هاجر سليمان تكتب: العرسة التانية مهمة!

أعلم جيداً ان هجوماً عنيفاً ستشنه بنات حواء ضدي في هذه الزاوية التي سأكتبها واعلم ايضاً ان زاويتي هذه ستريح الرجال جداً جداً ولكن ما باليد حيلة والباقي باقي وعلينا ان نرضى بالواقع ، تعالن هنا هوي يا بنات حواء واسمعن كلامي ده في ظل الظروف التي تعاني منها البلاد الآن لامانع من ان يتزوج رجالنا من الزوجة الثانية لعدة اسباب اسردها لكم في الآتي وبالدارجي كمان يلا تعالو هنا كلكم رجال ونسوان ..
اول شي العرض اصبح مغري جداً والسوق مليان بنات وفي ندرة في الرجال نعم الرجال وليس (الذكور) ومع الفسخ والجلخ ده بقن كل البنات سمحات وما في بت شيييينة عشان كدة اصبح الدبل واقع أخير مما تخلن رجالكن يباروا البنوت بلا عرس ويكملوا قريشاتهم في العزايم والمشروبات الساخنة والباردة وحق المواصلات وحق الكريمات وحق اللبن زاتو ..
اسمعن هنا يا (حروم) اي واحدة فيكن مادخلت قروبات الفيسبوك زي قروب (الشلابات) و(اتجاوزتيهو كيف) و(الحاصل بي والحاصل بيك) و(مشاكل وهموم) وغيرها من القروبات حقو تدخل يمكن تلقن رجالكن حايمين هناك وتشوفو خيانتهم بعيونكم تقروا وتسمعوا وأوعاكن تبكن ، الجيل الجديد ده بناتو سمحات ومجيهات ويسرقن الكحل من العين والرجال بقت قلوبهم خفيفة وهم زاتهم خفيفين زي شاي البكاء وقاعدين على الهبشة كمان لذلك يعرس التانية برضاك ويقسم الايام بيناتكم بما يرضي الله احسن مما يقوم يلف ويدور ويفعل الأفاعيل وتسدي الدين انتي ولا واحدة من بناتك .
نحن والله في زمن القابض على دينه كالقابض على الجمر والمغريات كثيرة في الشارع العام وخاصة في عهد (القحاتة) ديل، ومافي واحدة تجي تقول لي راجلي بيخاف الله وراجلي ماشايف غيري وراجلي متدين (متدين كم ومن ياتو دكان يا حبيبة؟!) وسيد الدقن ده بالذات لو دقنو حصلت ركبتو ماتصدقيهو إلا من رحم ربي، فيا ستي الفاضلة الراجل وهو جاي عليكي اول شي بيعملوا بيدخل الواتس يقوم يمسح الدردشات كلها ويحظر (الجكسويات) ويمسح الونسات من المسنجر ويمسح المكالمات ويسلمك التلفون تسليم مفتاح مافيهو اي شي تقلبيهو يمين شمال مابتلقي اي شي ويومياً هو بيعمل كدة عشان ما تكتشفيهو يا (فارة) لا بيكل لا بيمل وده كلو عشان يحافظ على فشفاشو القاعدة في بيت اهلها ومتجدعه معاهو النهار كلو ..
طبعا الكلام ده واقعي وحقيقي ما تحاولو تنكروا وطبعا لو بقت على البنوت الصغار القصة هينة ومحلولة لكن كعب يقع راجلك في يد (خالة) شديدة وديل حقهم كعب شديد تاني ما بتلمي فيهو والمغارز بتهريك هري عشان كدة اخير بحلالو عارفاهو ماشي وين وجاي من وين ولا يتحاوم من كافتيريا لكافتيريا ومن شقة لشقة ومن زقاق لزقاق وكلو بما لا يرضي الله .
احياناً العرسة التانية بتكون مفيدة للزوجة الاولى يعني بدل ماتغسلي (2) دستة ملابس بتغسلي دستة واحدة والدستة التانية بتغسلها المرة التانية ويوم ليك بتكوني مستعدة على الآخر واليوم البيكون مع ضرتك هاك يا جبنات وقعدات وونسات وحوامة في الحلة ودردشات في الفيس والواتس والحنة والكوفير والنوم والتجدع بمزاج، بدون دوشة رجال وبدون وجع راس ، وبعدين يا اخواتنا مع الظروف الصعبة دي احتمال ربنا يفتحها على كل راجل متزوج زوجتين وبيخاف الله وما بيقرب الحرام ، وبعدين يا حريم الانانية مابتنفع معاكن اخوات بنات الوطن برضو وماجربن الزواج وبالتالي الواحدة فيهن كان لمت في عقاب راجل مرأة بتحمد ربها وانتي ذاتك بتكوني ساهمتي في الأجر فاتركوهم يرعوا الثانية يرحمكن الله
كسرة ..
أنا شخصياً موافقة اسمح لزوجي يعرس واحدة تانية غيري لو هو عايز !!

هاجر سليمان – صحيفة الانتباهة