شنو يعني غناء هابط!!

لو افترضنا في غناء هابط زي الضغط ومرض السكر طالما المثقف و(المتخلف) مصر انه يستخدم المصطلح دا ويقع في الغناء والغنايين من طرف داك هابط والاغنية الفلانية هابطة ودا بيتم علي مستوي المنابر الاعتبارية ووسائل الإعلام و الفضائيات البتبث في كلام ضيوف مهنة أغرب من الغريب،الغناء خطين! غناء رصين أما غناء مبتزل، ديل وصفين وصفتين ما دونهما هراء واجتهاد وتنظير من ناس الموضوع مابيعنيهم بصورة مهنية ومثقفاتية اضروا المتلقي والشارع اكتر من صلحوه،

من خلال المنابر البتتيح ليهم يمثلوا الوسط وأهله بصفة رسمية واعتبارية وفي نفس الوقت هم ابعد من تثقيف الناس والشارع ومحتاجين اليثقفهم قبل الناس،ومن هنا شاعت الأخطاء واتعممت مفاهيم كثيرة خطأ خلت كل زول يسمع ليهو اغنية سهل ممتنع وبتعتمد علي جملة لحنية ونصية خفيفة ممكن تعلق مع الزول بعد سماعها يقول ليك الأغنية دي هابطة وفنانها هابط فضلاً عن أنه الهبوط دا في حد ذاته بقي مرتبط بالمغني والشخصية اكتر من الأغنية نفسها والا لو ما كدا كان الهبوط شمل اسماء كتيرة بما فيهم العمالقة والرواد، الله مبتلينا بمتلقي لا يحترم المبدعين في كثير من الأحيان ماعدا القليلين من المثقفين اللذين يميزون بين الأغنية البسيطة في صياغة ومعاني والفاظ اللغة التي كتبت بها وبين الأغنية المعقدة تاليفاً وتحتاج لجهد حتي يتم وصولها ،

فالأغنية الكبيرة والفخمة لغةً لا تعني في كل الأحوال انها جيدة المضمون حتي تصنف من العبقريات، ولا الأغنية البسيطة تعني انها مبتزلة أو هابطة لو مررت استخدام هذا المصطلح لأغراض الاستيعاب فكم من اغنية يستهين بها الناس ويسخروا من بساطتها وشعبي مفرداتها وقد تكون هي قمة العبقرية والجمال والتفرد،

غنانا الراحل سيد خليفة اغنية سهل ممتنع : سكرنا كملتي مسختي كملتي وين ماشا فايتانا نانا يانانا ، ليه مافي زول يوم قال الأغنية دي هابطة؟ غنانا الراحل أحمد المصطفي القربو يحنن والبعدو يجنن غنانا الراحل وردي في الناس القيافة حبينا اللطافة غنانا الدكتور عبد الكريم الكابلي سكر سكر غنانا الموسيقار عثمان حسين ياناس لالا

وغنانا الموسيقار محمد الأمين يامعاين من الشباك يا احلي زول شفناك غنانا الموسيقار شرحبيل احمد يالابس البمبي غنانا الراحل محمود عبدالعزيز عنقود العمالقة توب الكرب الجابوك النقادة هل في زول في حقبة إبداعاتهم وتاريخهم وصف هذه الأغنيات البسيطة والراقصة حد الفرح والبهجة بأنها(هابطة)؟ قطعاً لا لان متلقي ذلك الزمان كان مثقفاً ويمتلك حساً وذوقاً رفيعاً يجعله يميز جميل الغناء من الاسفاف والغثاء اشمعنا ماعندكم رأي في :(محنن دون قنيلة وحدو وتوبو واقع )؟

اشمعنا ماعندكم رأي في (النهيد المارضع جنا) وعشرات أغنيات الزمن الجميل البتفتكروا انه الإبداع وقف عندها فرجاءً خلونا نحكم العقل ونحاول نتعلم من النقاشات احترام رأي الآخر اولاً ومنح المبدع السوداني الثقة والدافع البيخليهو يحترم جمهور بيحس انه هو صاحب رسالة وواجب تجاهه ومن حقه عليه انه يوصلها علي اكمل وجه بحب وإخلاص وتفاني الواحد فينا مرات بقي بيحس كأنه بيأذن في مالطا لما تتبرع تفيد ليك زول دون مقابل وهو مايحترمك ومن السهل يشتمك ويشتم امك الجابتك وتبقي الشغلانة شغلة الدايرين يساعدوه في حفر قبر ابوه دس الطورية والكوريق.

بقلم الشاعر
هيثم عباس