فطومة من تردح بقت تمدح

> استمتع جداً بحروف فطومة اختي
> من الفاء وحتي الياء المعرجة
> حروفها تكشف حال الهلال
> وتوضح ما يدور بخلدهم
> فطومة عودتنا انها تردح
> من كانت صغيرة دي طريقتها
> امس بقت تمدح
> اول مرة تمدح زول غير كردنة
> ختت طار كردنة وشالت طار سيدي الحسين وبقت تمدح في الاعلامي المصري اديب
> كتبت عن حكمة اديب
> وعن اعفاء وزير العدل المصري
> الغريبة برغم انها جابت سيرة وزير العدل المصري اغفلت الحديث عن وزير العدل السوداني
> الشعب كلو داير يعرف قرار وزير العدل السوداني حول الدكاكين الملحقة بسور استاد ونادي الهلال
> كنا دايرين نعرف كلام وزير العدل بتاعنا في الموضوع ده
> وهل كان قراره انو تلك الدكاكين مبانٍ خاصة وبالتالي يختص القانون المدني في ما يتعلق بإخلائها
> ام هي مبانٍ عامة يتم إخلائها بالطرق الاخرى المحددة لذلك؟
> يا فطومة قولي لينا فهمينا الحتة دي
> وهل تم اخلاء تلك الدكاكين فعلاً؟
> إن كانت الإجابة بنعم
> كيف وبموجب شنو واخلاها منو؟
> فنحن من نفر يثق تماماً بأن دولتنا دولة قانون لا دولة بوليسية
> ودولتنا تحترم القانون قبل أن يحترمه المواطن
> لذلك دولتنا دولة محترمة جداً
> بس فهمينا الحصل في الحتة دي شنو وقولي لينا
> المهم
> سجلت فطومة اعجابها بالإعلامي المصري أديب
> واكتر حاجة عجبتها في أديب جملته الشهيرة
> هيا الناس دي عايزة ايه بالضبط
> الناس دي عايزة جوية بأي تمن يا فطومة يا اختي
> الموضوع ما داير ليهو درس عصر
> بطولة افريقية جوية زي بتاعت المريخ يا فطومة
> فشعبكم يا فطومة لاداير كسكتة ولاداير جوهرة
> داير بطولة قبل يمشي المقبرة
> بمناسبة المقبرة يا فطومة
> قصة اخلاء الدكاكين دي ماتنسيها
> ورينا بي ياتو قانون حا يتم التعامل مع المستأجرين اصحاب حق الانتفاع والبسأل الله من حقهم وحقوقهم في الدنيا قبل الآخرة
> طبعاً كل القوانين ليها تكييفها مع أية حالة يختلف حولها أصحاب مصالح
> إلا قانون الغاب
> نحمد الله بلدنا غابة ما فيها
> سهلة ودلجة كان وقعت منك إبرة بتظهر فيها
> الحتة دي ضروري تكلمينا عنها بأدب وبإعجابك بأديب
> واوديب
> او ديب دي طبعاً يعني او ذئاب
> نحنا موش برضك غلبنا الذئاب في بلدها؟
> طيب
> هيا الناس دي عايزه أيه بالضبط؟
> ايها الناس
> لايفوتكم
> فطومة اختي ختت تشكيلة الهلال لمباراة العودة
> قالت الثعلب يلعب
> ورينا شخصيتك يا عشري
> ولعلمك
> العشرة الباقين في التشكيلة يا عشري فطومة جهزتهم
> لو في شطارة يا عشري رف الثعلب
> وصديقي مبارك اب شنب
> الشنب في ولا يا حليلو والثعلب يلعب!
> سيدا
> الثعلب كييييف؟ اوامر عليا قلت لي
> المهم
> مشينا نيجيريا تعارف عقدوا لينا
> وعصرونا في حكاية العرس
> قالوا لينا العرس السبت الجاي
> عشان كده حقو نوقف القيدومات ونجهز للعرس الكبير
> عشان يوم الحفلة ما نطلع مسخرة
> عشان اهل العروس مايقولوا عريسكم ما بستاهل
> نحنا عريسنا زينة
> ويستاهل شاكيرا ذاتها
> لكن برضو العقد ما كفاية
> لازم نكمل العرس
> ونتجرتق
> ونمشي لي قدام
> يغنن لينا ناس فطومة
> ياعديلة
> وسيروا وفرحت امو
> وتلاتة ارادب عشا
> وعريسنا الفوقو محرية جابها بالطيارة الجوية
> ايها الشفوت
> دعوة من البصري مدير النادي المكلف
> لجنة التسيير تدعوكم جميعاً
> قروبات وروابط وجميع الاولتراسات
> وفرادى
> تدعوكم جميعاً لنعد العدة نرهب بها عدونا
> وعدو الانجاز والاعجاز
> خصصوا غرفة لهذا الموضوع
> دايرين نملي العين قبل الاستاد
> انتصرنا خارج الارض
> لان كل الارض ارض لنا
> انتصرنا بعيداً عن جمهورنا
> لان جمهور المريخ حاضر في اي زمان اي مكان
> يبقى في ارضنا
> غيرنا من يزرع ارضنا
> يبقى وسط أهلنا
> غيرنا مين يستر عرضنا
> اذن.. كلنا حضور بدار النادي
> والشفت مابوصوهوا
> ايها الناس
> يستمر الانجاز في تجديد نادينا
> فبعد أن كان نادينا بنادينا
> اصبح نادينا بفخر بينا
> وتوتا والتومات يزغردن لينا
> سعدية
> قولن جق
> والشفت عادل حسن علي بالسعودية
> يعلن دعمه لنفرة النادي بألف ريال سعودي
> ريال ينطح عقال
> ولسه القطر بشيل كتير
> اركب معنا
> قبل القطر يفوتك
> ايها الناس
> أبيكو نمرة اتنين وعشرين
> يعد بمزيد من الاهداف في الشبكة الاقرب
> الزول ده ودوهوا قدام يا روشا
> الزول ده خطير ومجنون اقوان
> بهمو القون لكن وين مامشكلتو
> خالد عز الدين
> احلى قون أبيكو ولا قون عبدو؟
> عليك الله
> احلى ياتو!!!
> ايها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> الموية بعد زدتوها لينا برضو أبت تجينا
> في محكمة ام درمان الشرعية خمسة يوم نقطة مانقطت لينا
> أسي ده وضع شرعي يا والينا؟
سلك كهربا
ننساك كيف والكلب لما سمع المحكمة الشرعية ما فيها موية قال ما تقول لي دي المقبلة على رئاسة المعتمدية؟!
والي لقاء
سلك