ليه قون عديل كدا.
عشان كدا يا عمار الدمازين جهز (شعورك) للهدف.
عندك قون.
غير الاقوان التانية.
طارق العشري الليلة ح يظهر في (الخط).
ح تشوفوا (السبحة).
والسجدة.
والنضارة السوداء.
شغل شغل علماء.
لكن دا برضو ما خلينا ما نقول الاطاحة بـ (كافالي) غلط.
انتوا جايبين ليكم (فرامي) – عشان تطيحوا بيه بالصورة دي.
خلونا هسع مع طارق العشري.
كوستي محظوظة …ح تستقبل الهلال بعد ان غاب عن جماهيره (9) يوم.
من مباراة الرابطة كوستي ..تاني ما شفنا (الهلال).
الليلة باذن الله وتوفيقه الهلال ح يهل (عصرا).
ان شاءالله من الدقيقة الخامسة.
احسموا لينا الموضوع دا من بدري.
عندنا اعمدة عاوزين نكتبها.
الكهربة ما مضمونة.
عشان كدا من الدقيقة الخامسة …خلونا نرسل (العمود).
ونشوف لينا موضوع تاني.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………
و
نخشي على الهلال من التحكيم.
الكمامات دي عاملة شغل عجيب للمريخ.
حذاري من الكرت الاحمر.
ومن ضربة الجزاء.
ممكن يكون الحكم واقف ليكم على الواحدة.
ما تعطوا الحكم اي فرصة.
مريخ كوستي يفقد عددا من عناصره الاساسية.
العبوا بهدوء.
ومن غير انفعال.
الهلال مقبل على المنافسة الافريقية.
عشان كدا ختوا الكورة في الواطة.
وما بتجيكم ان شاءالله اي عوجة.
وبكرة نتلاقى باذن الله في هذه المساحة بـ (فرحة) قدر كدا -.
ابقوا واثقين.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………..
السيدة (ل) – جداول الضرب ..الايامات دي جايبة ليها (موية).
وقرّط على كدا.