بلقيس حينما صرحت ان السودان بلد طيب ومضياف ولكن (إمكانيته بسيطة).. إنفتح عليها الشعب السوداني المُتنمر

#المكابرون #في #الفاضي ——-
تابعت حفل للفنانة بلقيس في عرض أزياء لمصممة أزياء أسمها زينب كان حفل جميل زي ما خططت له صاحبة الدعوة وحتي وإن كانت بلاي باك وكانت قيمة الدعوة 200 دولار هذا يدل أن الحفلة للمستطيع وهذا أمر مقبول المهم ان بلقيس كانت منورة ومبدعة والازياء كانت جميلة …
لكن المهم عندي حقيقة رأي الفنانة بلقيس حينما صرحت ان السودان بلد طيب ومضياف ولكن (إمكانيته بسيطة )حينها إنفتح عليها الشعب السوداني المُتنمر والمُكابر ينتقد ويشتم بأن السودان جنة عدن ومواردهِ يصدروا منها الي العالم بكميات ترجع علي السودان بالعملة الصعبة !!!!
ألم يعلم هولاء المتشدقون أن السودان بلد فقير وفي الفقر زايد حبتين هم لايعرفون ان نسبة الصادر للموارد السودانية تُحسب بأصابع اليد ..
هولاء الحالمون لايعرفون أنهم يمتلكون شوية ماشية وفول سوداني وشوية دكوة والذهب الذي يُكاد لايذكر مقارنة بالدول الاخري !!!
عندكم شنو إنتوا ورافعين نخرتكم السماء لما يجي يكلموكم عن الحقائق إنتوا بلد أباطة والنجم كان رضيتوا ولا زعلتوا دي الحقيقة …
عشان نفخة السودانين دي تنتهي مفروض يعرفوا حاجة واحدة الليلة العالم دا لو وقف مننا الإستيراد من القمح والغاز والبنزين تاني تأكلوا نيم بس ….
نحن بلد معتمدة لحد ما علي الهِبات والقروض والمنح
دولة واحدة لو قفلت البلف تاني الطلمبات إلا تسكنها الكلاب ودولة واحدة لو مسكت عليها قمحها تاني نحن الإ نربط حجر علي بطنا …
السودان غالبية سكانه يتعالجوا بره البلد والبقية بموت داخل البلد من إنعدام الدواء وكل الصيدليات والمصانع متوقفة أصلًا من سنين لأننا بلد فقير وإلتزامات الدواء غالية ….
ياخ الشهر الفات في باخرة في البحر ماكان في عملة لتسديد الفاتورة السودان كلو ظلام 😅…
بس نحن كسودانين عندنا البراميل الفارغة ضجيجها فوق وصوتها عالي الواحد ( يخت سفه) ويقيل في ضُل الصباح لحدي ينتهي وينظر ونحن كبنات ننتقد سااااي والسودان إصلاً فيه مشكلة كفاءات حتي علي مستوي البشر …
فقرانين ولسانا طويل في الفاضي 😒
ويشبكوك كرامتنا وعزة نفسنا وعام عيييك 😅
دي الحقيقة أنا كتبتها تابوها ترضوها ماشغلتي

عائشة الماجدي