غاريث بيل (كتيبة) بتتكون من (1500) بلة جابر ما بتثبتو
< قلت ليكم قبل كدا.< او ما قلت ليكم.< على كيفي.< يمكن اكون بشرع ليكم ساكت.< ويمكن ما بشرع.< جايز.< اي حاجة جايزة.< في واحد كان قاعد يشرع للناس في الشارع ..قال ليهم (السمك) دا ما (سمك).< السمك كان قدامهم.< الكل شايفو (سمك).< الناس كلها وضعت يدها في رأسها!!.< قالوا ليه طيب شنو؟.< قال ليهم : (عدس).< يا زول انت تعال هنا (السمك) الشابكنا بيه الايامات دي شنو؟.< دا سمك (المجموعات).< الناس ما عرفوا يمشوا وين؟.< قالوا ليه كيف يعني السمك دا ما سمك؟.< زول (فيلسوف) قادر على اقناع الناس انو (السمك) دا ... ما سمك.< عندو قوة اقناع كبيرة.< يقنع ليك (السمك) ذاتو.< السمك دا (عدس).< السمك بقتنع بالحكاية دي.< في واحد مفتح من الجماعة ..قال ليه طيب لو السمك دا (عدس)..ريحة السمك دي طالعة من وين؟.< اكيد (العدس) ما فيه ريحة بالشكل دا.< دي ريحة سمك عديل كدا.< الزول الفيلسوف طبعا ما بتحير ..قال ليه : دي ما ريحة سمك يا مغفل ..دي ريحة (بن).< بن سبورت !!.< دا شغل (مجموعات) طبعا.< الزول دا ذاتو وقف مرة في النادي ..قال يشرع للناس القاعدة تحضر في المباراة.< تتخيلوا شرع ليهم في شنو؟.< شرع ليهم في (المجموعات).< قال ليهم الاتحاد الدولي لكورة القدم السنة دي عاوز يعمل (خلطة) في المجموعات.< يعني يجيب ليه اربعة فرق من مجموعات اوروبا تلعب في مجموعات افريقيا.< وفي نفس الوقت يشيل ليه اربعة من مجموعات افريقيا ..عشان يمشوا يلعبوا في مجموعات اوروبا.< طبعا الهلال وقع ضمن الاربعة البمشوا يلعبوا في مجموعات اوروبا.< واحد من الجماعة (الشتر) قام وقف على حيلو..وقال ليه طيب يا فيلسوف ...الناس البطلعوا من دور الـ (64) ديل ح يعملوا ليهم شنو؟.< الفيلسوف قال له الناس البطلعوا من دور الـ (64) ح يودوهم (الصومال).< الناس كلها وقفت ..وقالت وهي مستعجبة : الصومااااااال!!.< قال ليهم ايوا الصومال ..ايوا الاستغراب في شنو؟...ح يودوهم الصومال عشان يعلموا السكان هناك (الصبر).< وعشان !!.< وعشان شنو تاني؟.< وعشان يقنعوا ليك ناس الصومال ديل ...انهم ممكن ينتصروا على الفقر والجوع والمرض بتنظيم دورة لحوض النيل او سيكافا.< من اجل ان ينشغل (الشعب).< طبعا ناس المريخ اكتر ناس في العالم ممكن يطلعوا ليك من الموضوع ..ويشغلوا ليك الناس بي موضوع تاني.< لكن هسع دا ما موضوعنا.< كنت وعدتكم اكتب عن انتصار ريال مدريد على برشلونة في نهائي كاس اسبانيا.< انتوا فاكرني بنسى.< ح تمشوا مننا وين؟.< هسع انا بكتب في العمود دا برشلونة مغلوبة واحد.< برشلونة مغلوبة من أتلتيك بيلباو وهي بتلعب في ملعبها.< بتلعب في الكامب نو ومغلوبة.< نحن ساكت شايلنها على الهلال.< ناس برشلونة ديل لو لعبوا في استاد الخرطوم ..النجيلتو عاملة زي (البلاط) ح يعملوا شنو؟.< خلوه استاد الخرطوم.< والله برشلونة دي تلعب في (النقعة) تأخد عشرة.< برشلونة الان حتى الدقيقة (60) مغلوبة في الكامب نو صفر / 1.< شابكننا برشلونة ..برشلونة ..برشلونة ..لمن صدقنا.< الجماعة ديل طلعوا من كل البطولات.< لا دوري ولا مجموعات.< ما عندهم اي امل في اي منافسة هذا الموسم.< إلّا يتحرفنوا زي جماعتنا ديل ..وينظموا ليهم دورة لحوض النيل.< ناس برشلونة ديل.< برشلونة الشايفها دي ..ما عندها خيار غير دورة لحوض النيل.< يا كمان يشوفوا ليهم (سيكافا) اوروبية كدا يعملوها.< المنافسات الرسمية السنة دي ما عندهم فيها حاجة.< نرجع لمباراة الريال وبرشلونة في نهائي كأس الملك.< ونتحدث تحديدا عن هدف غاريث بيل الذي منح الريال اللقب.< اغرب ما في غاريث بيل هذا ...هو انه ولد بعد الانقاذ ..اي انه ولد في يوليو 1989م.< ولدوه تحديدا بعد الانقاذ بـ (16) يوم.< شوفوا الناس وصلوا وين ؟.< ونحن وصلنا وين؟.< غاريث بيل سجل ليه هدف زي هدف بكري المدينة المنقوض في الاهلي شندي.< انت كمان ما تبالغ.< بكري شنو؟.< يمين هدف غاريث بيل دا لو كان في المريخ كان الحكم قال ليك الكورة طلعت.< كانوا قالوا ليك الكورة اتجاوزت الخط.< وكان (سيحة) ظهر ليك في الجمعة التالية ..وقال لحظة مرور غاريث بيل ..كان في دفع من بيل لمدافع برشلونة.< سيحة دا اسألوني منو انا.< بس بعرف للحاجات دي.< الكلام دا بقولو.< طبعا غاريث بيل ...انطلق ليك بالكورة ..لمن انا افتكرت الزول دا ح يطلع من التلفزيون ..ويجينا في حتتنا.< تريت شوية كدا.< رفعت كبابي الشاي.< وابعدت الصينية ذاتها.< الزول دا ما شي وين؟.< تقول بكري المدينة.< يا زول بكري شنو؟.< عارفين غاريث بيل عمل شنو؟.< طلع ليك بالكورة عبر ليك من اي لاعب في برشلونة (سرعة) ساكت وجري.< فايت فيهم زي (العاصفة).< ويا ريت لو اكتفي بذلك.< غاريث بيل ..قالوا ليك مشي المدرجات (انتوا قايلين طلتعو من الخط دي ساكت).< غاريث بيل مشي المدرجات ..ما خلي ليه مشجع (برشلونابي) ما جبدو ليك.< جبد ليك جمهور برشلونة مشجع مشجع.< ويا ريت لو اكتفي بالمسطبة الجنوبية.< غاريث بيل قالوا ليك مشي كمان للمقصورة ...فلفل ليك اعيان اسبانيا ..اسباني اسباني ..كبارات البلد لم يسلموا منو.< بعد كدا ..نزل على غرفة الملابس ..لقى ليك ناس غرفة برشلونة قاعدين يشربوا في الشاي ..فات ليك فيهم واحد واحد.< ثم عرج بعد ذلك على الجهاز الفني لبرشلونة ..وتجاوزهم ليك واحد تلو الاخر.< الزول سريع.< الكلام دا كلو في (10) ثواني.< من ثم حارس برشلونة ابو شعرة دا طلع ليه ..وضع الكورة في القون ..وفات على كدا.< هدف زي طلب الكبدة ..ما بتفهم فيه اي حاجة.< اها يا جماعة لو حسبناها ليكم بالسوداني.< لو ضربناها ليكم.< ناكل اخوان ..ونتحاسب تجار.< غاريث بيل دا تفتكروا بي (جريه) دا ..محتاج لي كم (بلة جابر) عشان يثبتو.< قولوا لي انتوا محتاج كم (نسمة) من بلة جابر عشان يثبت ليك بيل دا.< بي امانة كدا.< ومن غير زعل.< كتيبة بتتكون من (1500) بلة جابر ما بتثبتو.< ديل لو رصفوا الطريق كلو من شارع الاربعين حقنا دا في الموردة الي شارع الاربعين الفوق في مدريد بي مجموعة من (البلات) ما بقدروا يثبتوا الزول دا.< تثبيت شنو؟.< لكن مدريد فيها شارع اربعين.< بكون ..شوارع الاربعين دي في اي حتة موجودة.< بيل دا بي جريه دا..في بيتو بكون عندو شارع (الاربعين).< دا زول محترف.< غاريث بيل دا ..لو لقى ليه (750) بلة جابر ممكن في المباراة الواحدة يجيب ليه (12) قون.< الزول دا بدون بلة جابر بعمل كدا ..لمن يلقى بلة جابر يعمل شنو؟.< وما بالك لو لقى (1500) بلة جابر.< غايتو نحن الضحك كان ح يشرطنا.< برشلونة اتعادلت...مع أتلتيك بيلباو.< الحمدلله ما رسلت العمود.< برشلونة دي لو كتبت عنها ..تنتظرها لمن المباراة تنتهي.< والله برشلونة دي اصلو ما مضمونة.< القون عندها ممكن يجي في اي لحظة.< يا زول انت عاوز تغير رأيك.< برضو يا جماعة ناس (ميسي) ديل ما ساهيلن.< مسي دا الكورة عندو زي (البسكويت).< ولا بتعب.< ولا بجري جري غاريث بيل دا.< القون عندو اسهل من (الفكرة).< اقول ليكم حاجة تانية.< برشلونة جابت التاني.< ميسي ذاتو البنتكلم عنو جاب القون التاني.< ميسي دا زي (بشه).< بشه دا ..لو جبتوا ليه (المريخ) دا في (قطر) بجيب ليك فيه قون.< كمان بشه بيلعب.< أتلتيك بيلباو شنو البقيف كمان قدام برشلونة في الكامب نو؟.< كفاية الاهلي شندي.< ملحوظة : والله نحن نلقى لينا ملاعب زي ملاعب برة دي ..لا بنسأل في غاريث بيل ..ولا بنسأل في ميسي....(بشتنا) دا ما ساهل.هوامش< برشلونة فازت على أتلتيك بيلباو.< والمباراة انتهت على كدا.< الكورة كورة الريال والبايرن.< دي الكورة.< الشيء الجميل ..الهلال ح يلعب مع الخرطوم الوطني ..والريال مع بايرن ميونخ.< في نفس اليوم.< شفتوا المصادفة دي غريبة كيف؟.< دي ما مصادفة.< ناس الهلال يكونوا قاصدنها.< التسجيلات يا ناس الهلال ..التسجيلات.< يجب ان يراجع الهلال فريقه جيدا قبل المجموعات.< الهلال يحتاج الي مراجعات ..واضافات.< اذا اراد الهلال ان يحقق البطولة الافريقية يجب ان يعمل اضافات في الفريق بما يؤهله على الفوز بالبطولة.< اذا اضاف الهلال 4 لاعبين فقط على مستوى عال في الستجيلات القادمة ..يمكن للهلال ان يفعل الكثير.< .....< عاجل : ما عاوزين نقول اي حاجة تاني...افهموها براكم.[/SIZE]وإن طال السفر - محمد عبد الماجد
صحيفة قوون
اكتبوا حاجة مفيدة يرحمكم الله