أ.د. معز عمر بخيت

باسم الله يا كيزان


باسم الشعب نتحدّى
وانتو ربيبكم الشيطان
قلوب مسمومة مرتدة
لهيب الثورة والعصيان
ساكن فينا من مدة
طلعنا الليلة متحدين
ومتكاتفين عشان نبدا
نزيل طغيانكم الظالم
ونعلن ثورة ممتدة
لآخر الكون ح نمشيها
جميع اطيافنا نلغيها
ونتجمع على الوحدة
عشان نبني الوطن جنة
وصوت الحق إذا رن
يفجر صحوة المبدا
أذيتونا
وأذيتوا الدنيا بي حالا
فضحتونا
وفضحتوا بلدنا وأحوالا
قهرتوا الطفل في الروضة
خنقتونا
وخنقتوا الزهرة والوردة
حرموتونا
حلاوة العيشة والقعدة
بضل شمس الضحى الحارق
وجرح الوجعة احتد
منو الفيكم هو ما سارق
وعايشين نحن بالشحدة
وكل شبابنا قام مارق
يفتش لي وطن أجدى
بدل الذل وصدر السل
ديل ميتين وديل مرضى
تجارة الدين وحلف يمين
كذب بهتان ودجالين
لا قرآن ولا ياسين
لا ركعات ولا سجدة
لا إنقاذ ولا إنجاز
حكم مفطوم على الفوضى
بقدرة ربنا السامع
وحلم نبينا الشافع
وقبضة كفنا البضة
داهية تشيل وتسعاكم
وتلحسوا انتو كيعانكم
وتحت الجزمة تتمدى
حرامية ولصوص سارقين
ورباطين ونشالين
مرافعين خايفة مرتعدة
فصلتو جنوبنا أرض الخير
بيهو حياتنا كانت غير
عظيمة كريمة معتدّة
وفي دارفور كتلتوا الناس
ميت فيكم الاحساس
جشعكم أصلو ما بهدَى
حتى النيل صبح عريان
وماتت دومة امدرمان
وكل الكان جميل عدّا
راحة البال وطيبة الفال
بقت في لحظة بيكم حال
نفس مقفولة منسدّه
وأي فرح بسيط هاجر
وضاع سودانا في غمضة
حق أطفالنا ما بروح ساي
كل وليد ح يتسدا
شقى الحرمان
وقهر حياتو في السودان
وقصرالظلم بتهدّا
بلد نبداهو من أول
جديد وفريد ولو طوّل
طريق الخير إذا انسدّ
بنفتح ليو مساماتنا
ونعبر بيو محطاتنا
عليهو نقيف ونستهدىَ
ونفتح صفحة وردية
طريق نمشيه حرية
بدل قصر الظلام نبني
للإشراقة قطية
فيها حياتنا بيو رغدة
ده في جوانا هو السودان
بلد نحميه من أحزان
وينهض تاني في غمضة
ومن سرطان ومن كيزان
وكل عمايل الأخوان
عشان نرضيه لو يرضى.

أ. د. معز عمر بخيت
صحيفة الجريدة


‫3 تعليقات

  1. ي دكتور

    انت عضو كبير بمافيات سرقة العقول و الكوادر الطبية و تهجيرها للغرب و غيرها من دول الجوار و الأعضاء البشرية و غيرها .
    دكتور معروف اما موضوع اكتشافاتك و خزعبلاتك أيضا معروف

    سؤال

    1/ عملت شنو للسودان و للشعب ؟

    2/ هل اكتشفت علاج للملاريا !!!!!!!؟؟؟…

    مرض الشعب و موته انت من تسبب فيه اى اخصائي او طبيب امتياز او طبيب عادى هربته خارج البلاد و وصلت بكم الوقاحة لتهريب الممرضين و طلاب الطب ناهيك عن شركات الدواء الوهمية و الادوية المغشوشة و المنتهية الصلاحية و المخدرات الطبيبة و ….و …… الموضوع يطول و يحتاج …..

    سو(اح.داني)

  2. أكاد أجزم لو أنن هذا الشخص حظي بمنصب في هذه الحكومة لكان كلامه عكس ما يقول ..
    أمانا الكلام ما ساهل ..
    وجعجه ساكت في الهواء نسمع فيها من سنين ولم نر طحيناً ..

    أما ما قاله الأخ ( سواح سوداني) فواضح إنو كلام صحيح وصادر من إنسان متابع

    1. انت وسواح قولو كلام يدخل العقل !!!مين الشرد الاطباء والممرصين وحتي غسالي العربات ؟؟؟؟ نظامكم المجرم يا حرامية يا آكلي السحت………. منصب؟ المناصب خليناها ليكم انتم … اشبعوا فيها ( شركات الدواء الوهمية و الادوية المغشوشة و المنتهية الصلاحية و المخدرات الطبيبة ) ضحكني سواح اذا انت الما متابع مين صاحب كونتنير المخدرات مين ناس شركات الدواء الوهمية من البيتاجر حتي في العاهرات ……ما تحاول الشعب السوداني فليتكم بمراحل وليكم يوم