محمد عبد الماجد

عبدالصمد استقالتك ما بتفيدك


عبدالصمد استقالتك ما بتفيدك

> انتوا عبدالصمد دا اكرم؟.

> عبدالصمد دا سعيد السعودي؟.

> عبدالصمد دا ضفر؟.

> الزول دا مالو (استقال)؟.

> يا زول انت ما عندك أي (ذنب)..البخليك تستقيل شنو؟.

> سعيد السعودي طلع الكورة من القون ..ما في زول سألو.

> تجي انت يا عبدالصمد تستقيل.

> انت (كروجر).

> عبدالصمد دا خلي هسع …خلي للهوامش ..(عشان الموضوع ما بستاهل).

> ناس المريخ ذكروني ناس التلفزيون ..كل (48) ساعة يعملوا ليهم (اجتماع).

> يناقشوا فيها أي شيء ..عدا الحاجات المهمة.

> ديل بعد (الطيران) عملوا اجتماع ..ناقشوا فيه أي شيء ..المنشآت ..المناشط ..أي شيء …عدا الخروج من دور الـ(64).

> عبدالصمد (استقال)…مجلس المريخ عمل (اجتماع)..ناقشوا فيه تأهيل الملعب الرديف…واختصاصات مجلس الادارة والقطاعات …وقطاع الاستثمار ..ومحاسبة العاملين ..ناقشوا أي شيء غير مجدٍ …ولم يناقشوا (استقالة) عبدالصمد.

> عليكم الله في (تهميش) للزول دا اكتر من كدا.

> الاستقالة ما ناقشوها.

> برضو (التلفزيون) عندهم نفس الحركات.

> ناس التلفزيون ديل عندهم (شعور) رايح ليهم.

> يعني أي (ضيف) يجيبوه في التلفزيون ..اول سؤال يقولوا ليه : (شعورك شنو؟).

> الوزير بقولوا ليه شعورك شنو لمن سمعت الخبر؟.

> الخبر في حد ذاتو ما مهم شنو؟…المهم (الشعور).

> الزول البرجع من الاغتراب ..بقولوا ليه : (شعورك شنو وانت راجع للبلد؟).

> الشاعر البكتب قصائد بقولوا ليه شعورك كان شنو بعد اول قصيدة يغنوها ليك؟.

> الطبيب …يقولوا ليه شعورك شنو لمن تدخل العملية؟.

> لاعب الكورة …(شعورك شنو لمن سجلت الهدف)؟.

> شعورك شنو وانت تفوز بالجائزة؟.

> شعورك كان شنو اليوم داك؟.

> كمية من (المشاعر) والشعور.

> هسع يا جماعة انتوا شعوركم شنو لو الفاتح النقر دا طلع (مدرب اجنبي).

> الفاتح النقر دا لو عمل (ترشيد) لتصريحاته الكتيرة دي ..ممكن يبقى (مدرب اجنبي).

> لو عمل ليه ايميل.

> وعمل ليه صفحة في (الفيس بوك).

> ودخل (واتساب) ممكن يبقى (مدرب اجنبي).

> الموضوع بسيط …انتوا قايلين المدربين الاجانب ديل بختلفوا عن المدربين (الوطنيين) في شنو؟.

> الفاتح النقر لو خلى الهجوم على (الحكام) ببقى مدرب اجنبي.

> الفاتح النقر ..يتغلب يقول ليك (الحكام).

> يتعادل ..يقول ليك (الحكام).

> يفوز يقول ليك (الحكام).

> الايامات دي شايفو جاب ليه حاجة جديدة …الفاتح النقر بقى يقول ليك : (الحظ عاندنا).

> الحظ كمان يعملوا ليه شنو يا كوتش؟.

> انت ألعب كورتك ..وحكاية الحظ دي ..حكاية بتمر على كل الاندية.

> بالمناسبة انتوا بتشوفوا حكاية انو الفاتح النقر دا يبقى مدرب اجنبي ..بعيدة.

> رغم من انها اسهل حاجة.

> هسع الفاتح النقر دا لو مشى (تركيا) ما ببقى مدرب اجنبي.

> يمشي تركيا يعمل شنو؟.

> الفاتح النقر لو مشى تركيا ببقى (مشجع اجنبي).

> خلوها (تركيا).

> الفاتح النقر دا لو مشى اشتغل (مدرب) في كينيا أو يوغندا أو ارتيريا ..موش ببقى (مدرب اجنبي) في تلك الدول.

> يعني الحكاية ما صعبة.

> المدربون البصرحوا ..وبعترضوا …(المدربين) الكبار ديل …عندهم اعتراض ورأي انو اللاعب السوداني ما بنفع يحترف بره ..وما بنجح …وما عندنا لاعب عندو امكانيات عشان يحترف في اوروبا.

> نفس اللوم الذي يوجه إلى اللاعبين من قبل المدربين …نحن نوجهه إلى المدربين.

> ليه نحن ما عندنا مدرب سوداني بيدرب في الدوري الانجليزي.

> في الدوري الانجليزي يدربهم على شنو؟.

> إلاّ يدربهم على مهاجمة الحكام …وعلى الخروج بعد أي مباراة وهم برددوا عبارة واحدة (التحكيم فاشل).

> هسع الفاتح النقر دا لو مشى مسك في انجلترا (ليفربول)…تفتكروا ليفربول دا بعد شهر ح يحصل عليه شنو؟.

> ليفربول عن بكرة ابيه ..تاني ح يردد مقولة (التحكيم فاشل).

> محمد الطيب (مورينهو) لو مشى يدرب في ايطاليا …ح يخلي فريقو وينط كل اسبوع (عطبرة).

> محمد الطيب ما بقعد.

> محمد الطيب عندو اسلوب براهو في التدريب …اذا اعتبرنا اسلوب الفاتح النقر في التدريب هو مهاجمة الحكام..فإن محمد الطيب اسلوبه في التدريب هو مهاجمة الاجهزة الفنية في الهلال والمريخ.

> محمد الطيب دا كان عندو رأي في حسام البدري.

> حسام البدري فات.

> بقى عندو رأي في ريكاردو.

> ريكاردو فات.

> قبّل ليك على كروجر.

> محمد الطيب دا اتلّح ليك كروجر لمن خفضوا ليه مرتبه.

> طبعاً مورينهو بعتبر نفسه هو الاحق بتدريب القمة السودانية ..مفتكر الموضوع كلو في (الكرفتة).

> يا محمد الطيب (الكرفتة) ما ح تخليك (مدرب اجنبي).

> محسن سيد مدرب مريخ الفاشر …عندو اعتقاد تام في (الفنائل).

> في فانلة كدا خذلتو ليك.

> هسع قبل ليك على فانلة جديدة كدا …(مشخطة) غايتو الزول دا أي مباراة شفتو لابس الفانلة دي طلع غالب.

> مبارك سليمان مدرب اكثر من رائع ..لا بصرح ..ولا بتكلم في الحكام ولا في الفنايل.

> ولا بظهر كتير في الجرايد.

> لكن اخطر مدرب ظهر جديد …هو (جمال الوالي).

> موش عصام الحاج قال جمال الوالي هو البضع التشكيلة ..وهو البحدد الزول البقعد كنبة.

> الاهم من دا …جمال الوالي هو الذي بدفع القروش للزول البعمل الحاجات دي.

> والزول البدفع هو الزول البكون مساك (الريموت كنترول).

> ديل كلهم كوم ..واتوفيستر كوم براهو.

> طبعاً نحن الزول البنتلّحو لو ما رجعناه اهلو ما بنرتاح.

> عشان كدا اتوفيستر دا مسؤوليتنا نحن.

> زول عمرو (77) سنة جايبنو للمريخ يعمل شنو؟.

> أنا اول يوم سمعت الخبر …افتكرت (اتوفيستر) دا ماشي (البجراوية).

> افتكرتو جاء (سياحة).

> قلت يمكن عجبتو ليك حكاية جبل مرة ..وجبال التاكا…وجبل البركل.

> اصلو ما اتخيلتو ليك جايبنو (مدرب).

> تاني قعدت افكر براي.

> قلت يمكن يكون (مدرب) اسود.

> الناس البدربو الاسود غالباً بكونوا كبار في السن.

> رجعوا صححوا لي المعلومة.

> قلت يكون دا المبعوث الامريكي.

> المبعوث الامريكي كيف يعني وهو (الماني).

> الكلام دا كدا ما بجي.

> ما اتوقعت لحظة واحدة …يكون جايبنو (مدرب) للمريخ.

> يا جماعة ناس المريخ ديل قبل (7) سنوات انهوا التعاقد مع (اتوفيستر) عشان كبير في السن.

> الزول بمشي كبير ..ولّا بمشي صغير.

> يعني اتوفيستر دا في الـ (7) سنوات دي كبر ولّا صغر.

> قالوا ليك اتوفيستر …اول تمرين ليه في المريخ ..شاف ليك (هيثم مصطفى).

> صاحبكم اتلخم.

> الموضوع ما وقع ليه.

> قال يمكن عامل السن يكون خلاه يتخيل هيثم مصطفى جاء من الهلال إلى المريخ.

> افتكر الحكاية (كبر).

> تاني شعر ليك الموضوع في منتهى الجدية.

> صاحبكم افتكر (جمال الوالي) الزول الاتعاقد معاه مشى الهلال.

> اصلو ما اتخيل هيثم مصطفى يكون جا المريخ.

> زول بلعب (17) سنة في الهلال …وجمال الوالي في المريخ ليه (11) سنة.

> يعني اقرب جمال الوالي يمشي الهلال من هيثم مصطفى يمشي المريخ.

> اتوفيستر صدق الرواية دي.

> لكن تاني الحكاية جاطت ليه في رأسو…لقى ليك هيثم مصطفى لابس اصفر واحمر …ولابس (النجمة) كمان في صدرو.

> يا ربي الحصل شنو؟.

> في حاجة غلط.

> معقولة هيثم مصطفى بلعب في المريخ.

> اتوفيستر جرى على الشنطة …عاوز يشوف (عقدو) مع المريخ.

> اتوفيستر لقى ما في (عقد).

> اتوفيستر شغال في المريخ الان بدون (عقد).

> عقد شنو كمان مع زول عمرو (77) سنة؟.

> عليكم الله لو عملتوا (عقد) مع الزول دا …اعفوه من السفر إلى كادوقلي والفاشر وعطبرة ومدني.

> شندي القريبة دي ما تخلوه يسافر معاكم.

> الزول دا ما بقدر على الحاجات دي.

> قالوا ليك اتوفيستر مرة في تمرين المريخ …بلة جابر شات ليه كورة في (الكشافات) في السما.

> الناس الفى التمرين كلهم صروا (وشيهم)..إلّا اتوفيستر قعد يصفق.

> في واحد من اعضاء الجهاز الفني ..قال لي اتوفيستر يا زول انت بتصفق في شنو الكورة مشت (الكشافات) وانت قاعد تصفق.

> بعدين يا كوتش انت لو صفقت في كورة بلة جابر ..ناس رمضان عجب وراجي ديل تاني ما بشوتوا كورة في القون.

> الجماعة ديل تاني بقعوا (الكشافات).

> اتوفيستر استدرك ..وقال أنا ما بصفق لي بلة جابر الكورتو في السماء ..أنا بصفق لي (موسى الزومة) القاعد بره داك…عشان لو بلة جابر مشى قعد معاه برة بريحنا من الحاجات البعمل فيها دي.

> ملحوظة : امانة ما وقع مدرب.

هوامش

> خالد الاعيسر عبر برنامج (الشوط الحاسم) في قناة (قوون) مع خالد ماسا ظهر بصورة دعتنا نقول إن قناة النيلين لو انتقلت إلى البث الارضي افضل لنا.

> الاعيسر.. فَقَدَ تعاطف كل الذين تعاطفوا معه في ازمته مع قناة الشروق.

> ننصح الاعيسر ألا يظهر في فضائية مرة اخرى …لأنه لا يملك السيطرة على نفسه وانفعالاته.

> الذي يهمنا الان ان خالد ماسا ..يتألق بصورة واضحة في (الشوط الحاسم) والذي قدم من خلاله حلقات ساخنة ومميزة.

> عبدالصمد قال انه استقال تاني.

> هو انت رجعت …عشان تستقيل تاني.

> عبدالصمد يريد الاستعراض بالاستقالة.

> لقى الاستمرار ما فيها فايدة.

> قال يستقيل …(الاستقالة) بقى فيها اضواء وضجيج اكتر.

> مباراة الاحد اقتربت ..وعودة الهلال إلى الوطن كان فيها الكثير من المشقة.

> عودة الهلال اليوم الثلاثاء والمباراة تبقت لها خمسة ايام فقط.

> ….

> عاجل : ناس الهلال عليهم أن يعرفوا من الان أن الخروج من استاد الخرطوم اسوأ من الخروج من (التمهيدي)..اربطوا الاحزمة ..وشدوا حيلكم ..امامكم مواجهة صعبة.

وإن طال السفر – محمد عبد الماجد
صحيفة قوون


تعليق واحد