بابكر سلك
ما عارف ليه؟
* لكت فيها حبة إستحياء.
* كتب الرائع محمدعبدالماجد منتقداً سيحه.
* عشان سيحة قال قون محمدموسى التانى صحيح.
* وعشان سيحه قال فى ضربتين جزاء للخرطوم.
* وعشان الفضيحة التحكيمية كانت بجلاجل.
* أولاً يا محمدعبدالماجد نحن نأخذ على سيحه تمييعه للكلام.
* لأنو سيحه قال أنا ماعارف الحكام ما حسبوا الهدف ده ليه؟
* ما عارف ليه؟
* وكلام زى ده بيدى إحساس بأنو فى سبب لإلغاء الهدف ولكن المتكلم لا يعلم به.
* كان على سيحه أن يكون واضحاً.
* يقول قون محمدموسى النفض غبار السنين ده لا غبار عليه.
* وأن معتز كعادته أخطأ خطأ شنيعاً لصالح الهلال.
* نلوم شنو يا محمدعبدالماجد!!!
* وأنت تعلم أن رضا يختار من اللقطات ما يبعد الهلال عن الشبهات.
* لكن فى مباراة الخرطوم كان رضا مضطراً.
* يا يجيب اللقطات.
* يا يطير ويستقيل.
* لكن يا محمدعبدالماجد.
* ورينا الحكم الرفض المنصب الكبير أبوماهية دولارية من أجل البقاء فى كرسى القرار التحكيمى السودانى الطوعى؟؟؟؟
* رفض ليه؟؟؟
* وهل تدخل نادى بعينه فى إجبار الحكم على رفض المنصب؟؟؟
* وليييه؟؟؟
* أكررها.
* إذا كان التحكيم عادلاً ونزيهاً ولا يخطئ مثل الأخطاء التى عودنا عليها.
* صدقونى الهلال حايجى الأول فى الممتاز.
* بس الأول بالقلبة.
* أسى دى تلات تلات نقاط تستحقها الخرطوم مشت لمن لا يستحقها.
* محمد أخوى أخجلوا شوية.
* وسريركم فى الحوش برد شدييييييييييييد.
* المهم.
* مشروع إعادة قيد سيدا يجرى على قدم وساق.
* الرسائل بالكوم.
* أنشر ليكم منها.
* عمار عزالدين إبراهيم عشرة أسهم.
* مصدق على حاج أبشر سهم يومياً حتى إعادة قيد سيدا.
* أحمد المنتصر سهمان ويقول أن المشاركة فرض عين على كل مريخابى أصيل.
* معاوية محمد عثمان عبدالله ثمانية أسهم زى نمرتو.
* الهادى بله حسن عشرة أسهم.
* النور رسل رسالة قال فيها.
* ياااااه سيدا وسيد أبوها وأمها كمان,أدها سيدا أدها يا,والله أعشق المريخ حى الثمالة والله والله والله لا أملك قوت يومى وأسف لعدم المساهمة.
* صدقونى مساهمة النور المعنوية دى بألف.
* منى سهم بإسمك يا النور.
* لما أدفع حأقول نفرين.
* أنا والنور أخوى.
* مبارك يا بطل.
* ولأننا نفكر فى بوستر كبييييييييييييير.
* وجهه الأول صورة سيدا بالفنيلة الشديدة.
* ووجهه الآخر قائمة الشرف التى يرد بها كل من ساهم فى التحدى.
* أسمك مكتوب يا النور.
* ورسالة منإسلام وصاحباتها أربعة.
* متشاركات سهم.
* كثيرة منكن يا بناتى.
* وكبيرة منكن.
* ومقبولة.
* أيها الناس.
* هذا جانب من مشاركات وتجاوب الشفوت مع مليار الكرامة والوفاء.
* نذكركم.
* الداير يساهم يرسل رسالة فيها أسمو وعدد الأسهم التى يود المشاركة بها على الرقم 0913800449.
* أيها الناس.
* الأخوة الأهلة يحاولون عبثاً خلق فجوة بين سيدا والشفوت.
* من أجل محاولة إعادة سيدا.
* لكن صدقونى.
* سيدا بعد ما شاف السعادة الجديدة ما برجع تانى يقعد على الحديدة.
* المهم.
* الإعداد لمباراة عطبرة يجب ان يكون معنوياً برضو.
* حقوا اللاعبين يفهموا حاجة.
* المحرش ما بكاتل.
* ضربة قوية موجعة من بدايةالمباراة.
* والمحرش حايفقد تركيزو.
* ثم تتوالى الضربات.
* أية محاولة جماهيرية للإرهاب سيكون الخاسر هو صاحب الأرض.
* وعلى ناسنا التمسك بإنهاء المباراة فى حالة حدوث أى شغب جماهيرى أو إعتداء.
* القانون معانا.
* وما بنبقى زى ناس شندى.
* رجل الراية ينضرب بحجر طاحونة نلعب.
* أى سيك ميك بنتخارج ونجيب التلات نقاط.
* لعب نظيف بنتمها وبنغلب وبنجيب التلات نقاط.
* اللاعبون والإداريون المرافقون يجب أن يعلموا ذلك جيداً.
* نحنا بتاعين((فير بلى)).
* ما بتاعين حجر طاحونة بلى.
* أيها الناس.
* موضوع سيدا ما تنسوهوا.
* أيها الأوتوفيستر.
* موضوع الرديف ما تنساهو.
* أها.
* نجى لى شمارات والى الخرتوم.
* أكان شفت يا والينا.
* موضوع المخدرات فى عيش الريف إنتشر فينا.
* لكن دحين يا والينا.
* طالما فى عيش ريف.
* موش ممكن تكون الحبوب لتسمين الأبقار وما لى تسميم الأفكار وما للسطلة الفينا.
* وموش ممكن نكون إتسرعنا ونشرنا غسيلنا.
* لكن يا والينا.
* منو الجابها لو صح الحديث الأول لينا.
* سودانى ما بصدق يعمل كده.
* فكلنا أولاد بلد يا والينا.
* أولاد منو مننا البجيبوا حبوب قدر ده تطفش باقى العقل الفينا؟؟؟
* ده منو البيفسد فينا.
* منو الداير قبال يومنا يودينا!!!!
سلك كهربا
* ننساك كيف وممكن تبلع بندول تطلع مسطول.
والللللللللى لقاء
سللللللللللللللك
في السلك – بابكر سلك
