بابكر سلك

بابكر سلك يكتب.. المشكلة الشارع


*العام الرياضي الجديد أخاف أن يشبه العام الدراسي الجديد.

*لا استقرار.

*لاكتب.

*لاكنب.

*لاكراسي وبدأنا عامنا الدراسي.

*والطلاب قروا ماقروا بمشوا لقدام نقلاً للصفوف التالية.

*لكن في الرياضة ماقريت مابتمشي قدام وبتطير .

*وبقينا نطير أكتر من سودانير.

*ونتحدث عن نهضة وتجديد .

*ونحنا ولا هنا .

*عامنا الدراسي يشبه عامنا الرياضي.

*وسارينات ومسؤولين وفي إكس آرات وإعتقالات.

*وكلو ماجايب مريسة تامزين.

*أيام حكومة البشير كنت أضحك لما يوقفونا ساعة عشان في مسؤول جاي.

*وتجي السارينات مواتر وعربات.

*ثم اللاند كروزرات أمات بنادق مارقة قداديمة بالجمبة.

*ثم فارهة المسؤول.

*كنت أضحك على نفختو وعدم خجلتو على فشلو.

*لكني كنت مقتنع أن هذا الموكب يأتي حماية للمسؤول المتندل وسط الموكب.

*لحمايته من بطش الشارع لأن الشارع هو الوحيد الذي يتحمل فشل الحكومات ويدفع الثمن معاناة.

*ثم يتلاشى موكب الرصين والجماعة البجوا في الموكب مع الرصين.

*ويسمح لنا شرطي المرور بالمرور.

*وهو ذاتو يكسح .

*لأنو أساساً كانت مهمتو هي قفل الطريق لصالح موكب الرصين.

*لم تكن مهمته تسهيل حركة المرور. بإنسيابية تقلل بعض معاناتنا كبشر.

*وننطلق.

*من كل الإتجاهات ترى قدوم المطاليق متسابقين لكسب الوقت لإكتساب لقمة عيش كريمة برغم الإنطلاقة المجبرين عليها.

*تلك المشاهد لم تتغير بعد ذهاب الإنقاذ.

*لأنو أساساً مافي شئ إتغير.

*المهم

*ننطلق كمطاليق بسياراتنا مع اختلاف حالاتها وقيمتها وجمالها ومواكبتها للموديلات الحديثة.

*وجميعنا يعوقنا الشارع .

*الشارع مهما إتحايلت عليهو.

*ببقى ليك مشكلة وبمنعك من المضي في طريقك الذي رسمته لنفسك.

*فطريقك المرسوم على الورق.

*يختلف عن شارع الواقع الذي تسلكه.

*وقس على ذلك.

*كل الحكومات ترسم طرقاً على الورق

*ويفاجئها الشارع .

*الشارع وعر جداً.

*ضلام .

*حفر .

*مطبات.

*بواقي ترس.

*موية كاسرة.

*وخور بالجمبة.

*عميق جداً.

*وأنقاض.

*حقو المسؤولين في أية دولة يخلوا الرسم الخيال ده.

*ويتعاملوا مع الشارع كواقع.

*واقع ماثل لاتغيره الخطب الرنانة.

*ولاتردم حفره الوعود الكاذبة.

*ولا تعيد انترلكو سياسة الأمر الواقع.

*فالشارع واقع.

*أيها الناس.

*إن تنصروا الله ينصركم.

*علي الطلاق ينصركم لمن تقولوا كفانا.

*أها.

*نجي لي شمارات والي الخرتوم.

*والينا المكلف فينا.

*الأمريكية دي قالت متين حاينتهي تكليفك علينا؟.

*سبحان الله حلولنا بقت من بره بتجينا.

سلك كهربا

ننساك كيف والكلب قال قول كانت فاشلة…طيب كانت مكونة من مكونين ليه المكون التاني شريك الفشل لسة قاعد؟؟؟؟؟؟؟الحتة دي دايره ليها بطري أذن وحنجرة ومخ وأعصاب يشرحها لينا.

وإلى لقاء

سلك

صحيفة الانتباهة