بابكر سلك
إذا الشعب يوماً..يبقى لازم
* كلمة تعبر عن حاضر.
* ولما تعبر عن تاريخ وعن مستقبل.
* تصبح أمه.
* يبقى العظمة فى الشعب الأمة.
* وتبقى الأمة فى عظمة شعب.
* ويبقى الشعب سنافس نفسو جيل ورا جيل.
* ومهما كان الجيل الأروع تبقى الأمة هى الكسبانة.
* الشعب الملهم هو شعب معلم.
* بيعرف ايه المطلوب ومتين وليه.
* وما يتردد لما يقدم.
* شعب معلم.
* أيها الناس.
* أى شعب رائع.
* وأى شعب بفخر بى روحو.
* وأى شعب بتوحد وما بتشعب من أجل وطن عاشت فيه الأمة.
* من أجل أمة عاشت فى وطن للشعب ضم.
* أيها الناس.
* أيها الشفوت.
* أيها العالم أشهد كما شهدت من قبل.
* أعظم شعب هو شعب المريخ.
* شعب يلتف حول الكيان ويرفض الكيمان فى وقت الشدة.
* شعب طبق على أرض الواقع مليون مقولة ومليون مبدأ.
* موش طبق مقولة لن ندعك تسير وحيداً وأقعاً كدارى لى شندى..؟؟
* شعب أنتصر للكيان آلاف المرات.
* يوم راجى وهنو.
* يوم يا نتشفتن يا نتبشتن.
* وإتشفتن.
* شعباً حاشاهو ما بيتبشتن.
* شعب المريخ فى أى نفرة بتلقاهو.
* فى اى دفرة تلقاهو.
* فى اى فترة تلقاهو.
* شعاب ثار وسار.
* سار فى أروع مشهد يوم مانديلا فى المطار.
* وهل شاهدتم شعباً يزحف بهذه الأعداد دون ان يحشده شخص ألا الأنتماء..؟؟
* شعب بارى الطيارة وهى طايرة.
* الطيارة فى السما تحمل مانديلا وجيل مانديلا.
* وشعب المريخ يتبعها بالأنظار والأجساد والأمنيات.
* شعب صمد.
* ومسيرة مانديلا كانت شعبية فى مقامها الأول قبل أن تكون مسيرة لاعبين.
* أحتشد الجمهور باكراً فى جميع المباريات.
* وغنى وشجع وهتف فإنتصر المريخ.
* من يوم البنزرتى التونسى والجماهير تشجع وتردد فى موسيقى قوات الشعب المسلحة.
* أنا ماشى نيالا أوووووو أنا ماشى نيالا.
* فكانت شعاراً شعبياً ورمزاً لأنتصار.
* شعب يضع بصمته فى مسيرة المريخ دوماً.
* لا بتلوم ولا بتردد ولا ببعد.
* ممكن يتألم ويتلوى رافعاً راية المريخ العظيم.
* شعب رائع ومقدام.
* أنه جمهور المريخ الوفى الشفت.
* أيها الناس.
* فكرة مليار الكرامة والشهامة لإعادة قيد سيدا فى يونيو قابلها حمهور المريخ بالفرح والمباركة.
* بل أتصل على الكثيرين يطالبون بأن أحدد لهم أين يسددون أسهمهم..؟؟
* بل أصر الأخ عبدالوكيل أن يكون أول مسدد فى المليار.
* بل وألتزم آخرون بسداد يفوق الخمسين إنابة عن أخوة لهم يريدون المشاركة والأيد قصيرة.
* فمنهم من ألتزم بالسداد لخمسة.
* ومنهم من ألتزم بالسداد لعشرة.
* ومنهم من ألتزم بالسداد المفتوح.
* وكان ما جيت من زى ديل وامأساتى..ووا حيرتى ووا اى شى يا إسماعيل حسن..
* فعلاً شعب شفت وشعب صفوة..
* الحمدلله الفكرة وجدت قبولاً كبيراً..
* ستفعل قريباً..
* وألتزم الأخ مرتضى بترى بالكثير.
* أعظم شعب أنت وأعظم جيل أنتم.
* مليار الكرامة والشهامة قريبة ده بتم..
* وتسير الجماهير الوفية فى مسيرة العزة الى مكاتب الأتحاد العام لتشهد إعادة القيد للبرنس..
* بأمر الجماهير وبأموال الجماهير ونزولاً على رغبة الجماهير.
* مسيرة يزينها تواجد أعضاء المجلس وهم يحملون شيك الشهامة إنابة عن الجماهير ليسلموه لسيد الكرامة هيثم مصطفى.
* مسيرة لا تنتظر من ينظر ثم يجلس على الرصيف.
* مسيرة لا تنتظر من يتردد ليفكر.
* مسيرة لديها هدف أن تنتصر او تنتصر.
* شكراً جماهير شعبنا الوفى وأنتم تبادلون سيدا وفاءاً بوفاء.
* شكراً جماهير شعبنا الأبى وأنتم تنشدون الكرامة والشهامة.
* وشكراً جماهير شعبنا اللماح وأنتم تدركون جيداً ابعاد هذه المسيرة.
* ومريخ يا.
* مريخ ي.
* مرييييييخ.
* يعيش يعيش يعيش.
* وتمضى المسيرة.
* شركة مصرية تقدم للمريخ تصاميم المركز التجارى والإستاد والنادى الأسرى.
* أنه المريخ فعلاً.
* أيها الناس.
* موقعة العاشر من أبريل لا زم نثبت أننا أروع شعب وأروع جيل.
* ثلاث نقاط تقع على كاهلنا.
* أذا زأرنا يجب ان ترتجف الغابة.
* وينسحب الحطابة.
* وتنكشف الكذابة.
* وتترنم الربابة.
* نجى كلنا.
* نقلع نقاطنا قلع.
* مافى وكت.
* دايرين نتفرغ لمليار الشهامة.
* نلقط النقاط عشان نلقط الأسهم ونكمل المليار.
* المهم.
* مشينا أنا وإسلام نضرب فول.
* مشينا محل فول متخصص.
* أدانا قائمة الوجبات.
* كلها فول.
* الفول أساسى.
* فول بالزيت.
* فول بالجبنة.
* فول بالشمار.
* فول بالزيت والجبنة.
* فول بالجبنة والزيت.
* فول بالبهار.
* فول بالطعمية بدون زيت.
* فول بالزيت بدون طعمية.
* فول بالجبنة والطعمية.
* فول ساااااادة.
* قرينا القائمة.
* إسلام ضحكت وقال لى.
* المطعم ده ذكرنى المريخ.
* قلت ليها العلاقة شنو يا بتى.
* قالت لى فى المريخ مش فى.
* أبراهومة وكروجر.
* أبراهومة وبرانكو.
* أبراهومة وريكاردو.
* أبراهومة وجبرة وريكاردو.
* أبراهومة وريكاردو بدون جبرة.
* أبراهومة والبدرى بدون جبرة.
* أبراهومة ومازدا.
* أبراهومة ورادان.
* أبراهومةو الكوكى.
* أبراهومة والكوكى وجبرة.
* أبراهومة والكوكى بدون جبرة.
* وأبراهومة والبرازيلى أب شنب داك المعاهو ولدو.
* قلت ليها يا بت أسكتى.
* مافضل ليك ألا تقولى لى أبراهومة ومنصور رمضان.
* غايتو الشفع ديل عليهم جنس ملاحظة..!!!!!!
* أيها الناس.
* نرجع لموضوع الشعب.
* شعب المريخ الذى سجل أسمه كأعلى دخل فى روليت المباريات.
* وبالفئات العادية.
* لا يهزمه مليار الكرامة والشهامة ونقاط مباراتنا الدورية القادمة.
* أيها الناس.
* أعلنها وبالفم المليان.
* أنا شعبى.
* فى المريخ ما تفهمونى غلط.
* فى المريخ شعبيييييييييييييييييييييى.
* وفى غير المريخ مع الشعب.
* ما بايعت بعد محمد رجلاً.
* أطلاقاً.
* خلونا فى المريخ.
* إن كنا قد فقدنا الروح أحياناً عند الجماهير.
* قناعتنا بالشفوت كبيرة.
* لا تحدها حدود.
* نجى كلنا.
* ونحقق أملنا ونؤتى أكلنا.
* أها.
* السرير التانى صدقونى بقى بااااااااااارد.
* ناقصو الزول بس.
* سيدو بجى بجى.
* أن طال الزمن بجى.
* مصيرو يطلع الحوش ويرقد فى سريرو.
* حد بهرب من مصيرو.
* المهم.
* إذا الشعب يوماً أراد حاجة يبقى بتبقى.
* وإذا الشعب يوماً أراد الحياة بيحيى.
* وإذا الشعب يوماً..يبقى لازم ولابد وبلزم.
* وطالما شعب المريخ أراد إعادة قيد سيد فى يونيو.
* وعلى ثقة الشعب.
* يبقى يونيو يشد حيلو.
* الموضوع بتم بتم.
* لامكان وسط الصفوف للخونة.
* لأنه من أساسه صفوف الشعب ما فيها خونة.
* والناس التجنس بيظهروا براحة.
* فمهما أخرجت أوراق من أوراق ثبوتية سودانية.
* وأنت بتقول أنك جعلتى من هساهيسا.
* تبقى ما مننا.
* مازولنا.
* بنقبلك بحق العشرة إذا قعدت بى أدبك.
* أها.
* نجى لى شمارات والى الخرتوم.
* أكان شفت يا والينا.
* أنبوبة الغاز بقت أسبوع ما بتكفينا.
* برغم أننا لى حاجات تانية لغينا.
* لافى شاى مغرب ولا لبن بتفور ولا حتى السخينة.
* عشان كده أستغربنا كيف الغاز بيقطع علينا.
* حبوبتى حلت اللغز يا والينا.
* قال يا البنظم باظ يا المنظم باظ علينا.
* قلنا ليها المنظم مظبوط وبحن علينا.
* قالت شوفوا البنظم فينا والبنظم لينا.
* يا أما السعر زيدوها لينا أو أملوها لينا.
* يا أقسموا الأنبوبة نصين وبالسعر الحالى بيعوها يا والينا.
* لكن ما تدقسونا وتشغلونا وتشغلوها لينا.
* ونتفاجأ لما الغاز بعد يومين وبدون ما نولع بكمل علينا.
سلك كهربا
* لن ننساك بس أنت تعال وبص أنبوبة الغاز بملوها نص.
والللللللللى لقاء
سللللللللللللللك
[/SIZE]
في السلك – بابكر سلك
