بابكر سلك يكتب: ترويج أم إحتيال!

] الدعاية.
] أو الترويج عن السلعة .
] هو أسلوب تسويقي قديم.
] أتوجد قبل مايتوجد علم التسويق وفنونه.
] وطبعاً الدعاية بتزيد السلعة محلبية.
] عشان كدة زمان الناس كانوا بقولوا للزول المامقنع دعاية.
] يعني نجم كورة مثلاً يضيع قون أو تطول منو الكورة.
] تلقي الاستاد كلو يكورك دعاية دعاية.
] والقصة دي بتظهر كتير في مباريات الكورة لما أحد فريقي القمة يلعب في الولايات ويتغلب ولا يتعادل.
] تلقي الولاية كلها حول بص القمة تهتف دعاية دعاية.
] المهم.
] ضروري جداً في الترويج أن يظهر مزايا السلعة ومكوناتها ومقوماتها.
] قانوناً مسموح ليك تزيد المحلبية حبة.
] لكن قطعاً تكون مسؤول قانوناً إذا زادت المحلبية عن حدها .
] لأن الموضوع بقلب من ترويج إلى إحتيال.
] فما ممكن مثلاً تقول في عالم الفسخ والجلخ أن الخلطة بتاعتك مافيها صباعات.
] ويتضح أنو فيها صباعات.
] الواحدة البشرتها حساسة ومابتنفع معاها الصباعات. إذا استعملت الخلطة بناءً على الترويج المضلل وتضررت.
] فأنها تستطيع أن تعود على صاحب الخلطة المروج لها بالتعويض.
] لكن لو في الترويج مثلاً قالوا وشك ببقى زي القزازة.
] وجابوا لقطة لواحدة أساساً خلقة ربنا وشها قزازة. ده مابيعتبر إحتيال.
] مجرد ترويج لأنه لم يتناول مكونات الخلطة بالكذب.
] عشان كدة الفرق بين الترويج والإحتيال شعررررة.
] طيب.
] ناس الكهربا قالوا لينا كهربتهم ٢٢٠ إلى ٢٤٠. وقامت جاتنا أقل من ١٦٠ .
] الاسبليت مابتشغلو.
] الاسبليت الدفعنا فيهو دم قلبنا شان خاطر رمضان.
] الاسبليت الكلفنا ربع مليار جنيه.
] لما يبقى قاعد على الحيطة زينة ومسكن للعنكبوت.
] كلام ناس الكهربا ٢٢٠ إلى ٢٤٠ وهم عارفين إنو ١٢٠ مامضمونة ببقى ترويج ولا إحتيال؟.
] بالذات إذا واحد ترك صيام القاهرة وإشترى بحق السفر اسبليت معتمداً على تصريح ترويجي لمسؤول كهربائي بأن الكهرباء ستستقر في رمضان. وجاء رمضان.
] والكهربا في زواعتها لا استقرت ولا شيء. وعانى صاحبنا ويلات رمضان في السودان.
] وكلنا يعلم ماهو رمضان في السودان.
] الإتنين مابتلمن في ظل ترويج كهربائي يصل لدرجة الإحتيال.
] ماهو يارمضان يا سودان.
] والله لو كنا بنعرف حقوقنا كان كل عشرين مدعي عليه في محكمة .
] تلقي تسعطاشر منهم شركة النور. ويا حليل شركة النور.
] لسسسة ماسقطت.
] طالما الكهربا قاطعة ولم تسقط نقطة ماء من ماسورة .
] ناس الموية ديل كمان أكبر ماسورة.
] لأن معطيات الموية مصدر زائد شبكة توزيع .
] يبقى الموضوع ماصعب.
] ومافي حاجة اسمها مشكلة موية.
] المشكلة هي الناس الماسكين الموية وممسكننا الماسورة. الغريبة الموية لاترويج لا دعاية ولا إحتيال.
] قطع ناشف بكل قوة عين.
] وشهداء الثورة ينتظروننا في الآخرة وألسنتهم تلهج بسؤال.
] الموية والكهربا جنكم ولا متنا سااااي؟. بمناسبة الترويج دي.
] زمان كان التجار بنزلوا السلع القربت مدتها تنتهي للفريشة يبيعوها بأسعار زهيدة.
] صاحبنا أوهو أناناس فرشو جمب البوسته وقعد يكورك.
] الأنناس يا ناس العلبة بجنيه.
] أتجدع وجدع أولادك.
] الوكت داك علبة الأنناس كانت بستة جنيه. وصاحبنا ببيع المدتو منتهية العلبة بجنيه. جاهو واحد قال ليهو أديني عشرة علب. صاحبنا قال ليهو عشرة ليه؟وااااحدة بتقرضك أنت وأولادك .
] شوفوا الزول ده. برغم أنو ببيع سلعة غذائية مدتها منتهية.
] إلا أنو زول بخاف الله.
] لم يستخدم الترويج الإحتيالي ولا الإحتيال الترويجي.
] فرش بضاعتو وباع على عينك ياتاجر.
] وسيد البضاعة النزلها للفريشة.
] عامل ليهو مصلى في خشم الدكان وسيخة معلق عليها عشرين أبريق وشابك الناس الصلاة الصلاة.
] وكأن الله الذي يخدع عباده ويبيعهم السلع المنتهية الحاتوديهم في داهية.
] يختلف عن الله الذي يدعو الناس للصلاة تقرباً له.
] عشان الحتة دي أضم صوتي لأنصار الوحدانية وأقول.
] الله واحد ياناس.
المهم .
] المريخ لمعسكر القاهرة.
] وكلارك في إنتظاره هناك.
] شكراً تازي.
] أيها الناس.
] أن تنصروا الله ينصركم .
] أها.
] نجي لي شمارات والي الخرتوم
] عندكم كهربا يا والينا؟.
] طيب عندكم موية؟.
سلك كهربا
ننساك كيف والكلب قال طيب عندكم ضمير؟.
وإلى لقاء.
سلك

صحيفة الانتباهة