شمال العرضة وجنوب السودان

> المتابع للإحداث السياسية في دولة جنوب السودان الوليدة
> يجد أنها في مهدها تموت كمداً وتتقطع أوصالها ووشائج الآخر فيها
> كل ذلك بسبب السلطة والتسلط على الآخر ومحاولات إلغاء ذلك الآخر نهائياً
> لم يعجب الآخر ذلك التجني
> وكذلك آخرون غيره دقوا جرس ضد التلسط ومحاولات إلغاء التاريخ
> فكانت المليشيات المسلحة تعبيراً عن كبرياء أمة دولة جنوب السودان
> وبدأت الحرب تراشقاً بالكلمات
> وتطورت الى تلاطش بالأسلحة وتفجرت الذخيرة في وجوه الجميع ضاحكة
> ضحكت عليهم وعلى غباهم ده
> فدفع المواطن الجنوب سوداني التمن غالياً
> وسلفا كير في قصره يضع الكسكتة على رأسه القوي ده ويرشف قهوة الصباح ببن الجنوب المتاح والمباح.
> أيها الناس
> ما يحدث بدولة جنوب السودان يحدث بالكربون في شمال العرضة
> أمة الهلال رفضت مسح ماضي رموزها
> وأمة الكاردينال رفضت رفض أمة الهلال لمسح التاريخ
> فقامت أمة الهلال بإنشاء تجمعاتها لحماية تاريخ الهلال الحبيب
> وقامت أمة الكاردينال بإنشاء مسمياتها لحماية الكاردينال من مسميات أمة الهلال
> وبدأ التراشق اللفظي
> ونخاف على الهلال الحبيب من التلاطش الفعلي
> وكردنة تقبع كسكتته على رأسه القوي ده وهو يرشف قهوة الصباح مع تقليب رسائل الشحدة التي تصله صباحاً قبل فنجال القهوة بحسب زعم رئيس مليشيات حماية وحدة الكباري ومكتسبات الأمة الكاردينالية من رادكالية أمة الهلال
> ويدفع التمن جراء ذلك كله الإخوه الأهلة الشرفاء
> أيها الناس
> أري أن يضع سلفا كير عن رأسة الكسكتة ويقعد مع الآخر في جو ودي
> وأن يضع كردنة الكسكتة عن رأسه ويضع تاريخ العظماء في الهلال نصب عينه
> ليبدأ حوار بالأفكار
> حتى يضع الهلال العصا عن عاتقه منشداً الاستقرار ونجاضة القرار ونجاعته
> وحقو روشا يساعد على كده
> وفطومة اختي تجيب الجبنة دعماً لركب المودة والاحترام
> أيها الناس
> الحروبات داخل الأندية لا تزيدنا إلا شتاتاً ينزل بمستوياتنا الى ما هو ادنى من سيكافا
> وإن كانت سيكافا السنة دي قوية نسبة لمشاركة مازيمبي والأهلي القاهري والوداد المغربي والأشانتي الغاني
> ولكن أن يسود الاحترام، فهذا هو أول عتبات التطور
> أسألك ربي أن تنعم بالاستقرار وتحكيم العقل في جنوب السودان وشمال العرضة
> البسمع دعائنا ده يقول خلاس يعني عاجبنا حال الشمال وجنوب العرضة
> المهم
> في المريخ روح لاتأتي بها إدارة ولا يوجه بها إعلام
> فظهور أمير كمال على المدرجات وسط الشفوت اولتراس اولمبيوس لهو ظهور مشرف
> على إثره حقو امير يقرِّض على كده
> عشان لما نفتح صفحتو نلاقي آخر ظهور مع اولمبيوس
> ونتشرف من جديد
> أيها الناس
> أعجبنا بالمنهجية عند التسيير
> ولكن صدمنا بتصرفات همجية كثيرة
> كيف الاتحاد يعلن كورة وما يخاطب المريخ يا مجلسنا؟؟
> الاتحاد ده موش بخاطب المكتب التنفيذي؟؟
> اتأكدوا هناك قبل اي تصريح
> وما حدث عند وصول مريخ الغرب لاستادنا لأداء مباراة ودية شيء مخجل ومحرج
> فهل قام الضيوف بزيارتنا دون سابق علمنا وجابوا معاهم فريق اللاعبين ضدو كمان؟؟
> وحتى ولو كانت الإجابة بالايجاب،
> هل تصرفنا معهم كان مثالياً؟
> ومن هو المسؤول بإعطاء الإذن والسماح باستغلال الاستاد؟؟
> مظاهر فوضى كثيرة تظهر في ممارسات المجلس ما كانت للدرجة دي
> وإن وجد أهل التسيير السند الجماهيري الكبير في المرحلة السابقة
> قطعاً سيفتقدون ذلك السند بسبب الفوضى التي أزكمت الأنوف
> أيها الناس
> شفوت تجمع الروابط من أمس قاعدين في الجزائر
> نصرة للمريخ هم
> وفأل حسن
> الدور والباقي على اللاعبين
> والشفوت في انتظار الخبر اليقين
> اليومين دي المصران قايم علينا وسيكافا ما بتنفع معانا
> كتروا ليها البهارات بتعمل حرقان
> غايتو في كورة الهلال في سيكافا لو جاكم زول جوه الإستاد يا روشا بقول ليب ليب ليب
> لب لب لب
> ده ما بكون قاصد ليبيا
> ده بكون الببيع لبراكس بتاع المصران
> الكمونية يابت
> سيكافا دي زي السماية يا فطومة
> بدون كمونية ما بتنفع
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كان شفت يا والينا
> الإيصال الإلكتروني عمموهو علينا
> الكهربة تقطع يومنا يضيع علينا
> الشبكة تطش يومنا يطش لينا
> إطناشر تجي الشباك يقفلوهو علينا
> حقوا يا والينا
> تلزمونا وفي شباك أي خزنة تكتبوا لينا
> اي زول لما يجينا
> يجيب جنريتر معاهو قبل يجينا
> وما تنسى يا أخينا
> كونكت فيهو كم قيقا وكم ميقا والباقي بايت لدينا
> عشان ما يضيع يومنا ساكت يا والينا سلك كهربا ننساك كيف والكلب جمب البحر بضحك على زول ماعندو شبكة وراجي السمك والي لقاء سلك