كوش نيوز .. أخبار السودان بين يديك

يا الضايقين حلوها مرها ضوقوهو !!



شارك الموضوع :
[JUSTIFY]
يا الضايقين حلوها مرها ضوقوهو !!

علق أحد ظرفاء المدينة على تناقص اعداد الساعين لدخول قفص الزوجية، بأن الأمر وصل لدرجة أن من يتزوج في هذه الايام (قاعدين يجيبوهو في التلفزيون)، وذلك في اشارة لبرنامج قناة النيل الازرق الموقوف (افراح افراح)، ثم خلفه برنامج (قشة قشة) على قناة ام درمان الذي يوثق لبدايات الحياة الزوجية للعرسان حديثي الزواج ..
حسنا يا جماعة، بالرغم من تناقص اعداد المتأهلين الداخلين الى حظيرة الزواج، المشكلة (الأعوص) التي زادت الطين بله، تكمن في تزايد اعداد الذين يغادرون الحظيرة بـ (قد القفة )، فقد تواترت في الايام السابقة أخبار الطلاقات (الاكسبرس) التي صارت تتم قبل اكتمال الاحتفالات بالزواج، فقد تداولت الوسائط الاعلامية خبر حادثة غريبة وهي تحول حفل زواج بسبب نقص العشاء، إلى حلبة (مكافتة) بين والد العريس ووالدة العروس، تلاها رمي العريس يمين الطلاق على عروسه الـ (مش دريانه) ..
كل ذلك اللوم المركب حدث بسبب خلاف بسيط، كان يمكن تلافيه لو كان في الحفلة رجل رشيد .. دي زلعة شنو يا أخواتي ؟ في صحن العشاء اليابس ومخمر داقين المرا ومطلقين بتها ؟ أعوج والله !!
وعروسة أخرى تلقت أم دلدوم الطلاق ايضا بسبب رقصها مع أحد الشباب بصورة اثارت حفيظة العريس وغيرته !! يا بتي الرشاقة الطلّقت اشراقة دي كان في داعي ليها ؟ ما دام الله اداك طرف عريس اقبضي قبيضك واحمدي الله سيدك وابقي مارقة ..
بالجد .. تحول الأمر الى ظاهرة تستحق الدراسة ثم الجلوس في بطن الواطة لايجاد الحلول، فقد قرأت في الأخبارعن منتدى نظمته وحدة مكافحة العنف ضد المرأة والطفل، قدمت فيه مولانا (رباب أبو قصيصة) ورقة مهمة تحدثت فيها عن وجود ضرر يقع على المرأة من أوليائها، وقالت إن تدخل الأم في حياة ابنتها بغير قصد يدخلها في تجاذبات مع زوجها تكون نتيجته انفصالهما وتشرد الأبناء، بالاضافة لتطرقها لمسألة حساسة هي سوء استغلال الرجل لمسألة القوامة .. هوي دي ما أنا مولانا القالت كدي .. عاد الكلام دخل الحوش !!
غايتو حسب وجهة نظر شخصي الضعيف أن أهم ما ذكرته مولانا (رباب) هو الاحصائية الخطيرة عن اعداد المفكوكين والمفكوكات عكس الهواء، فقد ذكرت أن نسبة الطلاق المسجلة في عام 1992 بلغت اتنين في المية 2%، فيما وصلت نسبة الطلاق في العام 2012 إلى 20%. .. يعني خلال عشرين سنة زاد معدل حالات الطلاق تمنتاشر في المية 18% .. دي طبعا عدد الطلاقات الموثقة بالقسايم فكيف اذا اضفنا ليها اعداد الطلاقات الهبطرش التي لا تصل لجهات التوثيق ؟ دي الحكاية وسعت أوي .. كل واحدة تخلي بالا من حبالا يا نسوان!!
طيب يا جماعة .. بالجد نحنا محتاجين نشجع العمل على استراتيجة تعتمد على (توسيع المداخل وتضييق المخارج) .. يعني بالعربي الفصيح نعمل على تسهيل الزواج بصورة جادة وعملية، وفي نفس الوقت نسعى لترسيخ مفاهيم (يا الضايقين حلوها مرها ضوقو) وذلك بتعليم الداخلين والداخلات الى دنيا الزواج قيم الصبر على المكاره ولوك القرضة وبلع الريق فوق الريق لتسير مركب الزواج ويتجنب جنادل الطلاقات، فليس بالصفقة والرقيص والكلام اللذيذ والحب الشفيف يحيى العرسان ..
وحسنا أخيرة أقولها وأجري على الله .. تابعت أكثر من مرة وعبر عدة لقاءات تلفزيونية، مساعي بعض ناشطات حقوق المرأة بالضغط لتغيير صيغة عقد الزواج، وذلك بتضمين حقوق للزوجة مثل حقها في العمل وحقها في التصرف في مواردها المالية، واستلام مرتبها كاملا دون شبرته أو خنصرة من الزوج الا برضاها وكامل ارادتها، وغيرها من الحقوق التي يخاف ان يحيف الزوج على زوجته فيها ويغمطها حقها، كـ حقها في ان تشترط على زوجها عدم الزواج مرة أخرى .. باقي لي الأخيرة دي على طريقة ( الدايراهو سرورة .. خراب بيتا وميتة راجلا ) .. فلا ادي كيف يمكن للزوجة ان تمنع زوجها من الزواج مرة أخرى استنادا على شرط مكتوب في القسيمة، وكل ما يحتاجه اذا طلعت في راسو ونوى الزواج – ان يقول لها (لو ما عجبك الباب يفوت فيل ) ؟!!
يا أخواتي الأولى أن نبزل جهودنا في التوعية بضرورة التحري والدقة في الاختيار .. مافي ورقة بتمسك ليها راجل .. البت ادوها البخاف من الله أن احبها اكرمها وان ابغضها لم يظلمها .. دا كلام سيد الخلق ومافي أحسن منو !!
مخرج:
أنا غايتو مع التضيق على الساعين بالفرتقة والطلاق .. نطلع قوانيين مقيدة لحرية الطلاق .. مافي زول يرمي يمين الطلاق قبال يمشي للقاضي يعمل ليهم مجلس صلح فيهو حكم من اهلها وحكم من أهله .. ان استعصى الاصلاح يفرق بينهما والله الغني .. عشان تاني مافي زول يطلق في الفارغة والمقدودة .. ان المرا حرقت الحلة يقول ليها امشي بيت ابوك انتي طلقانة .. اي زول يعمل كدا تاني يدوهو مية جلدة وتلاتة شهور سجن قدر شهور عدة المسكينة الطلقوها لا ايدا لا كراعا !!
[/JUSTIFY]

منى سلمان
[email]munasalman2@yahoo.com[/email]

شارك الموضوع :

1 التعليقات

      1. 1

        اول حاجة اقترح دراسة تحارب البوبار والفشخره الفاضية ومامنها فايده وهو زاتو شرط تعمل حفله وعشاء وصالات وتجيب خلق الله يتفرجو فيك وفي عروسك لحدى ما يضربوها ليك عين ولاحسد من واحد نفسو خشت فيها ولا واحده بايره
        تاني حاجه قروش الحفله والصاله دي عليك الله ما احسن تلمها لي وقت حوجه ولو خلاس غنيان ياخي راعي شعور الماعندو حتي حق لقمه يسد بيها جوعو وشوفو كم واحد بنوم جعان اسال الله ان يستر بناتنا وابنائنا من البوبار والفشخره الفاضية ياخوانا نفسي اي عروس تتبوبر يجلدوها هي وامها علشان تبقي عظه
        ولا رايكم شنو؟

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *

    This site uses Akismet to reduce spam. Learn how your comment data is processed.

    سودافاكس