حلمان الهلال غلب حداشر

> تضامناً مع الاخوة الاهلة
> دعماً للروح الوطنية
> تفاعلاً مع الاحداث
> نقتسم الهم مع اخوتنا الاهلة ونبحث عن مدخل
> الاخوة الاهلة يبحثون عن مدخل
> مدخل للبطولة الافريقية
> لأنهم الآن في خشم المخرج منها
> الخوف الليبيون يفعلوها ويخرجوا الماسورة من الماسورة كما فعلوها مع القذافي
> واحتار الاهلة كثيراً في الاجابة على سؤالين
> الاول احلى قون عبدو جابر ولا قون ابيكو
> مع العلم بانو القونين من عكسيات واتنفذن فيرست تايم جوه الشبكتين
> السؤال التاني
> احر قون عبدو جابر ولا قون ابيكو
> مع العلم بانو القونين كانا خارج الوطن
> لي اسي الاخوة الاهلة خاتين الورق وما عارفين الاجابة
> اقول ليك يا محمد عبد الماجد حاجة
> اكتب في ورقتك اجابة السؤال الاول اشن القرد
> واجابة السؤال التاني اطول الزرافة
> لكن يا خالد عز الدين عندك سؤال براك
> اصفر الشمس ولا الهلال؟
> للمساعدة اصفر من صفر وهو اقل عدد صحيح
> المهم تضامناً مع الاهلة شلنا الليل سقد
> نفكر في مدخل يولجوا به عبر بوابة التأهل للاستمرار في البطولة الافريقية
> ما قدرنا نساهر معاهم للصباح
> مالنا
> مصيبتنا شنو
> شخصياً نمت
> ولما نمت حلمت
> حلمان الهلال غلب الاهلي الليبي حداشر صفر
> صحيت فرحان جداً
> ما عشان ولد الودع بت
> ولا عشان التمساح في النوم ولد
> لكن فرحت للهلال
> فرحت لانو تفسير الحلم بالرجوع لابن سيرين بوضح بجلاء رؤية الرقم حداشر بتعني شنو
> اريت كل الشفوت يحلمون بالهلال غالب حداشر
> حداشر صفر
> هلالابي منطقي وواقعي قال لي الصفر بي جاي ولا بهناك؟
> قلت ليهو انا في الحلم ما كنت لابس النضاره
> انت رأيك شنو؟
> قال اينما يذكر الصفر يظهر الهلال
> قلت ليهو كلك نظر
> ايها الناس
> اعدادنا الجماهيري يمضي قدماً
> التحضيرات والتجهيزات على سنجة عشرة
> فقط ننشد الدخل الخرافي
> وإن تأخر البعض في الدعم
> حقو نعوض بدخل المباراة
> وعلى لجنة التسيير العمل على محاربة مافيا الدخل
> فليس من المعقول ان يكون الاستاد مقفل طابقين
> ويعلنوا لنا الدخل ستمية خمسة وسبعين وتلتلمية وتلطاشر
> الكسر ده لزوم غشنا بانو القصة دقيقة جداً
> اول مظاهر محاربة مافيا الدخل هو فتح جميع البوابات من بدري تجنباً للزحام البجيب شغل الليل
> وضع مراقبين من الشفوت على جميع البوابات
> ويا حبذا لو تنازل شفوت الولايات عن حقهم في متابعة المباراه تلفزيونياً من اجل ضمان ارتفاع الدخل وحضور الجماهير بمعدل ستين الف شفت داخل الاستاد
> انها تضحية من اجل الدعم الكبير
> ويا حبذا لو شفوت العاصمة قبلوا بالاسعار المرتفعة للتذاكر دعما للكيان الذي سيتمر منافساً على اللقب الافريقي ان شاء الله، وبالتالي يحتاج لاي قرش طاير
> الولايات تضحي بعدم المتابعة التلفزيونية
> والعاصمة تقبل سعر التذاكر المضاعف
> وكلو من اجل المريخ
> مع التزام المجلس بتسجيل المباراة وبثها بعد نهايتها مباشرة
> من اجل الزعيم كلو شيء يهون
> المهم
> فطومة اختي رافضة تفضفض وتفتي
> يا فطومة بوصفك ناطقة رسمية ومنسقة اعلامية ومعجبة جوهرية
> الدكاكين باي القوانين سوف يتم اخلاؤها يا اهل الحركة الوطنييييييية
> ايها الناس
> سمعنا عن بعثة سافرت بدون طبيب «وما خسانا»
> سمعنا عن بعثة سافرت بدون احذية مطر «وما خسانا»
> لكن ان نسمع بان بعثتنا من المطار كلو زول فرتق باتجاه براهو
> ان نسمع بأن تراوري وكوفي وجمال سالم جارين شنطهم لحدي محل سداد قروش الباركينج ويركبوا تكسي من هناك
> وعمر بخيت لو ما جاتو البرادو من طرفو كان ركب بصات الجريف
> هذا امر مخيف
> منتهى الاستهتار وعدم الدراية لو حصل
> وده طبعا اذا حصل بكون قصور مكتب تنفيذي
> ولكن اللائمة لن تعفي مجلس التسيير الذي لم يتكرم باعفاء مكتب تنفيذي قصوره فاقت حد الخيال والمعقول اذا حصل
> الحته دي حا نحكها شديد
> ولن نجامل مجلس التسيير حال تأكد لنا ما سمعناه
> بل لزاما علينا تمليك الجماهير الحقائق كاملة
> المهم
> فريق عمل التيفو يعمل بجد
> والقيادة العامة عقدت اجتماعها الاول حول الاعداد والاستعداد
> وقررت عمل صندوق تضع بداخله النيجيريين واعوانهم
> كل المرافعين
> ومن ثم عمل كمين كبير
> غزوة الكمين لإبادة الذئاب والمرافعين
> والشفوت بدون حدود يجودون بالروح والموجود
> نصراً من عندك يا معبود
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> الناس كلها بقت تفكر في عرس استثماري يعود بالنفع علينا
> ان شاء الله وشها اشنه مما لدينا
> ان شاء الله الصلعة الفيها تفوق في مساحاتها ما يلينا
> ان شاء الله السنون طقما مصنوع يعضينا
> ان شاء الله زرقااااااء يا والينا
> ووشها اصفر من رقبتها الافتح من كوعينا
> بس المهم تصرف علينا
> بنكلمك اذا لقينا يا والينا
سلك كهربا
ننساك كيف والكلب قال يا حليل زمن الكلبة واقفة عديلات الاربعة رجلينا وواقفات عديل اضنينا وتمشي الكوش وتجيب تصرف علينا… الجريو قال ليهو كوشة يعني شنو يا بابا!!!
والى لقاء.
سلك
بابكر سلك – (في السلك – صحيفة الإنتباهة)