بابكر سلك

جمل العصارة!!


] مجالس المدينة (المضلمة) من فرط قطوعات الكهرباء وضعفها إن وجدت.
] الكهربا حتى إذا جاتك بتكون ضعيفة ونحيفة وقادة عربي.
] تسمع التلاجة تج تج توج توج توج.
] تج تج تشتغل .
] وتوج توج تبطل.
] ياخ اللمبة تكون مية شمعة .
] تلقاها مولعة شمعة واحدة.
] المكيف بجيب سموم.
] لأنو موتورو بكون لافي براااحة زي جمل العصارة.
] أما الاسبليت.
] أسكت بس.
] تقول قاعد مع الوالي .
] مابقوم كلو كلو.
] سماحة جمل الطين.
] ولأن الكهربا قاطعة عادة .
] وضعيفة ان وجدت.
] أصبح اسم مدينتنا المدينة المضلمة.
] المهم .
] مجالس المدينة لاحديث لها إلا عجب والرشيد وأبوعشرين.
] وقعوا مع الهلال.
] لأ .
] لم يوقعوا لن إتفقوا ساي .
] ما إتفقوا ساي.
] قبضوا ووقعوا على إيصال استلام مال.
] لكن ما وقعوا.
] ويدلف الحديث إلى صحة توقيعهم(إن وجد) من عدمو.
] وهل الفيفا حاتسكت حال رفع الهلال أليها الأمر.
] أيها الناس.
] وقبل كلو شيء.
] اللاعب أكل عيشو في كريعاتو ديل.
] إلا أبو عشرين.
] وبالتالي قصة نفترض الولاء في عهد الإحتراف دي فيها ظلم للاعب.
] أكيد الزول بشوف محل مصلحتو المهنية وين.
] وبالتالي حقو مانضغط على اللاعبين.
] من منا جميعاً ومن منكم أجمعين.
] ترك فرصة عمل أفضل بمقابل أكبر ولاءً لمكان عمله القديم؟.
] ياخ أستاذ مدرسة محترم في البلد دي بترك التدريس ويشتغل راعي في السعودية يسرح ليهو بتلاتة جمال وتيس تحت شجرة واحدة بين الجبال.
] يبقى ماتظلموا اللاعبين.
] نرجع للموضوع بفرض أن اللاعبين وقعوا عقوداً مع الهلال.
] هل يحق للاعب المنتهية مدتو أن يتعاقد أثناء سريان عقده مع ناديه القديم؟ أم يحق له فقط التفاوض؟.
] وهل تحكم مثل هيك حالات قواعد الفيفا أم لوائح الإتحاد السوداني؟.
] مع العلم بأن الأطراف مافيهم طرف أجنبي.
] كلهم وطنيين.
] المريخ وطني.
] ورمضان وحمو أولاد بلد .
] وقد يقول قائل الهلال جاب للوطن شنو عشان تعتبروهو وطني. ] ونقول له معليش قسمتو.
] المهم.
] السؤال الأهم في موضوع حديث المدينة هو
] شنو الأجبر اللاعبين على التفاوض مع الهلال ياسوداكال؟.
] المهم
] حقو ماتنسينا الثلاثية البطولة الإفريقية.
] تلاتة أسابيع وداخلين من التمهيدي.
] السنة دي ريحة المطار يجب أن تكون عطراً للشفوت .
] تعالوا نتلملم شوية ونقرب على بعض.
] عسانا بل لعلنا نلتقي بالمطار.
] لقاء أشتقنا له .
] وما أحلى لقاء الشفوت بالمطار.
] المطار.
] المطار ده شعراً ماعندكم ليهو رقبة يافطومة.
] دربو ساي مابتعرفوهو بي وين.
] ممكن تتخلوا عن صفركم ياروشا.
] لما المطار يتحول لموقعة الجديد ويباشر أعماله بمنطقة الصفيرا.
] لأنو لو شلنا منها الياء والراء بتبقي صفر يامحمد عبدالماجد .
] أيها الناس .
] لا أحب أن أتدخل في الشأن الفني.
] ولكني أريد فقط أن أعبر عن وجهة نظري كمشجع مريخي.
] حراسة المرمى أهم خطوط اللعب الإفريقي.
] تأمينها يحتاج للخبرة.
] ويحتاج لمهارة الشباب.
] من حيث الخبرة والولاء لا أرى منافساً لأكرم(إذا) إنضبط. بالذات أكرم صاحب خبرات دولية والكبر حسنات .
] ومن ناحية مهارة الشباب.
] زكريا حيدر هو الأول والأوحد.
] فهمتوني.!
] المهم .
] الهلال برضو حيبدأ من التمهيدي.
] لكن صدقوني.
] جماعتنا السنة دي ببقو زي كلب الليدو.
] بعد تعب يجيبوا ستة ويمرق الكلب .
] ستة ويك.
] وينضرب في اليك بي دو لابد ورا البيت .
] ده ماتيم بشارك خليك من ينافس.
] أيها الناس
] إن تنصروا الله ينصركم.
] أها.
] نجي لي شمارات والي الخرتوم.
] تعرف يا والينا.
] قبلانين بزيادة البنزين طالما برقد لينا.
] ونحيطكم علما يا والينا.
] قبلانين بزيادة المواهي حتى لو مارقدتوها لينا.
] شالوم شديد ياوالينا .
سلك كهربا
ننساك كيف والكلب قال شالوم مالو حركتو تقيلة كده
وإلى لقاء.
سلك

بابكر سلك – صحيفة الانتباه



اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *