كاتب مصري: العالم كله عارف اخبارنا وفضايحنا منورة الميديا في كل حتة في الكون
لا يوجد إصلاح اقتصادي بدون إصلاح سياسي .
– المشهد الأول ” مطار النزهة ”
اللواء عادل محجوب ؛ السيسي عينه رئيس مجلس إدارة الشركة المصرية للمطارات ؛ وهوا جاب معاه في مجلس الادارة كام لواء من اللي كانوا بيخدموا معاه في الجيش من اللي بيحبهم وبيثق فيهم .. أخدوا قرار بتجديد مطار النزهة بتكلفة 300 مليون جنية قبل سنة .. المطار إتجدد فعلا ؛ لكنه مش هيدخل الخدمة ووزير الطيران قال إن قرار تجديده كان قرار غير موفق .. والسيسي قال إننا مش هنستخدم المطار لأسباب إعفوني من ذكرها .
دا موضوع يبدو في ظاهرة إقتصادي .. لكنه في صلب السياسة ؛ تعيين ناس ليس أهل لمناصبها ؛ في غياب تام لأي معايير للإختيار أو الشفافية غير إن الجنرال عبدو قرر إن هوا كدة وإن كان عاجبكوا .
– المشهد الثاني ” شركات الطاقة البديلة تعلن إنسحابها من مصر ”
في 29 شركة طاقة كانت هتستثمر في مصر بإجمالي استثمارات 15 مليار دولار توصل ل 50 مليار بحلول 2022 … الشركات دي كلها – ايوا كلها – انسحبت من الاستثمار في مصر ؛ وظهر المدير التنفيذي لأكبر شركة منهم بيعلن انسحابه وخيبة امله من المناخ والاسلوب والتعنت المصري و بيشرشح مصر على أهم فضائية عربية .. تقدروا تشوفوا الفيديو هنا http://ara.tv/4htna
من البنود اللي ادت لإنسحابهم كان بند التحكيم الدولي .. مفيش شركة أجنبية بتثق في القضاء المصري ومحدش مستعد يقف قدام قاضي زي او شبة ناجي شحاته بيدي احكام بالاعدام ل 500 نفر في جلسة واحدة علشان يفصل في نزاع بينه وبين الحكومة المصرية .
دا مش اقتصاد .. دا سياسة ؛ والعالم كله عارف اخبارنا وفضايحنا منورة الميديا في كل حتة في الكون من أول ريجيني لغاية اية حجازي .
– المشهد الثاث ” خلية البكابورتات ”
رؤساء أحياء مدينة الاسكندرية كلهم لواءات سابقين .. الشتا قبل اللي فات حصلت أمطار غزيرة ؛ غرقت البلد ؛ ودا من صلب عملهم ومسؤلياتهم ؛ فقرر سيادة لواء منهم إنه يتهم الإخوان بإنها هيا اللي قفلت البلاعات بالأسمنت علشان تغرق البلد .
بالبساطة دي ؟ اه بالبساطة دي … ومحدش هيتحاسب ولا حد هيتشال والمساكين اللي اتمسكوا في القضية دي إنسطوا 5 سنين سجن من كام يوم ..
– المشهد الرابع ” احمد درويش ”
الدولجية وانصار الجنرال عبدو كانوا دايما بيتباهو بتعيين الرجل الفذ ” احمد درويش ” رئيس للهيئة الاقتصادية محور قناة السويس .. وهوا راجل نضيف ونزية فعلا بغض النظر عن قبوله العمل في وضع بائس زي دا .. إمبارح أقالوه .. وعينوا مكانه اللواء مميش صاحب أكبر خيبة إقتصادية لما شار عالسيسي بحفر تفريعة كلفتنا 8 مليار دولار لم تدر أي عوائد حتى الان .
ماهي مؤهلات اللواء مشمش ؟ هل تنفيذ مشروع فاشل اتكلف 8 مليار دولار لا يستدعي محاسبة ؟ مساءلة ؟ طب للتاريخ نعرف حتى كيف أُخذ قرار الحفر ؟ طيب ما هي نجاحات مشمش علشان تكافئوه بمنصب افتصادي زي دا ؟
المشهد الخامس ” انسحاب شركات الحاويات ”
قرار عشوائي بزيادة الرسوم .. فشركات الحاويات تطلب من مصر مراجعة الرسوم المبالغ فيها دي ؛ مصر تتنطش.. فتنسحب الشركات لان موانئ دبي واليونان ارخص .. فنكتشف المصيبة وباقلنا شهرين في حيص بيص وناس اتخرب بيتها .
علشان كدة يمين بالله مفيش حاجة اسمها اصلاح اقتصادي بدون اصلاح سياسي .. مفيش ؛ محصلتش ؛ محدش عملها .. وأي اقتصادي مصري يتكلم عن اصلاح اقتصادي بدون اصلاح سياسي .. هوا دجال وكداب
بقلم
محمود حجازي
*كاتب مصري
