يلا نقولها
> مهما كان سوء التحكيم وانحيازه
> فإن ذلك لا يكون مبرراً للتصرفات الهوجاء تجاه الحكم علي مرأى من العالم
> ولا نجد مبرراً لاداري او لاعب يدفعه لذلك التصرف الذي يخصم من سمعة المريخ الناصعة ولا يضيف اليها شيئاً.
> وحتي ما بدر من بعض اللاعبين عند الاعتداء علي جمال سالم
> ما كان شفتنة كورة بتهرش العدو بقدرما كان تصرفاً اهوج وبس.
> لو في حرارة قلب كان شفناها في الملعب اداءً واصراراً
> ولكن ما فعله البعض كان يشبه الى حد كبير نباح الكلب بعد الحرامي يسرق ويمشي
> هو هو هو تاني بترجع شنو يا بوبي!!!
> أما الكابلي الذي اجل دفن والده ليتأكد من دفننا اولاً
> ده ما المدرب البخلف غرزة
> نعم لم يجد الظروف التي وجدها غرزة
> لكن الخريف اللين من رشاشو بين
> وزولنا ده كتاحتو الف
> ايها الناس
> ابيناها ممعوطة
> بقينا نكوس عليها بي صوفها
> سوء في كل المناحي
> نعم لم نصل بسوئنا لمرحلة غيرنا
> فغيرنا اعتدى على الحكم عن طريق رئيس الكيان
> وغيرنا في كورة فيتا بالكنغو لاعبنو سكو الحكم في مشهد تداوله الناس بالواتساب
> وغيرنا كان نصيبو من المباريات الافريقية هذا الموسم كورتين.
> اما نحن فنصيبنا من المباريات الافريقية هذا الموسم ست مباريات
> غالبين في تلاتة
> ومتعادلين في اتنين
> وهزيمة مباراة واحدة
> نحنا في اسوأ حالاتنا افضل من غيرنا كتييييير
> وعلى الرغم من ذلك ناس خالد ما بحبو المريخ
> بحبو الحمام البطري البطير بدري بدري
> ايها الناس
> ورثنا من الموسم السابق فريقاً مثل بعبعاً لافريقيا مهاباً
> وفي هذا الموسم اضعنا تلك الورثة في رمشة عين
> ايها الناس
> في البلد دي اللاعبين كلهم زي بعض
> فقط المحظوظ هو من يقوده حظه للقمة
> لذلك ما شايف سبب للدلع والدلال وقبول اللاعب باي شكل من الاشكال
> البفوت حدو يواسوهو
> والمبالغ المليارية دي مبالغ ما بدفعها الا غشيم
> لانو مستوى قدرها مافي
> اذا كان لاعب دولي بالشمال بجليها واقفة
> اذا كان مدافع دولي بصرجها لمن قلنا يكون من السراريج!
> اذا كان حارس مرمى دولي بطلع من قونو غلط
> وقبال ده كلو اذا كانت ادارة الكرة في بلدنا دي بالفتوة ساااكت
> وقبل ذلك اذا كانت ادارات الاندية زاتها قاعدة ساكت
> يتولى الدفع والسداد والقرار زول واحد
> وقبل كده اذا كانت وزارات الرياضة الولائية دي تضرب بيها دي
> اما الاتحادية فلا أظنها تعرف كم منشط رياضي في هذا البلد
> وقبل ده كلو
> ولا مافي داعي اخير نسكت
> ايها الناس
> من هزم المريخ هو المريخ نفسو
> ما تقول لي حكم
> هو نحنا كنا خطرين يعني لدرجة استعانة المغاربة بالحكم؟
> نحنا طوال هذا الموسم اي كلام
> لا طريقة لعب
> ولا جمل تكتيكية
> لا حرارة قلب
> لا شراسة كلب
> لا بصمة مدرب
> الكابلي ده في المعامل الجنائية وتعملوا ليهو فيش
> قطع شك ما بتلقوا ليهو بصمة
> ياخ زول يقول لي أوكرا ادخل
> ابو جريشه يقول لي اوكرا ارجع
> يخت ايدو في كتف ابو جريشه ويرجع معاهو!!
> الزول ده خلي بالك متأثر بموضوع الوفاء اكتر من موضوع الوفاة
> ايها الناس
> اللاعب استدرج مصعب لركلة الجزاء
> ومصعب اكل الطعم
> وخرجنا
> السنة الفاتت بي سايد مصعب خرجنا
> لانو مركز في حقوقو
> نحنا حقنا وين؟
> ايها الناس
> الفريق الشفت الحكم ما بخمو
> لكن البياباها مملحة اكيد بكوسها ناشفة دون جدوى
> المهم
> الحكاية ما تمر ساي
> والجمعيه شكلها مؤجلة
> وعشان تكون الحلول جذرية
> يا نتفق على مجلس تسيير يقدر يدير
> يا نتفق على مجلس منتخب يقدر يمرقنا من الحرج ده
> يا نخوضها ديمقراطية الى ان نتعلم معناها بعيداً عن العضوية المستجلبة وبعيداً عن الاعتماد على دعم الحكومة التي تورطنا باعضاء في مجالس التسيير يحيرونا
> ديمقراطية تمرقنا من جيوب الأفراد لآفاق الاعتماد على النفس
> ديمقراطية تمرقنا من الاعتماد على الدعم الحكومي المخصوم مقدماً من رصيد قراراتنا
> ديمقراطية تؤكد على مبدأ اهلية الحركة الرياضية
> ايها الناس
> المريخ يحتاجنا بشدة
> لنصيغ قرارات الانعتاق
> فهل تكرمتم بالالتفاف حول الكيان بدون كيمان او مسميات؟
> ايها الناس
> على مجلس المريخ أن يصدر عقوبات على من تعدى حدود اللياقة في المغرب قبل ان يصدر تلك القرارات الكاف
> لنؤكد على اننا نادي محترم
> ولمن اخطأ حق الاعتذار وعليه واجب قبول ما يصدر من قرارات تمحو تلك الشخابيط
> ايها الناس
> ان تنصروا الله ينصركم
> اها
> نجي لي شمارات والي الخرتوم
تصدق يا والينا
> نحنا في العرضة على بعد تلاتة كيلو من النيل والموية ما بتجينا
> نشغل الموتور لمن الكهربا تجينا
> ضياع كهربا ساكت مع المواسير البتشخر فينا
> مع قطوعات الكهربا والمويه الما بتجينا
> ما بنستبعد واحد بي حصان يبرطع فينا
> يا اهل الربع يا اهل الربع يعلن لينا
> يا اهل الربع ان مجلس شيوخ القبائل بخيمة حنظلة يدعونا
> ليبلغنا بكيفية تقسيم الايام في البئر البتروينا
> يوم لسقاية قبيلة فلان والحلال ويوم لسقيانا ليروينا
> والما عاجبو يهاجر للحبشة يا والينا
> زمن الجاهلية برطع فينا
سلك كهربا
ننساك كيف ولما واحد عطس آتشي الكلب قايلو قال النجاشي
وإلى لقاء.
سلك
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة