(جابو) فزع بقى وجع

الكلام ما بكرروا ليكم مرتين.
مرة واحدة بس.
افهموه براكم.
الواحد ما شرط يقول ليكم الكلام عديل كدا.
عشان في ناس بتحسسوا.
بتعقدوا.
ويقعدوا يضايروا ليك – يدخلوا في ضفورهم.
بنقوم نحرج اخوانا ديل من غير ما نقصد.
وهم الليلة ما بتحملوا اي حاجة.
قاعدين على الهبشة.
الواحد لو ما قاصد حاجة – بقولوا قاصد شيء.
وليه؟.
واشمعنا في اليوم دا؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
قالوا ليه الفرق بين البطيخة الروسية والبطيخة الهندية شنو؟.
الكلام دا (جابو) في الامتحان.
قال ليهم : البطيخة (الهندية) لو دقيت ليها بترقص.
الكلام دا عندو علاقة بالمريخ.
البطيخ دا عندو علاقة بي وفاق سطيف.
والله لا من قريب ولا من بعيد.
براكم انتوا شايلنها مع (البطيخ).
طيب لو قلت ليكم (طحنية) تعملوا شنو؟…اذا كان (البطيخ) بيعمل فيكم كدا.
مرة مشينا نخطب لي ولد حلتنا.
اتلملمنا كلنا زي وفد المفاوضات.
الاعمى شايل المكسر.
ما خلينا لينا (جلابية) حايمة…اوعمة لافة.
ركبنا لينا (لوري) – التراب ما برتاح فيه…التراب بتململ جواه.
مشينا وصلنا بيت العروس مع المغارب.
نزلنا – (جابو) لينا (عصير الليمون).
قطعنا ليك (الليمون) دا لمن نسينا القضية الجابتنا ليهم.
(جابو) لينا (العشاء).
من غير قصد – ما قاصد اي حاجة – براكم انتوا متحسسين.
ضربنا العشاء – زي التقول لينا 17 يوم ما دخلنا لينا حاجة في خشمنا.
وقت الليل دخل – قلنا ندخل في الموضوع – واحد من اعيان الوفد ..فتح الكلام – قال ليهم عاوزين يد البنت الصغيرة لو ولدنا (قسوم).
في واحد من اهل العروس – قال لينا هو (قسوم) متين بقى للعرس؟.
ابو البنت – قال لينا والله البنت الصغيرة متكلمين فيها.
سكتنا ..ما عرفنا نتصرف في الاول.
في واحد شفت شاف البنت التانية حايمة في الحوش…قام قال ليهم خلاص عاوزين البنت الاكبر منها طوالي.
ابو البنت قال ليهم والله البنت الاكبر منها متكلمين فيها.
اتحيرنا.
ما عرفنا نقول شنو؟.
قلنا ليهم وقت متكلمين عنها – الحوامة في الحوش ليها شنو كمان؟.
الزول الشفت لقى الموضوع ماشي معاهو – قام قال ليه خلاص عاوزين البنت الاكبر من البنت التانية.
ابو البنت قال ليه : والله البنت دي متكلمين عنها.
في واحد مننا قال ليه انت بناتك ديل (دكاكين) – شنو اي (بنت) بنتكلم فيها بتقول لينا متكلمين عنها.
نحن قلنا ليك عاوزين لينا (مدير فني) – نحن عاوزين لينا (بنت) على سنة الله ورسوله.
في اللحظة دي البنت التالتة ظهرت في الشباك – الزول الشفت قال ليهم بس – نحن عاوزين البنت الاكبر من البنت الاخيرة دي.
ابو البنت ما كضب ..وقال ليهم البنت دي متكلمين عنها والله.
واحد من الجماعة قال والله نحن بعد كدا إلّا نشوف لينا (بطيخة) ونرجع بيها – الظاهر طلبنا ما بنلقاه في البيت دا.
في الساعة دي ..البنت الاكبر من البنت الاخيرة دي ظهرت في الماسورة.
قلنا ليهم عاوزين البنت الاكبر من البنت المتكلمين عنها دي.
ابو البنت قال لينا دي عاوزها ولد عمها ….والله متكلم عنها من وهي في اللفة.
قلنا ان بقى كدا نشوف لينا (بطيخة) ساكت – الظاهر ما عندنا قسمة ونصيب.
ابو البنت – قال لينا اقيفوا …البنت الكبيرة ..ما في زول متكلم عنها.
قسوم قام من سريرو وخطب ليك في الجماعة – وقال لي ابو البنت ..انا البنت الكبيرة اعمل بيها شنو؟..والله إلّا افتح ليها (محل تصوير مستندات).
نحن ما عرفنا نمشي وين؟.
قسوم قال لينا قوموا اتخارجوا – انا العرس دا خليتو.
الموضوع دا طبعا ما عندو اي علاقة بي وفاق سطيف.
إلّا تكونوا عاوزين ليكم سبب ساكت.
عاوزين ليكم موضوع.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
لكن النصيحة العاوز اقولها ليكم – علي جعفر دا الليلة لو لعب بيعملها فيكم.
من الدقيقة التالتة الموضوع بيظهر..والحال بنكشف.
وتاني ح تقوموا تدوروا حملات لرفع معنويات علي جعفر.
وكلنا علي جعفر.
مرة كدا وقت كان المريخاب شغالين رفع معنويات لي علي جعفر ..لاقيت اخونا بابكر سلك.
قلت ليه يا بابكر سلك ..اها (تحويل الرصيد) وصل وين؟.. (2780) عملتوا فيها شنو لدعم (الوصيف)؟.
ان شاءالله يا سلك لسه شغالين (تعبئة) لدعم المريخ عبر تحويل الرصيد.
سلك قال لي تعبئة شنو؟..الايامات دي شغالين رفع معنويات لي علي جعفر.
خلينا تعبئة الدعم وتحويل الرصيد.
خلوا دعم المريخ وبقوا يدعموا في علي جعفر.
بيني وبينكم علي جعفر محتاج للدعم.
الزول دا بعد اي مباراة يلعبها مع المريخ بيحتاج ليه (معنويات) جديدة.
الايامات دي (الاسطوانة) مشغلنها لي امير كمال.
برفعوا في معنويات امير كمال.
نحن في الهلال كلام زي دا ما عندنا.
نحن الكاردينال عندنا بيشطب طوالي.
ولا بكضب.
الليلة بقول ليكم من بدري.
بقول ليكم عديل كدا.
بعد مباراة اليوم – علي جعفر بحتاج ليه عمرة (معنويات) كاملة.
الزول دا برجع ليكم منتهى.
وكان لي امير كمال ..من الخرطوم قال ليكم اقنعوا مني.
امير كمال في الخرطوم بيعمل كدا في الجزائر بيعمل شنو؟.
انتوا ما نصاح.
في زول تاني الليلة ح تشوفوه على حقيقته.
ح يظهر ليكم بالوش التاني.
جمال سالم.
جمال سالم انكشف.
جمال سالم الليلة وضعيتو ح تكون صعبة.
يفكها ويمسكها.
ويطلع ساكت من المرمى.
ويعمل ضربة جزاء.
اي حاجة الليلة ما صاح – الليلة جمال سالم بيعملها.
اسمعوا الكلام دا – تاني ما بقولو ليكم.
ما بعيدو مرتين.
جمال سالم وعلي جعفر ابعدوهم الليلة من التشكيلة.
الناس ديل (متكلمين) عنهم.
ارجعوا لبداية العمود – بتفهموا الحاصل شنو؟.
والله اعلم.
انا مالي – كلمتكم ..وحدثتكم.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
طبعا الحاجة الما قالوها ليكم.
(جابو) في الخرطوم (فزع).
(جابو) في الجزائر (وجع) عديل كدا.
اكتر من كدا ما بقدر اقول ليكم شيء.
عشان بكشف ليكم الامتحان.
القصة بقت ظاهرة.
ان شاءالله بس تتعلموا.
ان شاءالله تستفيدوا من الدروس.
عشان بكرة ان شاءالله ح نتقابل في نفس المساحة.
وما بجيب ليكم السيرة تاني.
اعرفوها براكم.
………….
و
المدرب الروماني حضر – الزول دا عينو ليه حرّاس من شركة الهدف.
الظروف ما معروفة.
نسأل الله التوفيق والسداد للمدرب الروماني.
هيئوا ليه الاجواء والمناخ المناسب.
خلوه يشتغل ..وما تدخلوا في شغلو.
حتى (التنظير) والانتقادات في الجرايد ..ما تكتبوه عنو.
ما تقدموا انطباعات عن المدرب قبل ما يبدأ.
خلوه يشتغل.
وابعدوا عنه الجرايد.
والكلام الكتير.
امنحوه الفرصة الكافية.
خلوه يشتغل موسم كامل – بعد داك قولوا كلامكم فيه.
ما تصدروا ليه اي انطباع عن لاعب.
خلوه يحكم براه.
مبارك سليمان ممكن يقدم الصورة الكاملة له.
يا ريت ادارة الهلال تخليه يشتغل..وما تتدخل في عمله.
بكرة مباراة مصيرية اخرى للهلال.
وعطبرة دائما في القلب.
الاعتداء على (الاسياد) مرفوض جملة وتفصيلا.
وهو عمل (همجي).
وما في مبرر له.
نتمنى عاجل الشفاء للزميل نوح جار النبي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…….
السيدة (ل) – الناس ديل قالوا باعوا الف واو الجماعة…عشان كدا اتفرتكنا.
وقرّط على كدا.