وبدأت الفعاليات

> اختيار هاشم الزبير ضمن التسيير تو هو اعلان لعودة الحياه الثقافية لدار النادي > وهاهو هاشم الزبير ماجستير توجيه الهتاف الجماهيري يعود مجدداً ليطلق صوته مجلجلاً من جديد في سماء النادي الذي لم يفارقه هاشم يوماً سواء كان عضو مجلس ام خارج المجلس. > فعلاقة هاشم بالمريخ ليست علاقة كراسي. > واذكر ان هاشم لم يحالفه التوفيق حيث كان مرشحاً في احدى الدورات. > وتاني يوم من اعلان النتيجة كان هاشم حضوراً انيقاً كعادته لدار النادي ممسكاً بقطع الضمنه كعادته برغم بلاطة نتيجة الانتخابات. > لم ينقطع هاشم عن النادي > ولكن عاد صوته الجهوري المعروف لكل المريخاب وهو يطلق مبادرة > مريييييييخنا > مرييييييخنا > الآن هاشم اعد العدة لليالي الرمضانية > عاد للنشاط الثقافي ألقه بعودة هاشم > ونتمني ان يسارع جميع اعضاء التسيير تو بالبدء في تنفيذ مهامهم بالمجلس > واولهم ناس الاستثمار > المهم > فطومة اختي عملت عملية عجيبة > لكن ربك رب الخير لطف > عملت عملية جبانة > نسأل الله لفطومة الشفاء العاجل > وشرك مقسم علي الدقشم ومعارضة الكاردينال > وحمد لله على السلامة > بكرة او بعدو بنوريكم اخبار العملية وبنوريكم هي عملية شنو اذا توفرت لدينا المعلومات الكاملة والصور > وما تعذبونا شديييييد > لو عرفنا حاجة بنوريكم > ايها الناس > اتوقع نصراً كبيراً واداءً رائعاً للزعيم > المعنويات في السماء > والاولاد قعدوا مع الوالي > والبقعد مع الوالي كان عندو ما بقوم > وكان حبيب ما بقوم ساي > ورونا لعب المليار يا اولاد > لعب الخمسين وريتونا ليهو > ولعب الخمسة وريتونا ليهو > ولعب بحاسبك بعدين شفناهو > وكت الفلس مابقيتوا الصمود > بقيتوا زيف > وكت القروش ورونا الفرق يا جماعة > عشان نتأكد انو مستواكم المهزوز من اول الموسم كان لاسباب معنوية وما كان لاسباب نفسية > وحقو اولادنا يعرفوا حاجة > لن نقبل التفريط في نقطة من نقاط المباريات المؤجلة > فاهداركم لنقاط عديدة بالدورة الاولي تحت ستار حقي ومن حقي > يجعلنا نطالب بحقوقنا كاملة طالما قعدتوا مع الوالي > وحقوقنا في المرحلة الحالية عليكم هي نقاط المباريات المؤجلة كلها > انتم من اختار ذلك > وانتم اقصد بها قدامي لاعبينا الذين تهربوا عن دفع الضريبة وكت الفلس وادعوا الاصابة ووجع البطن ومرض ام سادومبا > عوتونا وساندكم على ذلك البعض > اللاعب عندو حق يشيل حقو مهما كان المستوى لأن الأمر تعاقد > وريتونا انو لاعب الايام دي زي شريحة الدفع المقدم > محل ما يقطع رصيدك بقطع ليك بدون خجلة حتي ولو كانت المكالمة مهمة ودولية ومع زول في المغرب > لاعبين اذا ماعندك رصيد بدون خجلة بقولوا ليك ليس لديك رصيد كاف لاجراء هذه المكالمة > حتي ولو كنت مخصص الرقم مكالمتك لن تتم اذا ما قمت بشحن الرصيد > ولاعب بهذا الفهم لن نقبل منه عذراً لما يكون مشحون رصيد > يتكلم لينا قدر رصيدنا > بمناسبة الرصيد دي > مرات تضرب يقول ليك مقفول > او مشغول > او الرقم ده جبتو من وين > او ماعندنا رقم بالشكل ده > وهو بكون لا مقفول ولا مشغول والرقم رقم الشركة وعندهم رقم بالشكل ده > لكن اكضب زول في الدنيا بت التلفونات دي > تكضب على عينك يا تاجر > في رمضان ده بتكضب > الكضب بقي جاري في دمها > حتي كتبت عند الله كذابة > وعرفت عند الناس كذابة > عشان كده لما نضرب > وتنط البت دي تقول لينا مقفول > بنضرب تاني لاننا عارفنها كذابة > والمكالمة بتدخل معانا > مرات يقابلك زول يقول ليك تلفونك طوالي مقفول > وانت تكون متأكد انو ما مقفول > تقوم تبيع الموبايل علي اساس انك ركبت المشتري ماسورة > والحقيقة انو بت الاتصالات هي الماسورة وركبتك ماسورة > الناس الما عارفنها كذابة ودوا موبايلاتهم الصيانة > في واحدين باعوها بالخسارة واشتروا موبايلات بالشيء الفلاني بالاقساط > دخلوا في خسارات كبيرة بسبب كضب بت الاتصالات دي > في اسر اتفرتقت بسبب كضب بت الاتصالات دي > في خطوبات فركشت > قافله التلفون في وشي ليه؟ > انا … ماقفلتو انت القفلت > تشوت مكالمتي ليه؟ > كنت قاعد مع منو؟ > وتفركش الحبكانة > بت الاتصالات في الحتة دي بقت اخطر من الذين يعلمان الناس السحر يفرقان به بين المرء وزوجه > المهم > طالما بتطالبوا بي حقوقكم > ادونا حقوقنا عروضاً وانتصارات > ايها الناس > ان تنصروا الله ينصركم > اها > نجي لي شمارات والي الخرتوم > كان شفت يا والينا > في واحد بتاع بحر جا يبارك لينا > عندنا وليدا جاب اتنين وتسعين في الميه يا والينا > بتاع البحر قال مبروك جاب كم الوليد لينا > قلنا ليهو اتنين وتسعين يا اخينا > قال ماشاء الله كلو شيء زاد > زمان في الحي ستة بكونوا ممتحنين لينا > الستة تجمع نسبهم مابتتم اتنين وتسعين يا اخينا > الآن هم بروف فلان ودكتور علان وكل الاسماء الناجحة الجايبة الشرف لينا > اسي انت يا ابني بالاتنين وتسعين الجبتها براك دي بعد التخرج برضك حاتسوق ركشه لينا سلك كهربا ننساك كيف والكلب قال البجيب تسعين والبجيب تلتين بقروا في جامعة واحدة الاتنين… الكاش بقلل النقاش وبدخل طب. والى لقاء. سلك