قرعة المجموعات متين ياروشا

> نعمل بجد واجتهاد للوصول للمجموعات
> وغيرنا يعمل نايم
> والرتينة البقت سمعنا تحت تحت حايغيروها بألمانية
> وقالوا الالماني جاي معاها
> عشان يعرف منو البطفي النور
> فالكشافات الحالية طفوها
> كردنة ماعرف منو الطفا النور
> لكن عرف منو الفكة الصامولة
> فطومة قولي للالمان جيبوا لينا كشافات لحام بدون صواميل
> قولي ليهم في ناس بفكوا الصامولة وببوظوا الكورة
> ايها الناس
> العجلة في اللحاق بالمريخ هي البتجيب الوقعان وزليط الركب
> الاهلة دايرين يلحقونا جوياً
> فكانت الفنقلة فوق للصفر الكبير سنوية
> دايرين يلحقونا معمارياً
> فكانت الرتاين والضعف البائن في الاضاءة وجابت ليها فكفيك صواميل كمان
> ولو ماسبتوا المريخ في حالو يا روشا
> حايكون الفشل حليفكم
> فالتفكير في تحطيم المريخ وتبخيس الانجازات
> هو السبب الاساسي الخاليكم جالسين
> جالسين القرفصاء فوق الصفر الكبير
> ايها الناس
> ما قامت به قروبات المريخ قليل من كثير
> ولثقتنا في الشفوت كنا ننادي من قبل سنتين بتفعيل القروبات من أجل الدعم
> واجتمعنا منذ ذلك الحين بالكثير من القروبات
> ولمسنا الجدية والاستعداد
> ودعم القروبات يجب أن يستمر شهرياً
> وعيب الزاد ما بعيب سيدو
> اي زول حسب استطاعتو
> وايد على ايد بتجدع بعيد
> ونستطيع بأيدينا أن نجدع الزعيم على منصات التتويج براااااااحة
> ودعم القروبات المطلوب ليس الدعم المادي فقط،
> بل الدعم الفكري مطلوب لنتعاون في حكم أنفسنا
> والدعم المعنوي اكيد مطلوب
> وكذلك الدعم الإعلامي
> فالقروبات وسيلة إعلامية سريعة وأعلانية ناجحة
> تشرفنا ياشفوت
> وشرفتوا الزعيم
> لدرجة أن أهل المعسكر الآخر
> وعلى صفحاتهم الشخصية يضربون بكم المثل لشعوبهم
> انتم القدوة
> ايها الناس
> قريباً سترى الكلادن على حوائط النادي يتلألأ مفتخراً
> إنهم الشفوت
> قريباً ستشاهدون اعمال تأهيل المسرح ووضعه في صورة تعجبنا وتمكننا من تفعيل الموسم الثقافي من على خشبة مسرح الزعيم
> ويا حبذا لو سميناهو مسرح خورشيد
> أحياءً لذكرى الرائع إسماعيل خورشيد
> وياريت يكون في الافتتاح مكي سنادة وعلي مهدي ومحمد شريف علي وسيد جرسة والرائع محمد الامين وابو عركي وذكرى الحوت وأولاد الصادق وحرم النور والكابلي يومها يجي من أمريكا وغيرهم فكلهم أهل للإبداع وحمر شديد
> وهل يوجد إبداع بعيد عن المريخ؟
> أيها الناس
> التزمت القروبات بحافز التأهل للمجموعات
> شدوا حيلكم يا أولاد
> فوعد الحر دين عليه
> المهم..
> كلنا مع المريخ وحوله
> المرحلة حرجة
> ولجنة التسيير تنوي الرحيل
> إن شاء الله يكون التأهل للمجموعات تكريماً لها
> واذا عاد جمال
> يجب أن يجد المريخ في المجموعات
> فلو خرج المريخ لا أظن أن هناك حافزاً لجمال كي يعود
> فهمتوني؟!!
> جمال نعمل بيهو شنو في،المحلي؟؟؟
> يعني جمال يقعد زي الكاردينال سنة كاملة سااااي؟
> ولذا ولذلك ولكل ذلك العندو آلة حفر يرميها
> المريخ مافي وكت حفر
> وسنتمرد مهما كانت الظروف على الواقع أياً كانت
> ليسطر التاريخ إنجازاً لنا
> مجاني صعدنا للمجموعات
> أيها الناس
> الهلال شال تارو من الأهلي
> مبروك
> المهم الأهلي
> لايهمنا الأهلي الليبي الأهلي السوداني أهلي وأصحابي
> المهم الأهلي
> وعلى الأهله تكريم كردنة على هذا الإنجاز
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> صينية الأربعين شالوها لينا
> بقت لا صينية في البيت
> لا صينية في الشارع يا والينا
> كترتوا الكباري وقللتوا الصواني
> الكباري هي الكملت الصواني علينا
سلك كهربا
ننساك كيف والكلب قال للجريو كنا زمان قاعدين حول صينية أسي بقينا لافين صينية بدون صينية ومحلها كبري اتعمل فينا
والي لقاء
سلك