بابكر سلك يكتب: مصر مصر
*أها
*أمس اتكلمنا عن إنو ثقافة السودانيين من زمان بسوقوا عروساتهم مصر شهر العسل
*أها بعد يعسلوا برجعوا السودان
*ومن التقاليد التي لم تتغير
*العرسان بنزلوا في بيت ناس العروس
*وبيت ناس العروس طبعاً بكون برقش
*مجير ومبيض وأبواب الشارع بوهيتها جدييدة
*بصينوهوا للعرس
*المهم
*العرسان بنزلوا فيهو وبكرموا ليهم
*عادات جميلة جداً وفيها احترام لأهل العروس
*واشتهرنا في السودان باحترامنا لنسابتنا
*بالذات أهل العروس
*وكان أهل العروس ما احترمونا بنشيل حسهم
*مرة قامت شمطة بعد شهر العسل بين أم العريس وأم العروس
*أم العريس قالت لأم العروس
*احترمناكم يا يمة
*شيلة الأكل دي جبناها ليكم بهاراتا مسحونة
*والفول بالشوال منضفاهو بي إيدي دي
*الفحم غسلناهوا حتى جبناهوا ليكم
*احترمناكم شديد
*الكبكبيه حق الطعمية جبناهوا ليكم مفروم وجاهز
*الزيت ده جبناهوا ليكم مبرشم
*الجبنة دي جبناها ليكم كل الأنواع
*بيضا ومضفرة وموزريلا وجبنة اريش
*احترمناكم شديد
*لكن ما نفع فيكم
*أم العروس قالت لأم العريس
*شيلة الأكل ما جبناها ليكم كلها في فطور العريس
*يسمنا الطعمية ما ضقناها
*نطت أم العريس قالت لأم العروس
*فطور شنو الجبتوهوا؟
*الناس التمام بجيبوا فطور العريس بي شربوتو
*ياخ انتوا اللحمة الناشفة نشفتوا ريقها حتى جبتوها لينا
*تقول مستعملة
*الفول ده بلدوزر ما يكسرو
*وناااااشف زيت ما فيهو قرب يصلب كرنك
*احترام شنو؟انتوا بتعرفوا الاحترام؟؟؟
*فطوركم أحرجنا مع الضيوف
*دخلناهوا المخزن
*وطلبنا فطور عريس دلفري جانا بالجامبو حتى انسترنا مع ضيوفنا
*بتعرفن الاحترام انتن؟؟؟؟
*زمن
*حتى شكل النسابة كان ليهو طعم
*المهم
*المريخ بجي السودان متين ونازل وين؟؟؟؟
*أجبني يا محمد عبدالماجد
*وبمناسبة محمد عبدالماجد
*طبعاً لما المريخ يغلب الهلال محمد عبدالماجد بحتجب
*بعد تلاتة يوم بكتب لينا عن عثمان حسين
*وكترت الشغلة
*وأغاني عثمان حسين كملت قبل موقعة مصر
*لذا أطلب من ود عبدالماجد
*المرة دي يكتب لينا عن أغنيات الجابري
*أغاني جميلة وكتيرة بتغطي لمحمد مساحة كبيرة من مساحات خسائر الهلال المتوقعة
*أيها الناس
*الحياة الحقيقية بمعاناتها تبدأ بعد شهر العسل
*لذا علينا أن نفكر في ذلك جيداً
*حتى لا نفقد حياة وصلنا لها بعد مجهود جبار
*أيها الناس
*ولأن روح الثورة يتنفسها وطن
*نتمنى أن يرافقنا الهلال لمرحلة قادمة في البطولة
*لازم تشدوا حيلكم يا محمد عبدالماجد
*أما نحن
*فسنغسل السماني الصاوي ونختوا في الرف الى يوم العيد القادم
*العدة الجميلة بنمرقها للناس البنحترمهم
*أيها الناس
*إن تنصروا الله ينصركم
*أها
*نجي لي شمارات والي الخرتوم
*والينا المكلف بينا
*أوكرانيا مسكينة مسكينة وروسيا حقارة وسمينة
سلك كهربا
ننساك كيف والكلب قال أمريكا بالغت…. فتنت أوكرانيا في روسيا وزاغت
وإلى لقاء
سلك
صحيفة الانتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة