بابكر سلك

وا حلاتي يا ولاء الدين


> هل صحيح أن ولاء الدين الهلال هو ولاء الدين موسى يعقوب؟
> وهل صحيح أنه من مواليد 89 حسبما ورد على صفحات التواصل الاجتماعي؟
> وهل صحيح أنه مقيد بكشوفات الهلال على أساس إنو من مواليد 2000؟
> يعني عمرو سطاشر سنة؟
> يعني لعب في أهلي مدني بالبزة؟
> يعني لسه ما حصل عمر الزهور عمر الغرام عمر المنى تسعطاشر سنة؟
> يعني أصغر من ولد فطومة اختي؟؟
> يعني ولاء الدين أصغر من بشار يا روشا؟؟
> معقولة زول دفعة بشار الاسد تسجلوهوا دفعة بشار الولد؟؟
> قلت لي الهلال يحذر الدولة من استخراج رقم وطني لي ألوك؟
> فعلاً نادي الحركة الوطنية والتربية يا خالدونا
> نادي يشيل من عمر لاعب حداشر سنة تاني فضل ليهو شنو؟
نادي يغير اتنين لي اطناشر بحركة وطنية قردية تاني البصعب عليهو شنو؟؟؟
> وا حلاتي يا بشار
> أقصد يا ولاء الدين
> اذا صالح سنار سنونو وقعن وهو تحت السن بكشف الهلال
> يبقى ولاء الدين بشار عمرو سطاشر سنة
> السطاشر ذاتها ما قفلها
> كيف بالله نتقدم ونحن نلعب باعمار اللاعبين بالطريقة دي
> كان ما أخاف الكضب
> ولاء الدين أكبر من الإنقاذ
> واتنقذي
> المهم
> شفنا صورة كابو على صفحات التواصل ومعها خبر الزواج
> قلنا طالما فاتنا الكشف النلحق الكشف
> لقينا الخبر كاميرا خفية
> لكن حقو تعملها يا كابو
> الزواج لابد منو
> مسؤول من الخير يا كابو
> دحين ولاء الدين ما قرا معاك؟؟
> أيها الناس
> تمضي الأيام بسرعة
> وإعدادنا للمباراة الإفريقية ما قدر المرحلة
> اذا كان المال لا يسعفنا لمعسكر خارجي
> يبقى المعسكر الداخلي المنضبط هو الحل
> خلوا باب المعسكر فاتح
> والراجل يشيل رجلو يمرق
> إنها الحرب
> ومن أراد أن يشق الصفوف
> يتحمل تبعات خيانته للمريخ الوطن
> كبار وعارفين كلو شيء
> مافي داعي للغطغطة والسكسكة
> الماقدر المرحلة يقعد في بيتم
> كبار وما صدر ولاء الدين
> لا دايرين بزة ولا محتاجين لزة
> المهم
> أقطاب المريخ سجلوا غياباً محبطاً في ساحات الدعم
> ويفترض على المجلس أن يوضح للملأ منو من الأقطاب اعتذر
> ومنو الدفع على مضض
> ومنو الأعطي عطية مزين
> ومنو الزاغ
> الشفوت دايرين يعرفوا
> أيها الناس
> اذا قامت جمعية عمومية وترشح الوالي
> الدنيا كلها بتترشح لدخول مجلس الوالي
> واذا قامت ولم يترشح الوالي
> نصاب المرشحين ما بكتمل
> ونبقى فرطنا في الدقوا صدورهم ديل
> أعقلوها يا ناس وبطلوا حفر
> فمن الأسباب التي أجبرت جمال على الابتعاد أكتر من تلاتة مرات النمل ديل
> النمل بتلم حول صحن العسل
> يلحس بس
> ولما الصحن يترفع
> يدوش النمل
> لايفقد الأمل في عودة صحن العسل
> لكن لما يلقى العسل خلاس ببح
> بفرتق ويشوف ليهو عسلاً في مكان تاني يلحس منو
> طالما ربنا فكانا من النمل
> حقو نحافظ على جمكسيننا الطرد النمل
> أيها الناس
> العمل باحترافية يستوجب أن يكون لدينا مكتب تنفيذي على قدر كبير من الحرفية
> على الأقل مكتب يحفظ أسرار الكيان ومداولات المجلس
> فالمكتب التنفيذي الخشمو خفيف مخيف
> أيها الناس
> الكيان أكبر من أي إنسان مهما كان
> والبشوف نفسو أكبر من الكيان يبقى غلطان غلطان
> والتاريخ الذي يحفظ الأشياء الجميلة
> يحفظ ايضاً الاشياء الأخرى
> وعدما ينادي الكيان تنفرز الكيمان
> لبيك يا وطني
> عبارة تنطلق من حنايا أصحاب العشق حد الأدمان
> خليهم يطيروا بتكون عبارة أصحاب المصالح حتي ولو كانت تضر الكيان
> ها هي صرخة يطلقها الكيان
> حدد كومك يا مان
> قلت لي ولاء الدين عمرو سطاشر يا روشا؟؟
> طيب برجو شنو؟؟
> الحمل برضو؟؟
> أيها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> واحد في حلتنا قسم الصابونة لينا
> الحلة كلها قامت تزغرد يا والينا
> القسمة بت موسى وريا وسكينة
> بنوتنا الصغار اليادوبك تاتن لينا
> والرجال يهزوا ويعرضوا يا والينا
> الحكامات يغنن للزول القسم الصابونة لينا
> يقولن يا والينا
> جيت لينا جيت لينا ود المحينة رجعنا للزمن الجميل وقسم الصابونة لينا
سلك كهربا
ننساك كيف والكلب لما سمع بالزمن الجميل هزا ضنبو ولفّ الحلة كلها لا خلى لستك ولاعمود لا جزمة واقعة ولا ردا
والي لقاء
سلك