بابكر سلك يكتب: معسكر منوت
الراحل منوت بول لاعب السلة المهول.
*كان إنساناً رائعاً بحق.
*وكان وحدوياً.
*لا يتخيل السودان منشطراً أبداً.
*كان يتفق مع قرنق حول سودان واحد.
*وكانت العنصرية كلمة لاوجود لها في قاموسه.
*كان رمزاً من رموز إتفاقية السلام.
*وكان داعماً للطفولة في كل السودان.
*وكان وكان وكان.
*وكان طويل جداً.
*حتى الشمس مرات تصنقع عشان تشوف منوت.
*كان قامة واستقامة .
*قال ليك مرة حسن بسبوسة قابل منوت.
*منوت كان لابس جلابية وطاقية.
*قالوا لحسن بسبوسة لو عرفت لون طاقية منوت ليك تلاتة كيلو بسبوسة .
*وحسن طبعاً ضعيف أمام البسبوسة.
*إتشعبط في منوت ماشاف لون الطاقية.
*طلع في كرسي ماشاف لون الطاقية.
*طلع رأس البيت ونطة ماشاف رأس منوت.
*رجع ورا بعييييييد وصنقع .
*إتفنقل على قفاهو وماشاف طاقية منوت.
*منوت كان جميل جداً وطويل جداً.
*أها من الوكت داك مافي شيء أطول من منوت في البلد دي إلا معسكر المريخ الحالي بالقاهرة.
*طيب شيء كويس أنو المعسكر يستمر في القاهرة.
*لأنو هنا دوري مافي.
*أندية للتجارب مافي.
*استاد للتمارين مافي.
*مع التروس دي التمرين إلا في (قروب الواتس).
*لكن المشكلة.
*طول فترة المعسكر وخارجي كمان.
*بتصيب بالملل.
*وبدعة إرسال اللاعبين على دفعات للسودان ثم عودتهم للمعسكر.
*هي بدعة حميدة جداً.
*لأنو فيها مراعاه للحالة النفسية للاعب.
*ودي طبعاً أهم زول في المعسكر.
*أيها الناس.
*معسكر بهذا الطول يعني دولار بهذا الطول.
*وتسجيلات.
*ومرتبات.
*وعلاجات.
*وإذا كان كل هذا الصرف من حازم منفرداً.
*تبقى كارثة.
*ويبقى ليهو حق يقول ممكن أديرو براي.
*وتبقى المعركة الإنتخابية ماكانت إلا لعبة كراسي للتشريف بدون تكليف.
*فهناك أسماء كبيرة ضمن المجلس.
*عيب يكونوا ضاربين طناش.
*وحازم يدير في النادي براهو.
*يبقى بدير بي حقو.
*ومن حقو .
*سواءً تسربت التسجيلات أو لم تتسرب طالما غيرو مافي زول سردب.
*أيها الناس.
*شفتوا ملاوي؟.
*ناس باتا ملاوي.
*الكنا بنغلبهم أيام بنشيل سيكافات بالجملة.
*شفتوهم ضد المغرب؟.
*وتقول لي إمكانيات وحنابيك؟.
*أيها الناس.
*إن تنصروا الله ينصركم.
*أها .
*نجي لي شمارات والي الخرتوم.
*والينا المكلف بينا.
*كمان جابت ليها عملة مزورة في الشاحنات (الزفتية)زي ماقالوا لينا؟.
*الناس ديل دايرين مننا شنو يا والينا؟..
سلك كهربا
ننساك كيف والكلب نبح لمن صوتو إنقرش والشاحنات تشحن ساااااااي.
وإلى لقاء.
سلك
صحيفة الانتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة