امير عبد الماجد: حمدوك فشل وحكومته كيسها فاضي

سبحان الله كنا ننتظر مايقوله تجمع المهنيين وننظر له باعجاب واحترام وسبحان الله افتقدنا هذا الاحترام ليس فقط الان بل قبل ان يخرج علينا الاصم والتاج ليعلنا ان تجمع المهنيين اصبح ساحة صراعات.. كنا نشاهد خلافاتهم وتكتلاتهم وسيطرة حزب علي قرارات التجمع وليس فقط قرارات بعض الاجسام داخل التجمع كنا نري تململ بعض منسوبي الاحزاب الاخري من اعضاء التجمع ونستمع لشكاويهم وللاسف هذه الخلافات ليست خلافات لان التجمع يجب ان يضم كل القوي الحية للمجتمع ويعبر عنها بل خلافات لان مرشحي التجمع هنا كلهم شيوعيين وهناك كلهم بعثيين واتجاوزونا في ترشيحات لجنة التفكيك وماقدموا زول مننا في لجنة الترصيص .. حتي ظهور الاصم والتاج الان ليس من اجل تصحيح المسار بل في اطار الصراع داخل التجمع للاسف.. يعني في اطار الشكلة المدورة واتوقع الطرف التاني في الشكلة حايعمل مؤتمر صحفي برضو .. لذا لاتتوقع بعد الان من تجمع المهنيين شئ.. حايبقول تجمعين بينهما ماصنع الحداد.. تجمع شيوعي واخر بعثي وجمهوري و مؤتمر سوداني هذا هو الواقع الذي جعلنا نعيش تجربة لو قال لنا اي زول انها ستحدث في حكومة بع الثورة لاتهمناه بالجنون… حتي قوي الحرية والتغيير لم تعد لها قيمة لاهي لاحكومتها الباهتة التي يقودها رجل كل البقدر عليهو كلام رومانسي من اغاني السبعينات.. لو اترصرصنا واتلمينا بنعمل حاجة كويسة وكلام موهوم ومهوم مابجيب ليهو رغيفتين.. حكومة لاقادرة تحاسب ناس لغفوا لامن اللغف ذاتو فتر لاقادرة تقول القتل المعتصمين منو ناهيك عن تقديمهم للعدالة ..

لا قادرة تحسم ملف معايش الناس.. الازمة تختفي يومين ترجع اسوأ.. ازمات مستمرة لاتنتهي مافي ازمة انتهت حتي الكهرباء قطوعات شغالة يوميا خبز صفوف بنزين كله تجاري والصف قاعد ورباطة بقلعوا من الناس في الشارع عيني عينك وصرافات مافيها قروش وصيدليات مافيها دواء وناس حابسنهم في البيوت القروش العندهم انتهت ودكاكين استغلت ازمة البلد بصورة مريعة.. الاسعار بترتفع علي راس الساعة مافي سلعة عندها سعر..

الناس عندهم اطفال مابيعرفوا كورونا وحمدوك فشل وحكومة كيسة فاضي.. اطفال عايزين ياكلو.. عموما اتوقع بعد الاسبوعين يجي الفاشل الاسمو اكرم يقول ليهم مددوا الحظر تاني اسبوعين.. بمناسبة اكرم مالاحظتو انو وزارة الصحة اعلنت عن بروتوكول طبي لمعالجة كورونا للمرة الاولي بعد ما جونا الصينيين طبعا بكونوا اتخلعوا لما عرفوا انو اكرم البرتكول الطبي بتاعو كان بندول بس.. بدوك بندول يامت ياربنا كتب ليك عمر تاني.. واكرم حايقعد لانو اداءه بشبه حمدوك القال وزارة الصحة ارتكبت اخطاء في التعامل مع كورونا.. طيب وانت كرئيس وزراء عملت شنو لانو الاخطاء دي تسببت في موت ناس.. قعدت تتفرح وناديت اكرم شاكلتو.. وده برجع حياة الناس الماتت..

السودان فقد حياة ناس كتار بسبب اخطاء ناس فشلة اتسلطوا علي الثورة وركبوها.. ناس لاعندهم خطط لافهم يديروا الدولة كيف ولا عارفين الدول بديروها كيف شوية سياسيين من الدرجة العاشرة ب( كولتي) تعبان وتكنوغراط ناس منظمات ساي وورق ماعندهم معرفة بادارة الدولة علي الارض لعبوا بيهم العساكر.. تضحك وساطع الحاج بكابد عشان ينفي انو في طائرة اسرائيلية عبرت الاجواء السودانية و كان واضح انو المسكين ماعندو معلومة زيه زي ناس الحرية والتغيير وناس الحكومة مغيبين ماعندهم معلومة.. بدافع وخلاص..الثورة كانت اكبر مما تمخض عنها واعتقد انها بحاجة لتصحيح مسار لان هؤلاء لن يحققوا اي مطلب لو قعدوا مليون سنة.. واسمعوها مني بالاداء المتخبط ده والجو العام الملغوم ده لن نكمل الفترة الانتقالية.. اما ان تصحح الثورة مسارها وتتعامل كثورة او تستقبل مغامرة عسكرية مجنونة تقودنا الي ما انتهت له ليبيا.

امير عبد الماجد