ماذا فعل الشيخ محمد بعد اعتراض نسوة عن خطبة تحدث فيها عن التعدد وقالن له: بعد دا تاني مابنسمع ليك!

#ذكرياتي_مع_الشيخ_الوالد_محمد_أحمد_حسن رحمه الله ( 10 )
لمّا بدأت جائحة كرونا كان الشيخ رحمه الله يوصيني أن أُحصّن نفسي بالأذكار ؛ وكان يقول لي إذا خرجت من المنزل لاتنس أن تقول دعاء الخروج من المنزل ” بسم الله توكلت على الله ولا حول ولا قوة إلا بالله ”

أحد السائلين قال للشيخ حكم الصلاة في المسجد في هذه الظروف ووزارة الشؤون الدينية قد منعت صلاة الجماعة في المساجد ! فقال له الشيخ صلي في البيت لأنك ممكن تكون مريض وتنقل العدوى أو تكون سليم وتنتقل ليك العدوى من شخص مصاب ؛ ثم قال الشيخ : ( خليك من المرض الناس المالاقين ليهو علاج ده ! لو في زول داير منك قروش وخايفو يلاقيك ويحرجك لو مشيت المسجد وإنت ما عندك ماتسدد بيهو الدين ، يجوز ليك تصلي في البيت ! ) .

كان الشيخ رحمه الله يقول الذين يُصلّون صلاة التهجد أخفو عملهم عن أعين الناس فأخفى الله لهم الأجر والجزاء ثم يردد قول الله ( فلا تَعْلَمُ نَفْسٌ مَّا أُخْفِيَ لَهُم مِّن قُرَّةِ أَعْيُنٍ جَزَاءً بِمَا كَانُوا يَعْمَلُونَ ) .

في إحدى المرات قال لي أنه أصبح لايقوى الوقوف على المنبر وأنه قد اعتذر لجماعة المسجد إلا أنهم رفضوا قبول اعتذاره وقالوا له أخطب لنا الجمعة وأنت جالس ..

قال الشيخ في إحدى الجُمع خطبت عن التعدد قال ( جاءو النسوان عند مدخل الخطيب وقلن ليهو والله ياشيخ نحنا كنّا بنحبك لكن بعد الخبطة دي تاني مابنسمع ليك ! قال قلت ليهن تاني مابتكلم في الموضوع ده ومن يومها بقيت بقيف في صفهن ..) .

كان رحمه الله ينزعج من الشائعات التي تخرج عنه أنه توفي وكان يقول لي ( عليك الله أنفي الخبر ده في صفحتك لأنو الناس منزعجين من الموضوع ده وقاعدين يتصلو وفي ناس جونا في البيت لما سمعو الشائعة ! ثم يقول : الله يهديهم الناس ديل مستعجلين يقتلوني قبل يومي ليه ؟! .

كنت لما أستقبل الأسئلة عن طريق الآيباد من الفيس بوك كان يقول ( ماشاء الله تكنولوجيا متطورة ) ثم أصبح كل ما يعجبه شيئ يقول تكنولوجيا متطورة ..
رحم الله الشيخ رحمة واسعة ..
وللذكرى بقية …

✍️ / محمد عثمان