رزية ونطاحة

> كعادتي مع الإنتباهة اكتب قبل مباراتنا المحلية
> فهي في مصاف الاعداد للاستحقاقات الافريقية
> هكذا نعتبرها ونتعامل معها
> وهذا هو الواقع
> وهكذا يتعامل اهلي شندي مع الدوري
> بقية فرق الممتاز بالنسبة ليها المباريات المحلية دي ساس وتاج راس
> بل تعتبرها فرصة للقاء جمهورها ومصالحة الزعلان منهم
> المهم اكتب قبل المباراة واتمناها تدريباً مفيداً وتمريناً مجدياً
> ايها الناس
> للعلم فقط
> ابو جريشة وعبد الرحمن ودكتور اسامة ومعتصم مالك وهمد
> باضافتهم للوالي والفريق طارق ومتوكل وحاتم عبد الغفار وصديق علي صالح، نكون قد احصينا المجلس السابق. لأن صمدو نفذ استقالته فعلاً واصراراً قبل فترة طويلة قبل ترجل المجلس طواعية واختياراً وباصرار عن صهوة جواد قيادة الزعيم
> طبعا لن ننسى حاتم محمد احمد عضو المجلس السابق ولجنة التسيير الحالية
> يبقى التسيير فيها ستة من فرسان المجلس المستقيل
> ادروب طبعاً نجم من نجوم المجلس السابق واكثرهم اصراراً على الاستقالة افتقدته لجنة التسيير
> يبقى نسأل الناس
> هل نجاح المجلس السابق سببه فقط الوالي والفريق طارق ومتوكل وادروب وصديق؟
> طيب خت الوالي بره القوس
> جوه القوس الفريق ومتوكل وادروب وصديق
> اذا كان الوالي عدد صحيح
> لازم الداخل القوس يكون عدد اكبر من صفر
> عشان حاصل ضرب المعادله يطلع رقم ما يطلع صفر
> فضرب اي رقم في صفر بساوي صفر
> ودي نظرية هلالية امها صفروز
> الهلال في صفر يساوي صفر
> المهم ما هو الرقم داخل القوس؟
> اذن نجاح المجلس السابق كله توقف على الرقم الصحيح جمال
> طيب وكت جمال ذهب بمحض ارادته مصراً على الاستراحة
> موش من الافضل مساندة المجلس القاعد
> موش من الانسب خلق كوادر جديدة وايجاد استثمارات تريح المريخ وتخفف عن جمال اذا عاد يوماً
> طيب مالكم؟
> ايها الناس
> نصر على بقاء الراية خفاقة
> بملايين الأيادي يمكنها ان ترفرف على الهامات
> واذا تساقطت الايدي
> بيد واحدة يمكن أن تظل راية الزعيم مرفرفة عالية خفاقة تعبر عن كبرياء كيان وسلطان وعزة طالما كانت هامة اليد التي ترفع الراية تطلق عينها صوب السماء بكبرياء ليمضي القطار.
> البتأخر بسطح
> أيها الناس
> على ذكر المجلس السابق
> التحية حاضرة والإشادة واجب بعضو المجلس السابق الاخ حاتم عبد الغفار الذي عمل بجد طيلة فترة التكليف دون أن يتيح لنفسه فرصة لمجرد الضجر
> المهم
> الفاطنيون ايش عاملين!!!
> غايتو يا روشا عجوبتكم حيرت سوبتكم
> الله يسمعنا نوبتكم عشان نشوف نقزي حيرانكم بره الحلقة
> الخوف يا فطومة يا اختي
> يوم حوليتكم الحيران البره الحلقة يكونوا اكتر من الحيران البنقزوا جوه الكسكتة
> شيخ كردنة بختو
> لا مرتبات اجانب ولا حوافز فوز
> وقالوا كمان قاااابض مقدمات
> اريتو حال الوليدات لي حدهم
> لكن الدكاكين الشرقيهة دي
> لو ما بناها البرير بكون بناها الحكيم
> الدكاكين دي جديدة ما اقدم من كده
> اها
> اهلنا في الريف لمن الريف كان بي خيرو
> وكت عندهم الحلال رااااقد لما البلد كانت ما بتعرف الحرام خوفاً من القبر القدام
> اهلنا اهل السعية عندهم مثل جميل
> بقولوا رزية ونطاحة
> المثل من البيئة حقتهم ومتعلق بالبهايم
> يتحدث عن بهيمة
> رزية يعني ضبلانة وهيماااانة
> لما تتنفس تتهز كلها زي عربية الجاز
> بي وصفها ده نطاحة وما قاعدة في الواطة
> يعني ما عندها حيل وشكالة وبتهابش
> اسي عليكم الله بعد خروج الهلال المبكر ده
> الخروج الباكر مع العساكر ده
> ووقعت الخور في شندي دي
> ومطالبة الدكاكين بالمقدمات والتبرعات
> بي ده كلو لما امة الهلال تتكلم عن تعادل المريخ وسطيف
> دحين ما بتكون رزية ونطاحة!!
> تنطح بي شنو وقرونا واحد مكسور في ليبيا والتاني خاطرو انكسر في شندي وغرق في النيل!!
> غايتو رزية ونطاحة ورداحة كمان
> ايها الناس
> إن تنصروا الله ينصركم
> أها
> نجي لي شمارات والي الخرتوم
> كان شفت يا والينا
> سخانة بي جاي
> وسخانة بي جاي
> وقالوا السخانة الجد الأسبوع الجاي
> والكربا تجي أسي وتقطع بي جاي
> لو دي الطريقة حاتلقوا الشعب من السخانة حايم في الشوارع سااااااااااي
سلك كهربا
ننساك كيف والكلب لو سخن بعرق بلسانو… نحنا لسان ما عندنا نعرق ليكم بي وين يعني!!!
وإلى لقاء.
سلك