كسكتة قايمة وكسكتة نايمة

> جوهرة رمضان شغالة مع كردنة بي كسكتة قايمة وكسكتة نايمة > والكلام ده ما بنفع مع الكرادنة أبان كسكتة قايمة في كل الظروف. الهلال يطير من دور الاتنين وتلتين افريقيا من فريق مغمور وكسكتتهم قايمة > معسكر الاعداد بتونس يفشل وكسكتتهم برضك قايمة > الهلال في الواطة دي ويفوز بمنح يخطئ ولايظلم وكسكتتهم لاتعرف الخجلة > الهلال يغرق في نيل شندي وكسكتتهم شدة ما قايمة الموية ماهبشتها > الهلال يتمرمط في استادو وتتزرع تبلدية في الاربع رايات وكسكتتهم برضك قايمة > الهلال يسجل مواسير ويشطبهم قبل موعد التنقلات في سابقة لم تحدث بفرق الروابط وكسكتتهم واقفة لمبة بدون خجلة > اصحاب الكسكتة الفي كل الظروف قايمة ديل ما بحبوا اصحاب الكسكتة المرة قايمة ومرة نايمة يا عزيزي بكور ويا صديقي رمضان > ديل بحبوا الزول يصفق في كل الظروف زي نواب البرلمان > ومع دقة البنقز بقيفوا وسط الحلقة ويرددوا > صفقة هيي صفقة > المابتصفق إن شاء يقفلوا جريدتها ويكسروا عدتها > الصفقة هيي صفقة > المابتصفق إن شاء الله يحرموها الإعلان وجريدتها تطبع بدون الوان > صفقة هييي صفقة > المابتصفق إن شاء طباعتها تطلع راجع ويجيها شيك المطابع > صفقة هييي صفقة > يبقى ناس الكسكتة نايمة وكسكتة قايمة ديل يا يصفقوا يا رمضان > يا إن شاء الله يبورن > وناس الكسكتة النايمة طوالي ديل اصبر ليهم > قريب ده يا يلبسوا الكسكتة القديمة يا الاغتراب > القعدة هنا بتبقى مستحيلة > المهم > فطومة اختي وحشتنا > برغم شقاوتها ومناكفتها > الا انها وحشتنا شديد > من العمرة ديك وعمود العيد اختفت > كنت متخيل يا فطومة بعد العمود داك تواصلي > عمود كان جميل واعطى كثير من اصحاب الحقوق حقوقهم > عودي لينا إن شاء الله كلو يوم تنشري عمود العيد داك ذاتو > دي حالتها عمرة يا فطومة! > يعني لو حجيتي ماكان رجعتي السودان ولاشنو؟ > قصة عمرة فطومة دي ذكرتني قصة > يوم بفضل الله اشتريت عربية كورولا خمسة سنين أقسط فيها > يوم الجمعة وديتها محل الكشب > قلت للولد ركب لي الفرش ده > فرش جلد ياعمك(برضو بالقسط) > قلت ليهو استعجل عشان صلاة الجمعة > قال لي الجامع أهو ده قريب > قلت ليهو الليلة داير أصلي في مسجد النيلين > ابتسم ولم يعلق > جاهو زميلو > قال لي زميلو اشتغل معاي عمك سلك قال مستعجل > صاحبو قال ليهو الليلة عمك سلك مستعجل مالو > قال ليهو اشتري ليهو كورولا قال داير يصلي في النيلين > يعني لو جاب ليهو برادو يمشي الحج ولا كيف! > المهم > إبان كسكتة طوالي قايمة اليومين دي شايلنها تقيلة مع ولدنا الموهوب الثعلب > والثعلب لن يجد من يدافع عنه في عالم الهلال > لأنو إبان كسكتة قايمة وكسكتة نايمة ما بقدروا على غضب ابان كسكتة طوالي قايمة لأنو الموضوع ده بجيب غضب الكسكتة > واذا غضبت الكسكتة وقفت عمليات صيانة المستشفيات > ودي لو وقفت المرض بقرضكم > ايها الناس > بعد المديح السمعناهوا كلو > خرج علينا سيحة بان الحكم إياه ادار المباراة بشجاعة > وعدد أخطاء الحكم والتي احصيناها في سبعة وخمسون خطأ > وفي إجابة لسيحة على سؤال ذكي من استاذنا زهير > قال سيحة الحكم اثر في نتيجة المباراة > فهل الشجاعة هي ارتكاب سبعة وخمسين خطأ والتأثير على نتيجة المباراة > ام تقصد بالشجاعة التأثير علي نتيجة المباراة على ارض ووسط جماهير الفريق المتضرر؟ > سيحة > كسكتة قايمة طوالي برضك ولا الحاصل شنووووو! > ايها الناس > اليوم نجي كلنا لضرب اللون > نعم المحرش مابكاتل > لكن ممكن يخربش > واذا استفاد من ناس يخطئ ديل ممكن يقاتل > يبقى نجي كلنا عشان يخطئ ما يخطئ > لأنو الناس ديل اتعلموا ليهم شجاعة كمان زي ما قال سيحة > وشجاعتهم ممكن تكون على ارضك ووسط جمهورك > كلنا من عصراً بدري لنصرة الكبير > ايها الناس > مافيا الدخل شغالة > واحد الشفوت قبض الشباك التالت بالثابتة > ولأنو شفت صور الواقعة > الموضوع ده مابنخليهو > لأنو التذكرجي معروف منو > وناس المراقبة معروفين منو > وسنعود للموضوع بالتفصيل والاسماء > وعلى الشفوت مراقبة الابواب براهم > تذكرتك لو ما قطعوها قدامك وشرطوها ما تدخل > ممكن يستلم منك التذكرة ويعيدها بي تحت للتذكرجي يبيعها تاني > خسران المريخ يا شفت > لو ماشرطها ما تدخل > حتي ولو الكورة بدت > ايها الناس > إن تنصروا الله ينصركم > آها > نجي لي شمارات والي الخرتوم > كان شفت يا والينا > المويات لسه مكشحة فينا > والسما تلملم في سحاباتها لينا > جهزتوا دواء الكوليرا لينا > ولا أدوية الكوليرا والنزلات المعوية والملاريا والبلهارسيا علينا > يعني برة التأمين يا والينا سلك كهربا ننساك كيف والكلب قال صحة بيئة شنو !مافي زول بموت قبال يومو والي لقاء سلك