المزارع “ابراهيم الميرغني” يدعو المواطنين للاهتمام بالانتاج وترك الحكومة لتعمل

” قيمة مضافة”
واجبي وواجب كل مواطن سودانى أن يتوجه للإنتاج ( الآن ) و ده الدور المطلوب مننا كلنا ولما نقوم بالعلينا ونبطل نكون عبء مادى ومعنوي ونتحول لقيمة مضافة وقتها بيحق لينا نحاسب حمدوك وحكومتو “اذا قصروا ” ..

اذا جينا نزرع وما لقينا الجاز والتيراب والسماد بى السعر المناسب وفى الوقت المناسب وقتها نحاسب ..

ولو جينا نصنع والكهربا قاطعة والجاز بالسوق الأسود ومدخلات الصناعة محجوزة فى الموانئ والضرائب والجمارك تقصم ظهر الصناع أيوه نحاسبو ..

اذا جينا نتاجر والعطاءات مقفولة لى فلان والرخص لى علان والشغل سمسرة وعمولات لازم نحاسب ..

ولو الشباب عاوزين يبتكروا ويقدموا حلول ذكيه لى مشاكل الإنتاج عبر ال ICT والأبواب اتقفلت فى وجوههم ده وقت الحساب ..

وكان الرعاة نشقًوا وطلبوا رزق الله فى مراعي السودان الخصبة وانعدمت الامصال والرعاية البيطرية المتجولة وطاردتهم الجبايات فى خلا الله الواسع يبقا فرض علينا نحاسب .

أما الآن فرض (عين ) مش فرض كفاية على كل مواطن سودانى قادر ينتج نمشى الاول نشوف شغلنا ونخليهو وحكومتو يشوفو شغلهم ، (وقل اعملوا فسيرى الله عملكم ورسوله والمؤمنون )
صدق الله العظيم

ابراهيم الميرغنى
مزارع سوداني