من خلقوك سمعت ليك لون اسمه لون الكلب ؟؟

يبدو انني لم اختر الوقت المناسب لزيارة جارتي حاجة نفيسة ..كانت في حالة هياج ..وزعل شديدين ..ليه كدا بس؟؟ ..في شنو يا حاجة ..قالت لي بنفاذ صبر (عليك الله في ذمتك يا دكتورة ..من خلقوك سمعت ليك لون اسمه لون الكلب ؟؟) ..(النصيحة يطرشني ما سمعت بيهو)..التفت الى حفيدتها مناهل (اها ..انا عجوزة ..ومخرفة ..الدكتورة كمان زيي؟؟) . ..(في شنو يا مناهل ..مالها حبوبة زعلانة )..تحدثت مناهل اخيرا (حبوبة سمعت رشا زوجة حسن خالي ..بتقول ليهو في التلفون عايزة شنطة يد لونها كلبي ..حبوبة قامت فيها كيف وكيف ..تقول لي حسن ولدها كلب ..من قبيل عايزين نشرح ليها ..انو في لون اسمو كدا ).

اتى على الانسان حين من الدهر كانت فيه الألوان دون زيادة او نقصان …هي ألوان الطيف السبعة ..احمر واخضر وازرق ونيلي وبرتقالي وبنفسجي واصفر …بالاضافة الى الأسود والبني والأبيض ..وكان الله يحب المحسنين..فخلف من بعدهم خلف أضافوا التركواز ..والفوشيا ..والمستردة …وهلم جرا ..التي صارت بدورها من ذكريات الزمن الجميل ..فقد اظلنا زمان انتهى فيه عصر الانتساب الى النبات مثل الاخضر الزرعي ..والأصفر المنقاوي وصارت الألوان فيه تنسب الى الحيوانات ..
أقرب مثال اللون الكلبي ..والنمري ..والزيبرا ..الذي يمثل المخطط كحمار الوحش…ولا ندري ماذا يخبيء لنا المستقبل القريب ..وان كنت اتوقع المرور بكل أقسام كلية العلوم بعد ان اكملنا قسم النبات والحيوان ..تبقي لنا قسم الحشرات وعما قريب سيكون هناك اللون (النملي ) واللون (الذبابي).

تذكرت ابنة اختي ..التي كانت تخطط لزواجها .. املتنا لون فستان مرافقاتها من بنات الخالات بالهاتف (يا خالتو اشتري لي هندوية ..فستان لون تيفاني) ..تحرجت ان أسالها عن ماهية اللون التيفاني ..فقد قالته كأنه شئ متعارف عليه ..عندما رافقتنا (هند) الى السوق ..كانت تفتش بثقة العارف ..حتى وجدت فستانا ..اشارت اليه وقالت دا مناسب ..عندها هتفنا انا وزوجي بصوت واحد (طيب ما تقولوا لون زينب) ..فما كان من هند الا قالت متسائلة (زينب منو؟).

من أين تأتي تلك الأسماء ؟ ..ومن هو ذلك (الفايق الرايق) ..الذي يطلق هذه المسميات عليها ونتبعه نحن دون تفكير؟ ..ويجعل حاجة نفيسة تفقد أعصابها في هذا الصباح الندي ..وقد كنت امني نفسي بقهوة مظبوطة وونسة من الزمن الجميل ..(يا حاجة نفيسة ما تزعلي ..اهو الموضوع طلع سوء تفاهم ) ..لوت فمها وقالت (اصلها البت كلامها كلو معوج ..هسه في ذمتك ..لون الكلب دا شنو؟ ..يشبه شنو ؟ ) ..ضحكت من الأعماق ..انا فعلا لا أعرف ..واعتقد ان الكلاب كثيرة وألوانها متعددة ..لكن نقول شنو ؟ مخير الله في حكمو ..

استطردت حاجة نفيسة (اها اتذكرت كمان حاجة ..اليوم داك ..قالت لي ..يا حاجة انا عايزة اجيب ليك في عيد الام توب كلكي ..ما ياها قاصدة الجن الكلكي ؟ الجن اليحبسوها بيهو في التجاني الماحي بركة سيدي المكاشفي) ..(كلكي ؟ مافي لون اسمو كدا يا حاجة..انت يمكن سمعتي غلط) ..(وحاة سيدي الحسن قالت كلكي) ..اتت مناهل وهي تحمل (عدة الجبنة) ..سألتها (مناهل ..صحي ..رشا قالت لي حاجة نفيسة لون كلكي؟) ..استغرقت مناهل في الضحك ..وقالت من بين ضحكاتها (ليلكي ..قالت لون ليلكي يا خالتو) …شاركتها الضحكات بينما حاجة نفيسة تتمتم متذمرة (قالت كلكي ..سمع اضاني) …من بعيد تناهى صوت الراديو يغني (الصباح الباهي لونك ..وضاحة يا فجر المشارق)>

ناهد قرناص