بابكر سلك

صامولتكم فكت


> خطاب كردنة وحواره بالنيل الازرق مازال حديث المدينة
> ناس روشا فسروهو فلسفة
> فطومة خجلت شويه وقالت الرجل تحدث ببساطة عشان الكلام من القلب يدخل القلب
> قلب بالقا؟
> زول دور السطاشر ما دخلو
> قلب شنو البخشو يا ختي
> لكن ما وريتونا يا فطومة ويا روشا
> قصة صواميلكم الفاكه دي شنو؟
> طول عمري اقول الناس ديل مالهم
> اتاريكم صواميلكم فاكه
> والحته دي ثابتة بي كلام رئيسكم
> رئيس جد جد ما لعب
> انتوا قايلنو لعب
> ما لعب
> رئيس جد جد
> والصواميل شدة ما بقت حديث الساعة عند الاهلة
> قالوا اتصلوا على صواميل ايتو زي ما قال مزمل
> واتمصولي
> كردنة قال الفين وسبعطاشر بلعبوا نهائي
> والمتتبع لمسيرة الهلال يجد ان جملة كردنة ناقصة حرفين
> ادخل حرفين علي جملة كردنة تعرف الحقيقة
> للتذكير الجملة هي
> سنة الفين وسبعطاشر الهلال حا يلعب نهائي
> وعشان ما تتعبوا احلها ليكم انا
> ادخل «ما» على جملة كردنه اعلاه تعرف الحقيقه
> الاجابة ممكن تكون واحدة من الاجابات ادناه
> ما سنة الفين وسبعطاشر الهلال حا يلعب نهائي «تطولوا وتاخدوا مدة»
> سنة ما الفين وسبعطاشر الهلال حا يلعب نهائي «برضك فيها طوله»
> سنة الفين ما وسبعطاشر الهلال حا يلعب نهائي «ممكن تكون الفين وسبعه واربعين»
> سنة الفين وسبعطاشر ما الهلال حايلعب نهائي «اكيد المريخ وفريق تاني»
> سنة الفين وسبعطاشر الهلال ما حايلعب نهائي «ودي عندها معنيين الاول قريب غير المراد وهو ما بلعب المباراة النهائية والتاني بعيد وهو المراد وهو ان الهلال ما بلعب كلو كلو… نهائي هنا بمعني كلوكلو ومع الصواميل البتفك دي المعنى ده وارد»
> سنة الفين وسبعطاشر الهلال حايلعب ما نهائي «ودي معناها بلعب لكن بطير بدري بدري زي ما عملها السنه دي»
>اختاروا يا روشا التفسير البريحكم لعبارة كردنه اعلاه
> نحنا كل التفاسير عاجبانا
> ايها الناس
> كيف نتخطي سطيف؟
> الاجابة ساهلة جداً
> نتكاتف ونصفي النية
> نحرس القيف بالوردية
> لا بحراً يفيض يغرق البلد الابية
> لا تمساح يغدر بي سخلة البنية
> نوحد الصفوف وتتلاقى القلوب وتتساوي الكتوف
> مليون سطيف يطيرن
> لكن مع الحفر وخيانة الكيان بنتعب شويه
> بس الخائن الله بخونو
> ونحنا بنخونو
> وينكشف امرو وتمرق كلمات الحقائق بي فرقات سنونو
> ايها الناس
> اعجبني ما سطره الرائع محمود الدرديري في زاويته المقروءة علي صفحات اشرف الاصدارات بالأمس
> تناول الدرديري الناس اليومها كلو بتقضيهو في نقد التسيير ومعايرتها بالفلس
> وتدوير قصة الاجانب ما شالوا حقوقهم
> والوطنيين عندهم حق في تصرف يتصرفوهو طالما عندهم حق ما صرفوهو
> شخصياً ارى ان مصعب مثلاً في تصرفه الشهير داك
> ارى ان مصعب عندو حق لكن ماليهو حق
> نرجع للدرديري
> محمود سأل الناس البنتقد يومي دي
> قبل ما تجي التسيير كانت بتسكت على اشياء مماثلة، بل وتضيف بأن الوقت غير مناسب لمثل هكذا انتقادات.
> فلماذا لم تعد نفس الاقلام لسيرتها الاولى في عدم مناسبة الوقت للنقد؟
> هل هو الكيل بمكيالين ام هو الولاء للاشخاص اكثر من الانتماء للكيان؟
> محاضرة قدمها الدرديري علها تجعل البعض يخجل شويه ويعود للارشيف ليقارن ما قاله زمان في مسألة محددة مع ما يريد ان يدشه في حق التسيير
> بارك الله فيك يا درديري
> وبمناسبة عمود درديري على صفحات المريخ
> خرجت جميله وعملاقه
> يمكن في مرحله كان الشفوت بشتروها لو ما يقروها دعماً للكيان
> لكن المتصفح لها الآن يجدها رائعة تصميماً وموضوعاً وقوية في الدفاع عن الكيان ومؤدبة جداً
> التحايا للربان احمد محمد الحسن والرائع اسماعيل حسن وياسر المنا وصديقي شلبي، وكل اركان حرب العمل في اشرف الاصدارات.
> بس الملفت للنظر شح الإعلان
> فرأس المال المريخي ان بخل في الدعم المباشر
> عليه ان يعلن عن عمله الخاص من خلال صحيفة المريخ
> ويضرب عصفورين بحجر
> منها يعلن في صحيفة واسعة الانتشار
> ومنها يضمن دعمه للنادي مباشرة
> اها
> النعامة ما لمت الجري والطيران
> الهلال لماهن الاتنين
> جري كورة ليبيا كلها وطار
> طياره بس
> اسي الطياره موش بتجري شدييييييد حتي تطير
> اها ده العملتو النعامة
> اقصد ده العملو الهلال
> وشيخ موكورو جاهو دورو
> فضل ايشيا ومكسيم واتير وجمعة
> الهلال اظنو قرر يبعد الاتحاد الافريقي
> كردنة ده بالطريقه دي بجيب ليكم الانفصال يا خالدونا
> شخصياً سمعت بانو في ايدي خفية بتفك في صواميل الهلال ذاتو
> يعني ممكن الصباح فطومة تصحى تلقي مافي هلال
> تفطري طوالي يا اختي وتقشري وتشوفي ليك خرطوم وطني ولا أمير بحراوي وتواصلي
> فطومة عاجبة الاهلة احتمال
> عجوبة
> الخوف من العملتو عجوبة في سوبا يا روشا
> المهم
> عندنا جارنا بتاع بحر هلالابي والجن
> اظنو كان جاي من البحر حضر لقاء كردنة في النيل الازرق في تلفزيون الحلاق
> بعد اللقاء ماشي في الشارع وينضم براهو
> جلي وتيلان يا كالدنان؟
> ملقتونا بله المنظومه وتتكلموا كمان يا فتومه؟
> ايها الناس
> كلنا على قلب رجل واحد مع الزعيم
> بنية صافية واكتمال العافية وحسم المافيا
> ونتخطى سطيف وستين سطيف كمان
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> زمان اهلنا كانوا بخافوا علينا
> ما تمشوا الزلط يا شفع .. هكذا بقولوا لينا
> اسي بعد الدية الجديدة دي يا والينا
> ما تستبعد الابو يخت اولادو في نص الزلط يا والينا
> العربية لو قرضت ليهو تلاته من السبعة الفينا
> ببقى ملياردير في يومو قبل رفع الفراش يا والينا
> وصية للشفع تامر وسامر وحماده وريهام وامنيه وامينه
> جمب الزلط فكوا يد ابهاتكم لأنها عليكم بقت ما امينة
سلك كهربا
ننساك كيف والكلب قال والله قيموكم.. زمان العربية تطقك كلب ومات وغلطان المرحوم… اسي المرحوم ممكن يدخل عنية تحت العربية ويموت ليك قصد
وإلى لقاء.
سلك
بابكر سلك – (في السلك – صحيفة الإنتباهة)