ونسات
نشتهر كشعب سوداني (معاصر) بـ(الونسة)، ونحترم كذلك تلك (الونسة) بصورة تدعو للدهشة والإعجاب، بل يمكن أن يصل احترامنا لها للدرجة التى تجعلنا نقيم الولائم ونفرد المساحات للعزومات لذات الغرض، (يعني ونسة مقيمة ومحترمة)، وخلال المساحة التالية سأحاول أن أصطحبكم في جولة سريعة لأبرز ونسات المجتمع السوداني، وهو اصطحاب يقوم مقام (الونسة) كذلك.
أولاً ونسة بيت البكاء
*انتي ياسعدية..صاحبتك دي مالا (متشحطة) كدا بالدهب الصيني دا.؟
*تقولي شنو عاد يااختي…قايلانا (طير ساكت)..ما بنفرز الصيني من الأصلي.
* سجم خشمي.!.. لكن عاد الليلة مابقت (مضحكة) وسط بيت البكاء.
* خليها..خليها..تستاهل اكتر من كدا.
*اسكتي..اسكتي..بت المرحوم جاية علينا.
ثانياً ونسة المواصلات
*عليك الله ناس (الحكومة) ديل عندهم موضوع..هسي في داعي يقفلوا الشارع دا.؟
* هوي يازول..كان بقت على الشارع هينة.
*والله على قولك..كان بقت على الشوارع دي مامشكلة..المشكلة في الأسعار الطارت السماء دي ياخي..بالله شفت كيلو اللحمة وصل كم.؟
* يازول..لحمة شنو..انت امشي الدكان قوليهو يديك فول بجنيه..علي الطلاق (ود ابرق) مايشبعوا..ياخي خلينا ياخ.!
ثالثاً ونسة البنات في الجامعة
*واو ياسوسو…ماشفتي الليلة تامر قال لي شنو.؟
*قال ليك شنو ياميمي.؟
*والله صارحني بي حبو وبي مشاعرو وقال لي حا أجيب بابي ومامي وحا أجيكم الخميس الجاي.
*بختك والله ياميمي..يعني خلاص حتتزوجي.
*اي والله..بس طبعاً اشترطت عليهو انو ماعايزين (بيبي) الا بعد (اليوبيل الفضي).!
رابعاً ونسة العطالة
*آخ…عليك الله شفت صاحبك ادريس (رطّب) كيف.
*المابخليهو يرطب شنو…زول شغال في الخليج بيصرف ليهو في الشهر خمسين مليون بالسوداني.!
*انت عارف يافردة..والله انا لو قالوا لي تعال اشتغل (خيال مآتة) هناك بمشي ماعندي أي مشكلة.
* ياراجل ماللدرجة دي..اي صاح نحنا عطالة ومحبطين لكن كمان مابتصل للحد دا.
*هوي يازول خلى النفخة الكذابة بتاعتك دي..والله انت لو قال ليك تعال اشتغل (دادة) مااظنك تقول لا.!
خامساً ونسة الرجال المتزوجين
*ياخ المرة دي كرهتني الحياة..كل يوم تفتش موبايلي وعاملة لي فيها (كونان).
*يااخوي انت مسكين ساكت…مرة شنو كمان البتفتش موبايلي..علي الطلاق انا مرة جات تفتش موبايلا اديتا ليك (كف) لحدي ماداخت..انت (عوير) ولاشنو.؟
*والله ياحسين نفسي اكون زيك كدا…راجل (ملوي هدومو).!
* بسيطة…اول حاجة هسي تعملا نزل هسي طوالي (الواتساب بلص).!
سادساً الونسة بعد هذا المقال
*ياخ الزول دا مابيعرف يكتب )بي تعريفة(.
*اي والله..انا ذاتي ماعارف ناس (السوداني) ديل مشغلنو معاهم لي شنو.؟
* تقول شنو بس..هسي تلاقيهو جاي بي (واسطة).!
* والله صحي…غايتو نحنا (الله لينا).!
[/JUSTIFY]
الشربكا يحلها – احمد دندش
صحيفة السوداني
أجمل ماعندك اعترافك بأنك مابتعرف تكتب،وماعندك موضوع أصلا .يدور موضوعك عن سطحيةوتفكير الناس واشارات لارتباطة بالفقر وهذه حقيقة ، لكنك لم توفق أبدا كصحفى لاختيار اسلوب راقى للكتابة الا طريقتك المعهودة (الشماراتية)، فلانة قالت لفلان وفلان قال لعلان.