شركة جينيس قلوبال في الخرطوم.. ناس عايزين يغتنوا من بيوتهم!!

ده إيفنت لشركة جينيس قلوبال في الخرطوم..
تخيل يامؤمن القاعة دي كلها ناس عايزين يغتنوا من بيوتهم!!
المنشور ده قديم بس حأعيده مع التعديل.. عسى ولعل واحد -واحد بس- من الناس الحضروا السمنار ده يشوفو..
قبل تبيع دهب الحاجة وموبايلات أخوانك عشان تشترك.. في حاجتين مهمات لازم تفهمهم:
– التسويق الهرمي هو اسم ملطف لعملية احتيال بونزي ( Ponzi scheme)..
– التسويق الشبكي هو إسم ملطف للتسويق الهرمي.
أي شركة أو مؤسسة بتستخدم الأسلوب الهرمي، دي شركة بتمارس عليك عملية احتيال ممنهجة..
كيف تقدر تميز الشركات دي:
1 – شماعة المنتج..
بسوقوا لمنتج او منتجات وهمية أو غير ذات فائدة غالباً.. مرهم بعالج حب الشباب، والسرطان والرمد الطبيعي والهستيريا وآلام فقد الحبيب..الخ
في الواقع المنتجات دي ماهدف الشركة الأساسي، ووجودها غطاء عشان يدي شرعية للشركة ما أكتر..
زمان كانت الشركات الوهمية دي بتقدم المال للمشتركين مقابل إضافة أعضاء فقط.. بالزمن الموضوع إنكشف للناس، وصدرت قوانين دولية لملاحقتهم قانونياً .. فظهرت شركات “كيوت” حبتين.. بتعمل نفس التلاعب بس بواجهة (منتجات)..
بتعرض ليك منتج (غير مثبت كفائته طبياً) وبتجبرك انك تدفع مبلغ اشتراك (رمزي) او انك (تشتري) المنتج قبل توزعه.. والمبلغ بكون كبير جداً لأنو شراء المنتج تغطية ذكية بدلا عن أخذ المال مقابل إضافة غيرك..
مثلا: شركة بتطلب مبلغ اشتراك 500 دولار بمسمى اشتراك/ رسوم سمنار/ رسوم كامب.. الخ..
شركة تانية كيوت بتديك منتجات تكلفتها (10 دولار).. وبسموها الباكج الذهبي مثلاً.. ويلزموك انك تشتري الباكج بمبلغ 510 دولار..
كده إنت رجعت ليهم مبلغ التكلفة للمنتجات الوهمية + دفعت مبلغ الاشتراك بطريقة أذكى من المطالبة المباشرة.. (أحفظ الرقم 510 عشان حأرجع ليهو تحت)..
المهم انك تفهم انو الشركات دي بتاخد منك المبالغ دي بطرق مختلفة في النهاية..
2 – مداعبة أحلام الثراء السريع..
بستخدموا تكنيكات التنمية البشرية.. المتحدثين في السمنارات دي بكونوا متحدثين جيدين وناس نضامين لأعلى مستوى.. وكل كلامهم بكون تحفيزي جداً.. وغالبا بكون مؤسس الشركة وعلى درجة عالية من الثراء والبذخ.. سايق عربية آخر موديل وببتسم كتير وعندو غمازات..
أساليب زي الإيحاء والتلاعب اللفظي مع التحفيز النفسي.. على غرار: خلي عندك عزيمة وحتنجح، القرار قرارك الثراء على الأبواب وانت تستحق تكون غني.. لو عايز تطير بتطير بس قولها في سرك 3 مرات.. الخ
ويركزوا على ظروفك الصعبة والماديات الإنت محروم منها في البداية، عشان يقدموا ليك الحل السحري.. لازم يحصل تضخيم لفكرة إنك فقير ومحروم وفاشل في البداية، الفكرة دي حتترسب لعقلك الواعي والباطن، ومع الإبهار البقدموه ليك في القاعة (مظاهر بذخ شديد غالبا أو بنوته سمحة مليانة مساحيق تجميل) حتحس إنو الناس ديل عارفيم بعملوا في شنو وحتجيهم مدردق..
الخطوة التالية هي (المزامنة العاطفية).. وهي -يا أخا العرب- انو يحكي ليك كيف انو: أنا زمان كنت زيك.. مالاقي حق التمباك.. ظروفي كانت صعبة.. حبيبتي خلتي عشان مفلس وعرست صاحبي.. لكن فجأة صحيت من النوم وقررت إني أتغير وأبقى .. الخ الخ الخ
القصة الملحمية للثراء البحكيها ليك بعد “فجأة صحيت من النوم وقررت إني أتغير” دي إسمها (الحافز).. بجي بعد المزامنة العاطفية عشان يشعرك انك ممكن تبقى زيو بأسهل مايمكن .. (ده نوع من أنواع نظرية العصا والجزرة كمان بس بأسلوب أعقد شويه) ..
بتحصل ليك عملية ربط لاواعي بين ثراءه وبين إضافة ناس معاهم.. شفتها بسيطة كيف..!!
#بي_اس: الحديث في السمنار مابكون عن السلعة، في الواقع السلعة بتاخد وقت بسيط من زمن الإيفنت غالبا.. لكن أغلب الكلام بكون عنك إنت..
إنت السلعة..
إنت ضحية خطاب ممنهج ومدروس مدعوم بمعرفية قوية بعلم النفس وأساليب الإقناع والإيحاء ولغة الجسد من نظريات التنمية البشرية..
وبترجع بيتكم راسخ دايخ من الوعود.. زيك زي أي مزه قعدت مع حبيبها النضام ساعتين تحت ضل النيمة..
3- تركيزهم الأساسي بكون إنك تضيف ناس عن طريقك موش انك تسوق المنتج.. فرق كبير بين انك تسوق منتج وتكون موظف تسويق غير متعاقد مقابل نسبة، وبين انك تضيف ناس كشرط لتسويق المنتج..
السؤال المفروض تسأله لنفسك هنا: ليه؟
ليه ما تاخد المنتج وتبيعو وتاخد نسبتك بكل بساطة؟
ليه بتلزم انك تشتريه أول؟
ليه الإصرار على إضافة أشخاص أكتر من تسويق المنتج.. وليه آخد قروش من إضافة ناس..
الفكرة ببساطة لأنو ده الإستثمارالحقيقي للشركة.. إتخيل الشركة حوض جرجير كبير.. الحوض فيهو تفرعات أو جداول صغرى كتيرة هي الأعضاء.. المشتركين الجدد هم البابور البضخ الرافد المائي (المال) عشان يسقي باقى الحوض ومايفيض يذهب للتفرعات.. لمن كل جدول (يجلب) رافد مائي/ بابور لوحده بتزيد نسبة الضخ في الحوض الرئيسي (الشركة) وبزيد هامش الجداول..وكل طرمبة ضخ جديدة بتجي بظهر جدول إضافي مقابلها لمن يقيف ضخ الماء بتجف الفروع أولاً ثم الحوض.. بالتالي بتحصل (متوالية هندسية) بتتطلب الضخ إلى مالانهاية..
الدائرة دي ممكن تستمر إلى مالانهاية كلما توسعت الشبكة، وبتتكسر الدائرة في اللحظة البتوقف فيها انضمام مشتركين جدد.. عشان كده أي شخص بتعرفوا انضم لشركة زي دي بستميت انو يضيفك، بكون صاحبك غالبا (وده لأنو الشركات بتنصح أعضائها بإنهم يركزوا على أصحابهم لأنهم بمنحوهم هامش ثقة كبير من البداية).. وبكون مستميت لدرجة اللزاجة والعباطة مرات في إنك تنضم ليهم..
(حيرفض يشرح ليك شئ بالتلفون، وحيطلب منك تتلاقو فيس تو فيس بالتحديد، لأنو نسبة الإقناع بتكون أعلى والوقت المتاح أطول – دي نصائح أساسية في عمليات الإقناع في التنمية البشرية)
والسبب لقى نفسو دافع 510 دولار في بضاعة قيمتها ما بتفوت ال10 دولارات، ومابلقى زبائن بطبيعة الحال، فبحاول يضيفك انت عشان ياخد حافز من الشركة يغطي خسائره.. بالدارجي، الشركة (بتبتز) الأعضاء بطريقة غير مباشرة لإضافة الأعضاء الجدد .. بالتالي هو بستميت انو يضيف أي زول عشان يطلع من الورطة دي عن طريق توريط غيره..
زي ما مرضى الطاعون في العصور الوسطى كانوا بقتحموا بيوت الأصحاء، عشان ينقلوا ليهم المرض ويشفوا هم زي ماكانوا بتخيلوا..
نفس الفكرة أعتقد..
#بي_اس: غالباً الناس الإشتركوا بتحصلوا على عوائد في البداية فعلاً، وبياخدوا أرباح كبيرة بالجد.. الأرباح دي مابتدفع منها الشركو مليم واحد، لكنها تدوير لمدفوعات الأعضاء الجدد (طاقية ده في راس ده) .. والفكرة بناء الثقة، ومداعبة روح المقامرة في المشترك عشان يتحمس ويستثمر المزيد.. من ناحية تانية يكون نموذج نجاح لأصحابه اللي هم الأهداف التالية للإنضمام للشركة.. عملية النصب بتحصل للكل وفجأة لمن أصحاب الشركة يجمعوا مبلغ معين.
.
#نصيحتي_ليك
ماف بزنس حقيقي بكون بالطريقة دي..
أساس أي إستثمار في الدنيا خطوات معينة: رأس مال – منتج/ خدمة – بيع – هامش ربح.. أي اضافات غير كده معناها الموضوع ما بزنس وإنت بتتلعب..
ماف قروش بتجيك وإنت نايم في بيتك مالم تكون وارث، أو أبوك النفيدي..
ماف دخل بدون إنتاج..
ماف شركة في الدنيا بهمها مستقبلك.. البهم المقابل المادي البتقدمو ليها.. الإبتسامات والظرف المبالغ فيهو و (عايزنك تنجح) ده عشان جيبك ماعشان عيونك العسليات صدقني..
ماف صديق بتسلط عليك بالطريقة المحمومة دي عشان مصلحتك.. الإلحاح ده (to save his/her ass) ما أكتر..
خليك طموح أيوه.. بس كمان خليك واعي..
اللحظة البتسمع فيها عبارة ضيف ناس تحتك.. عضي جلابيتك، وسفنجاتك في يدك وغسل بكلو..
وماتنسى تعمل #شير للمنشور أو نسخ ولصق أو أفهم الخطوط العريضة.. لو عندك صاحب أو زول عزيز عليك ناوي يدخل في الدوامة دي.. ده الغرض من البوست.

بقلم
مهند رحمه