(فانلة) المريخ امس من (الاعلانات) كانت زي صحيفة (الوسيط)

في حقيقة الامر ..المريخ امس ما افتقد جمال الوالي.
على قول معتصم محمود – صحيح لو جمال الوالي كان موجود في المريخ امس كان ح يكون عنده (7) ضربات جزاء.
(7) ضربات جزاء على الاقل.
هسع في زول جاب سيرة (الوحدات).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
بكري المدينة لو وقع في (غرفة اللاعبين) لو جمال الوالي موجود ..الحكم ممكن يحسب ليه ضربة جزاء.
وتراوري لو (شهق) ساكت ..كرت اصفر للاعب وفاق سطيف.
الحكم عملها في مباراة الترجي التونسي في وجود جمال الوالي…احسب ليه (ضربة جزاء) في كتاب مطالعة سنة رابعة ما بيحسبوها.
اسامة ونسى ثقافة (ضربات الجزاء) إلى الآن ما وصلته.
ما عندو خبرة.
وناس ابوجريشة ما مرروا ليه سر اللعبة.
لو جمال الوالي رئيسا للمريخ كان وفاق سطيف على الاقل طرد منه لاعبين.
الفيلم دا شفناه قبل كدا.
مع ذلك فاني اجزم ان المريخ امس افتقد حقا (اعلام الهلال).
الناس ديل والله نحن القاعدين نحمسهم ..وقاعدين نحفشهم.
قاعدين نفخهم ساكت.
ناس علي جعفر ديل لو خليناهم على اعلام المريخ برفعوهم السماء.
وعلي جعفر حسب كورتو الشوية دي – ممكن يصدق.
يتشوبح في الملعب متل السايق ليه بانطون.
تتخيلوا معلق المباراة امس قال شنو؟.
معلق المباراة امس في قناة الملاعب الرياضية – قال ان علي جعفر هو (بيكيه) المريخ.
يا راجل.
تتخيلوا.
انتوا لقيتوا اعلام الهلال مشغول بي فريقه الايامات الماضية ..وقمتوا نفختوا في (علي جعفر) لمن بقيتو (بيكيه).
فى نفخ قابلكم بالصورة دي.
يمين – (شاكيرا) تسمع حكاية تشبيه (علي جعفر) بي (بيكيه)…اول حاجة تطلب (الانفصال) من بيكيه.
تشيل (شنطة) وتمشي بيت ابوها.
ساعة ما بتقعد معاهو.
هي حصلت تشبهو ليها (بيكيه) بي (علي جعفر).
لا – لا – دي كبيرة والله.
تاني حاجة …(شاكيرا) ح تطلب من الولايات المتحدة الامريكية مضاعفة (العقوبات) على السودان.
علي جعفر شنو كمان؟.
الحمدلله قناة الملاعب الرياضية ما بتصل اسبانيا.
ولا بتفهم شاكيرا لغتنا دي.
لكن يمكن زول (هوا) كدا يوصل الكلام لي شاكيرا.
السودان خصومه كتار.
المعارضة لو سمعت الكلام دا – ممكن توصل الكلام دا لي (شاكيرا).
هسع في زول جاب سيرة (الوحدات).
العمود دا كلو فيه سيرة للسبعات.
تلميح ساكت للسبعات موجود في العمود دا.
ابدا.
ما تقعدوا تتخيلوا ليكم حاجات ما حقيقية.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الشهور الاخيرة ..جماعتكم شغالين حملات وكتابات في رفع الروح المعنوية لعلي جعفر.
اعلام المريخ عاوز يرجع (علي جعفر).
عاوزين يعيدوا صياغة علي جعفر من جديد.
اها من هسع بقول ليكم – علي جعفر دا في (الجزائر) – لو ما جاب ليكم (ابوالشهيق) بجيب ليكم (الرباط الصليبي).
علي جعفر شنو؟.
تنفخوا في علي جعفر ..لمن امير كمال بقى يجليها.
تقول شايل ليه صينية باسطة.
نحن طبعا وقت عرفنا المريخ سوف يواجه وفاق سطيف بعد خروج الهلال ..(لبدنا).
قلنا ما نتكلم في الموضوع.
نعمل فيها ما عارفين اي حاجة.
نصهين عديل كدا.
سكتم بكتم.
وهسع مباراة الرد في الجزائر ..اعملوا فيها رايحين.
ما تشتغلوا بيها.
خلونا في (مشاكلنا) دي.
خلونا في رقبتنا.
هسع في زول جاب سيرة (الوحدات).
براكم انتوا بتتخيلوا في حاجات انا ولا قلتها.
ولا جبت ليها سيرة.
سبعات شنو كمان!!.
انا قلت (سبعات).
لكن قطع شك ..علي جعفر دا في الجزائر بيرجع ليكم من هناك (رمضان حبني).
الشيء الطريف…امس قمصان المريخ كانت كلها (اعلانات).
الفانلة كانت زي (البورت) كلها اعلانات.
بكري المدينة ما فاضل ليه إلّا يطلع (فاصل اعلاني).
معقولة بس الفانلة بي الجهتين (اعلانات).
كم القميص.
الشورت.
كلها اعلانات.
والله ما فضل ليهم إلّا ينزلوا في الفانلة (اعلان امر قبض).
اونعي اليم.
وتهنئة بمناسبة النجاح.
بالله الفانلة بتاعة المريخ امس كانت زي صحيفة (الوسيط).
اعلانات ساكت.
الناس ديل ما فضل ليهم إلّا يكتبوا في فانلة المريخ (توجد وظائف شاغرة).
اتخيلتهم يكتبوا (منزل للبيع 4 غرف مع المنافع).
مجلس المريخ يكون قنع من (الكورة).
قال يقبلها اعلانات.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
اعلاناتكم دي ما تمشوا بيها الجزائر.
عشان نحن شامين لينا ريحة (سبعات).
هسع في زول جاب سيرة (الوحدات).
السبعة دي جاءت عرضا ساكت.
عموما كدا نحن لو عاوزين نحلل اداء لاعبي المريخ في مباراة الامس يمكن ان نجمله في الكلمات الاتية.
في السطور القادمة.
اولا جمال سالم ..واضح ان فترته في يوغندا ..كان بعيد فيها تماما عن (الكورة).
شكلو نسى الكورة.
امير كمال …لو ما الاعلانات الكتيرة الموجودة في ضهره – كنا سوف نحسبه لاعب في صفوف وفاق سطيف.
الشركات التى اعلنت في قميص امير كمال ..القروش مفروض تدفعها لفريق وفاق سطيف.
بخيت خميس – التجربة كانت كبيرة عليه ..الزول دا المباراة كلها مصنقع في (الكشافات).
عمر بخيت بعد كدا بقى يخصم من (تاريخه).
عمر بخيت ..مفروض يلحق نفسو ويعتزل.
خلاص …العداد صفر.
علاءالدين يوسف ..حتى الدقيقة 75 من عمر المباراة كنت بتفكر المريخ اعاد حاتم محمد أحمد لكشوفات المريخ مرة اخرى.
كوفي ..غارزيتو اصلو ما خاطيء عليك.
وكذلك اكرا.
بكري المدينة ..لو عندو (قروش) عند ناس المريخ يقنع منها.
كورتو دي مفروض يدفع عليها.
تراوري ..عاوز يعمل ليه حركة واحدة في المباراة وينوم على كدا.
الزول دا قالوا ليه الكورة ما (تمثيل).
مشاركة (ضفر) شكلت اضافة كبيرة لفريق وفاق سطيف…فهو افضل خدمة قدمها مدرب المريخ لوفاق سطيف.
مدرب المريخ الحقيقي (سوداني) ما بليجكي.
الشغل الشفناه في مباراة امس ..دا شغل (ابوجريشة)..ما شغل لوك.
الشيء المؤسف ما بدر من ابوجريشة وهو (يدفر) المدير الفني لوفاق سطيف ..في لقطة ما تشبه السودانيين.
يا ابوجريشة معقولة بس.
الاخطر من ذلك …او الاسوأ هو ما حدث في (المقصورة).
تفلتات واشتباكات..وحاجات تانية حاميني.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………
و
المريخ يمكن ان يتعرض لفضيحة في الجزائر.
الفضيحة اصلو ما فايتكم.
اسمعوا الكلام دا ..وابعدوا علي جعفر.
وامير كمال.
امير كمال ..تقيل ومع الجزائرين ديل بيشكل ليهم اضافة حقيقية.
ولغاية الآن – ما في زول جاب سيرة (الوحدات).
افهموها براكم.
واحسبوها.
مفروض المريخ يعمل ليه معسكر من الآن للكونفدرالية.
والكونفدرالية ذاتها عندكم فيها مباراتين فقط.
امير كمال نجم المباراة من جانب وفاق سطيف.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
……..
السيدة (ل) – اتقسم (الخوف) في الكلام …قلنا نسكت.
وقرّط على كدا.