بابكر سلك يكتب: صلاة العيد إلا يجيء الإمام براهو
] ياحليل رمضان.
] مافضل فيهو شيء.
] كمل ومافهمنا فيهو حاجة.
] للأمانة هو لما جا لقانا مافاهمين حاجة أساساً .
] تلاتا بدت وتلاتا عدت وتلاتا سردبت والجاية العدة في السهلة والبيت زي الشعر المنقوض كلو حته متجهة حتة والبعدها الستائر فوق.
] وشمارات الدنيا تحمل إلينا بشتنة كورونا لأهلنا الهنود.
] الدفن بالبوكلينق والحريق بالغابة والجثامين ماكملت.
] إحتفال الإخوة الهنود الملياري ورقصهم دون إعتبار الإلتزام بالتباعد الإجتماعي.
] أدى لإنتشار كورونا بينهم بسرعة إنتشار النار في الهشيم.
] وده حالتو نخرينهم صغاااار.
] حفلة زي دي لو كنا فيها نحنا بي نخريننا الزي كرعين الردا ديل.
] كان إنقرضنا في الفاصل الأول وقرضنا الكورونا ذاتها معانا.
] وعلي الرغم من أننا شعب مهمل لايلتزم بالموجهات والتوجيهات والإرشادات.
] إلا أننا شعب خواف جداً.
] القرض القرض أهلنا في الهند ده حايؤثر على تهجدنا.
] كل زول في جامع.
] والغريبة صلاة العيد.
] إحتمال الإمام يجيء براهو.
] نسأل الله الستر وأن يشفي المرضي ويحفظ الناس.
] عاينت لـ(فيديوهات) الهند.
] نظرت لي أهل سبنا و آي شواية راي وبريانكا شوبرا وديبيكا بادوكان.
] لقيت ليك ده شعب لاتستطيع أن تعيش بينه في تباعد.
] موش لو في كورونا.
] لو في لغم ذاتو.
] تتباعد كيف بس والجمال الجاذب ده يجرك زي المغنطيس.
] نحنا غايتو بي خلقنا دي مقومات التباعد متوفرة لدينا.
] لكننا لواييق ساي.
] أيها الناس.
] أنها الموجه التالته.
] والتالته واقعة .
] حقو نديها إعتبارها ونتبع الإرشادات عشان نعيش.
] مادايرين نموت قبل مانعرف آخرها شنو .
] دايرين نشوف لقطة النهاية مع THE END حايكتبوا شكراً حمدوك.
] ولا المخرج حايخلي كلمة النهاية لخيال المتفرج.
] مادايرين نموت قبل مانعرف آخرتها.
] لأنو هناك أكيد من سبقونا مع دفنتنا كده حايسألونا.
] حق الشهداء رجع؟.
] عرفتوا منو الأمر بفض الإعتصام؟.
] التعاون وسلعتي إتصالحو؟.
] الحاجات رخست؟.
] بقرنا ولحمنا لسة في الواجهة؟.
] محافظين على فشقتنا ولا فرطنا؟.
] الجنيه العام رسى على بر ولا لسة؟.
] وممكن نلقى سعودي في الآخرة يسألنا .
] من يحكمكم من آل سعود؟.
] نودي وشنا منو وين عاد؟.
] عشان كده أخي الكريم إلتزم بالتباعد والكمامة والموجهات إلى أن تلقى إجابة على الأسئلة أعلاه .
] لو مشيت بدون ماتعرف الإجابات على الأسئلة أعلاه حاتتحرج من ناس الآخرة ويعملوك مضحكة.
] المهم .
] الفيفا قالت شنووووو؟.
] أيها الناس.
] إن تنصروا الله ينصركم.
] أها.
] نجي لي شمارات والي الخرتوم.
] كان شفت ياوالينا.
] مافاهمين أي حاجة بقينا.
] والغريبة بنأكل ونشرب يا والينا.
سلك كهربا
ننساك كيف والكلب قال ياسلام على شعب كالأشجار مابيأكل وواقف حيلو ليهو ضل.
وإلى لقاء.
سلك
صحيفة الانتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة