صحيفة السوداني تصطاد (أصغر) عريس في السودان وتخرج منه بالمثير!
في البدء لفت الأنظار بلجبابه الناصع البياض وأياديه وأرجله المخضبة بالحناء و الهلال الذي يزين جبينه والحريرة التي تحيط بمعصمه، فتى نحيل الجسم يبلغ من العمر 15 عاماً ، تبدو على ملامحه علامات الطفولة والبراءة مثبتاً ذلك بلعبه البريء بين أقرانه داخل حوش المدرسة التي التقيناه فيها وهو حافي القدمين لم يخلع عن جسده النحيل جلباب العرس وما زالت الحريرة في يده والهلال على جبينه، اقتربت منه وهو وسط الميدان يلعب ثم ألقيت عليه التحية قبل ان يسبقني سؤالي :(أنت عريس؟) لتأتي إجابته صادمة بالنسبة لصغر سنه ،أجابني بحياء شديد و بلغة أهل الريف البسيطة (أيوه..عرسي كان أول أمس).!…
باغته بسؤال آخر (عمرك كم سنة ؟) أجاب قائلاً : (عمري 15 سنة).!…بعدها دعوته للجلوس على أقرب كرسي في فناء المدرسة الشاسع الواسع ومن حوله زملاؤه الطلاب الذين كان يلعب معهم فكان بيننا الحوار التالي الذي دارت تفاصيله بقرية (أم ضلوع) تلك القرية النائية التي يسكن فيها وتقع ريفي أم درمان.!
ممكن تعرفنا على نفسك؟
اسمي حسن علي أحمد من مواليد قرية أبو ضلوع ،من أسرة بسيطة طلعت من المدرسة من مرحلة الأساس عشان اتزوج والحمدلله الآن أنا عريس، وما مشكلة حتى لو كنت صغيراً في العمر لأنها دي عاداتنا و تقاليدنا.
العروس عمرها كم سنة؟
العروس عمرها 13 سنة برضو ما كملت قرايتها عشان العرس أحسن ليها، لأنو رفيقاتها ألفي عمرها عرسن ما شاء الله لأنو عندنا عيب كبير البت تصل عمر معين و ما تعرس.
طيب ..في الخرطوم عندنا عادي البت بعد تخلص قرايتها بتعرس؟
لا، بناتنا ما زي بنات البندر ديلك بعرسن في أي عمر وممكن يشتغلن كمان.
الزواج مسؤولية أنت شغال شنو عشان تقدر عليها؟
من طلعت من المدرسة شغال في مجال الزراعة مع أهلي و دي شغلة الأغلبية، لأنهم بيأكلوا منها عيش و يربوا بيها أولادهم.
ماهي الحكمة في الإصرار على الزواج في مثل هذا السن الصغير؟
الزواج سنة الحياة وأغلب الشباب والشابات العرسن طلعوهم من المدارس عشان العرس، الصغرة ما مشكلة الواحدة تكبر في بيت راجلها أحسن ليها و تتعلم المسؤولية.
لكن التعليم أيضاً مهم؟
السترة قبل كل شيء و الزول من عرف يفك الخط ما في مشكلة تاني و كمان لو حفظ كتاب الله يكون أحسن كتير.!
على هامش الحوار:
في اليومين الماضيين أعلن البرلمان عن اتجاهه لسن قوانين للحد من زواج القاصرات وشدد على ضرورة تطبيق القوانين في كافة القضايا المتعلقة بالطفل وطالب الأجهزة التنفيذية والتشريعية بإجراء مزيد من الإصلاح القانوني على قضايا الأطفال، من جانبه أعلن نائب رئيس البرلمان عن دعم ومساندة البرلمان كافة القضايا المتعلقة بالطفل، مشيراً إلى أن تعليم البنات يحد من زواج القاصرات، و نبه إلى ظاهرة زواج الشباب في وقت مبكر بالريف.
حوار: محاسن أحمد عبدالله
السوداني
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة