شاهد بالفيديو.. (قال لو ما دفعتها ما بقدر أنوم).. موقف شهم لسوداني .. يسدد حساب بنحو 100 ألف جنيه لمجموعة بأحد مطاعم الخرطوم (دون سابق معرفة)

في موقف ينم عن الشهامة والمروءة، بادر شاب سوداني، بسداد فاتورة حساب الطاولة التي تجاوره بنحو 100 ألف، جنيه لمجموعة بأحد مطاعم الخرطوم، مساء أمس الاثنين، (دون سابق معرفة).

وحكى تفاصيل القصة الأمين يوسف، بحسب ما نقلت (كوش نيوز):

كنا في مطعم مأرب العمارات، كان عندنا برنامج صغير كدا وعددنا كان كبير لدرجة انو حجزنا تلاثة طرابيز  المهم بعد الأكل بدأنا برنامجنا و كان أي زول بقول كلمة صغيرونا كدا في وداع واحد زميلنا.

المهم في الطربيزة الجمبنا كان قاعد الزول الفي الصورة دا، كان مركز مع كلامنا والظاهر عجبو، بعد شويه ال waiter جاب صحن بتاع تحلية لينا وكان برضو جارنا دا طالب نفس الصحن، حصل غلاط بسيط كدا في انو دا حقنا ولا حققك، قام قال لينا والله تشيلو، وحسابو علي.

واحد مننا في شكل مزاح قال ليه الصحن بس ولا كلها
وهنا كانت المفاجأه، قال لينا علي بالطلاق زول يدفع حاجة مافي أكيد داير تعرف الفاتوره كم، المهم هو حلف ونحن حلفنا وقدرنا نقنعو انو حا نجيه يوم زيارة و يعزمنا، قال خلاص تمام لكن البارد علي
وفعلا طلب بارد لي عشرين شخص، ومعاها تحلية تاني..

القصه انتهت ؟!
لا لا طبعا
بعد عشر دقائق جا رب ختا لينا الفاتورة كوووولها وقال والله العظيم لو ما دفعتها ما اقدر انوم، وفعلا دفعها كلها، وادانا كرتو ورقم تلفونو وقال لينا السلام عليكم.

ياخ ربنا يكتر من امثالك، السودان دا لسا بخيرو  وبعادات اهلو الطيبين، والله العظيم مبسوط منو بسطة ما عشان دفع لكن عشان اكد لينا انو لسا الامل في، ما عارف أقدر اشكرو كيف غايتو اقل حاجة الزول ممكن يعملها انو يجي هنا ويحكي القصة دي ويدعي انو ربنا يفتحها عليه كمان وكمان.
الخرطوم: (كوش نيوز)