منى سلمان
عيد ميلاد جرحي أنا
يعني ناس الانقاذ ديل لسه ما عينوك وزيرة؟
ولا أدري ما يمكن أن يقوله لو التقينا بعد كل تلك السنوات ويعلم بأنهم لم يمنوا علي حتى ولو بـ(وزارة شئون الحبوبات) ..
تذكّرت ذلك اللقاء عندما هاتفني أحد الصحافيين الرياضيين ليجري معي حوار خفيف علي الماشي، فكان أن سألني عن ماذا يكتب في خانة العمر؟ استنكرت السؤال ورفضت الاجابة عليه ضاحكة فتكفل عني بالقول:
يعني نقول كم واربعين سنة معقولة ؟!!
ورغم مقاومتي العنيفة للشعور بالرغبة في القفز عبر السماعة على (زمارة رقبتو) وقطعها، إلا أنني توصلت إلى السبب الذي بنى عليه هذا التقدير (الجائر)،عندما سألني عن علاقتي بنادي المريخ بالاضافة لانتمائي وكل أسرتي لقبيلة المريخاب، فيبدو أن الصحفي (الخلبوص) قد قرأ مادة (نسوان كرونجيات) التي ذكرت فيها علاقة الخوة والزمالة التي جمعتني بـ (جمال الوالي) في الاسكندرية حيث سبقنا بالذهاب إليها بثلاث سنوات، وقد طالعت قبل فترة لقاء صحفي مع (الوالي) يتفشخر فيه بأنه في الثالثة والأربعين من عمره .. عاد ده كلام ؟!!
تذكرت هذا اللقاء وفكرت فيما سيقول هذا الصحفي عندما يعلم بأنني قد التقيت في الاسكندرية أيضا بـ (معاوية الوكيل)، والذي من المؤكد أنه الأن يخطو بخطوات حثيثة جدا نحو سن اليأس عديل ..
ففي السودان بالذات، عندما تقول بأنك (عاصرت) فلان، فهذا لا يعني بالضرورة إنك (نديده) .. فهناك من يدخل المدرسة بعد سن التسع سنوات (زي ناس الجزيرة) وهناك من يركلس في الجامعة لأكثر من عشر سنوات كـ (أخونا معاوية) الذي يبدو أن الحزب قد فرغه للعمل التنظيمي سنين عددا حتى اشتعل رأسه شيبا قبل أن يطلقوا سراحه ويسمحوا له بالتخرج، ولقد إلتقيناه ونحن برالمة في عام تخرجه ومخارجته من الاسكندرية ..
وفي سنة برلمتنا ايضا التقينا بـ (محمد جعفر) عجوز الشيوعية العنيد، حين كان يقف جنبا إلى جنب على نفس المنصة مع (أحمد هارون) نديد أوكامبو، عندما جمعت بين أقطابهم المتنافرة جاذبية مصلحة الطلاب، في الاعتصام الشهير أمام السفارة السودانية بالقاهرة الذي نظمه الاتحاد العام للطلاب السودانيين احتجاجا على قرار يلزم الطلاب السودانين وقتها بدفع رسوم الدراسة بالاسترليني أسوة بغيرهم من الطلاب الاجانب .. ذلك الاعتصام الذي سماه الكيزان بـ (ذات الأكياس)، فقد كانت الأمطار تهطل ليلتها بغزارة على جموع الطلاب المعتصمين مما حدا بمنظمي الاعتصام لتوزيع أكياس من النايلون عليهم ليضعوها على رؤوسهم فتقيهم شر البرد والبلل .. والطريف في الأمر أن الإثنين كانا يهتفان معا خلف المايكرفون حتى كادت حلاقيمهما أن تنقرش بـ :
العار .. العار .. يا مستشار !!
وبينما كان (هارون) يقصد مستشارنا الثقافي المشرف على شئون الطلاب، كان (جعفر) يهتف بغيظ يوحي بأنه إنما كان يقصد مستشار النميري .. ما غيرو !!
حاشية:
كتبت هذه المادة والاثنتين اللتان سبقتاها عن (التجوهل)، من وحي استشراف عيد ميلادي (…) الذي يوافق يوم الجمعة الرابع والعشرين من أبريل، فقد أنذرتني صديقتي العزيزة (إنتصار) من أنها صارت تتبرأ من مزاملتي لها في الاسكندرية، لأنني دائما ما أحاول أن أبدو أكبر بكثير من سني الحقيقي من خلال كتاباتي التضليلية عن الأعمار، مما يجعل طرف السوط يلحق بها ..
لها ولكل زميلات دراستي السبقوني والجوا بعدي – العتبى حتى يرضن عني ويدوني الفاتحة .. وزي ما قالوا ما ضروري الأعمار .. الكبر كبر العقل.
لطائف – صحيفة حكايات
munasalman2@yahoo.com
قبض متلبسا بالجريمة أحد الذين كانوا ينكرون هوية إنتماءاتهم الكوزية ، وتشير كل الدلائل من مكان عمل سيد الإسم السابق في برج البركة وشهود عيان الاستاذ معوية الوكيل والإعتراف الضمني للمتهم بأنه لم يعينوه وكيل حبوبات . لذا نسجري محاكمة المتهم ولكن بعد منحه الفرصة ليدافع عن نفسه ويرد التهم الموجهة له . والقاضي هو جمهور المواظبين على قراءة مقالات المتهم ، وفي حالة ثبوت التهمة ضده فسوف تقرر المحكمة إنزال أقسى العقوبات وهي كالآتي :-ـ
1- الإعتراف أمام القراء كتابيا بعمره الصحيح .
2- كتابة ثلاث مقالات متوالية وضروري تنال إعجاب القراء .
3- أن يكون هو وسيد الإسم ذوي أخلاق رياضية وتقبل الحكم .
صدر تحت توقيع محكمة المعجبين . ينفذ فورا ودون تآخير .
:lool:
الله عليك يا كبيرة وكبيرة دى ما ضرورى تكون عمر ممكن كبيرة عقل كبيرة فى عقولنا فى نفوسنا كبيرة فى مجالك المهنى وبمناسبة عيد ميلادك هبىبيرث دى يو حاجة منى المريخية وسنة حلوة يا كبير كل دة وان هلالابى على السكين بلغة بائعى البطيخ وبالله مقالة كدة عن بيع البطيخ بمناسبة السخانة الشديدة البنسمع بيها عندكم دى اظنها حا تكون ممتعة كمتعة اكل البطيخ الاحمر الحلو فى هذا النهار الغائظ اهنئك مرة اخرى بعيد ميلادك وانشاء الله ربنا يطول عمرك 😉 😎 😉
خليك حريصة!!!!!!! هسي السابق منو مكان العمل ولا سيد الاسم ذاتو، قالوا محمد جعفر دا ناس الأمن في مصر تعبوا منو تعب شديد ، لما اتخرج عملوا ليهو حفل تخرج (فرحة عشان اتفكوا منوا) لكن فاجأهم في كلمة المحتفى به (بأنه قدم لماجستير في نفس الجامعة ) .. !!!!!!!!!!!!!!!
الاستاذة منى تتحدث دائما عن الاعمار والتجوهل كما تقول وهى الاكثر هوسا بهذا الموضوع على ما اظن فهى دائمة التبريرات التى تحاول انا تقنع بها القارئ انها صغيرة العمر وانا اظن ان هذا هو صغر العقل بذاته
بعدين يعنى وحدة اولادها فوق العاشرة يعنى حايكون عمرك كم 19 سنه؟
الاستاذه مني لك مني التحايا والاحترام لكتاباتك المميزه وفي هذا الطرح كما يقول المثل وقعتي في (…….) اعمالك،،، طبعاً انا ماقاصد الكلمه بين القوسين لكن حان وقت الحقيقه بالنسبه للاعمار وتهرب الحريم ( لانك متزوجه استخدمت عبارة الحريم) من ذكر اعمارهم الحقيقيه حتي ولو واحد ذكي مثل الصحفي العمل معاك اللقاء وحاول يعرف عمرك بالتقريب تهربت من الاجابه بالدبلوماسيه الصحفيه واكيد سيد الاسم ما عارف عمرك الحقيقي لانو بظل سر وسر دفين في نفوس الحريم والبنات ربنا يعطيك الصحه والعافيه وتتحفينا بمقالاتك الرائعه
عقبال تطفئ الشمعة المية – يا روح سيدو 😉
انا اضم صوتي الي اعضاء المحكمة – وبعدين العمر احلي ما فيه بيكبر سيدو اجتماعيا هذا الزمن
يعني لو عرفو الحقيقة في ناس ال— بيقولوا دي بت متين لمن تكتب كده
انتي عارفه الناس – مبروك عليك الوزارة بعد عيد الميلاد وممكن يتنازل نديد اوكامبو ليك وهو يتفرق لاشياء اخري
مبروك عيد ميلادك – وما تنسي ناس الجزيرة بيدخلوا المدارس كبار وانتي من الجزيرة ولا بعد الكوزنة والمريخيه بتاعتك دي تكون من العربية او الشروق
لك التحية وعمر مديد
اختي المنينه ام الرير كل عام وانت بخير احتفلي انت وسيد الاسم براكم ودو الشفع لعماتم مش خالتهم . وزارة الحبوبات يعني الحكومة كلها وزرات كل وزارة فيها زوير مركزي مع 3 وزراء دولة من غير النواب والمستشارين وحكام الاقاليم والمحافظين يعني باختصار انتي دخلتي في الممنوع ودي دلاله علي الكبر . ويا حليل ايام مصر
طلبة بدرجة عالية من الوعي والادراك والمسؤلية فعلا رجال التحية لهم وتحياتي محمد جعفر (بتاع طب طنطا) . تعالي هنا ناس الجزيرة ديل ماهم كبار دائما . وبالمناسبة الذي ينور ويضي الهلال ام النجمة ونقل السودان هو الذي يضئ (الفريق القومي) تحياتي
متعك الله بالصحة والعمر المديد وتتحفينا دومآ بالجديد ،، وكقارى لمقالاتك يهمنا ماتتحفينا به من مواضيع اجتماعيه شيقه ، وبالله عليك الحتت البتجيب ليك الهوى دى اقفليها عشان مايصيبك لا قدر الله ( احباط ) من بعض التعليقات التى يخص امرها سيد الاسم ( القابل وراضى وحامد وشاكر ) ولا كيف ؟؟؟ وتحياتى ودمتى
الاستاذة/ مني
كل عام وانت بالف خير وعافية وانت تجملي كل يوم صباحاتنا في الرباط بالمملكة المغربية بعامودك الذي اصبح الواحد لوما اتكل عليهو كل صباح زي الرايحه ليهو حاجه .
ربنا احفظك يا استاذة منى / مستشارة وزارة الحبوبات وعيد ميلاد سعيد وكل سنة وانت طيبة يارب – قالوا عمر المرأة سر عظيم – سبحان الله – على فكرة انتي مريخابية حرام عليك ياخ 😡 😡 😡 ما كنت متخيل اكون في مريخاب راقين كدة
والله يااستاذه مني مع انك ماقاعده تردى علي تعليقات القراء بس انا كلامك قاعد يدفعني دفع للكتابة لانو يثير مواضيع حيه المهم بخصوص موضوع العمر دا طبعا الكلام كثير وذو شجون والليله مثلا وانا قادمة من امدرمان لفتت نظرى لافته مكتوب عليها ملتقي الشابات الاول لو ماخانتي الذاكره فتفتكرى من هي الفئه العمرية لمثل هؤلاء المشاركات؟ وبالمناسبة عايزه اقول ليك الايام دي في ظاهره في الاسواق حكاية ياخاله دى ايا كان عمرك ومهما كان عمر الراجل البكورك ليك عشان تشتري والا امكن عشان الزوله اللابسه ثوب دي دائما خاله والماشة موضه صغيرونه والله الموضوغ مثير للجدل وداير ونسة كثيييييييييييييره
أمنينة كل الحبوبات هلالابيات الخلاك تبقى مريخابية شنو ؟؟؟؟
سألت أم الوليدات كيف الجو فى الخرطوم اليومين دى ؟؟
قالت لى سخانة تلحم
قلت ليها أنت عارفة السخانة دى سببها مشجعين المريخ !!!!
قالت : كيف ؟؟؟؟
قلت : اليومين دى غلبوا كمبالا سيتى وشابكننا سودانا فوق سودانا فوق لمن تكلوكم مع الشمس…………..
Happy belated birthday..wishing you many happy returns of the day
thanks for all your interesting articles.
keep the good work up
كنت من الذين يقرؤون لك والمتابعين لك من خلال اعمده ومعجب جدا لكن الذى حصل فى ذهنى انك اليوم طلعتى مما كنت تكتبين فيه
فكيف تتجرئ وتقول (فهناك من يدخل المدرسة بعد سن التسع سنوات (زي ناس الجزيرة) فمن الذى قال لك ان اهل الجزيره يدخلون المدرسة فى عمر التاسعه استميحك عزرا الا تكتبى فى شئ لا تعلمين مرده فكيف تصفى اهل الجزيره بمثل هذا وانا من الجزيره هل تعرفى اى شئ عن الجزيره واهلها حتى تسئ لهم لقد قرأت هذا العمود (فى جريده حكايات عدد الجمعة 24/4/009)وكنت اريد ان ارسل لك بريد بخصوص هذا الموضوع لأنه زعلنى جدا فأنا الذى امامك دخلت المدرسة قبل السادسة وغير كثر لو تعرفينى احدا دخل المدرسة بعمر التاسعه فما فوق من الجزيرة فهذا يعتبر شواذ للقاعده العامة ولكل قاعدة شواذ
لكن ان تعتبرى اهل الجزيره يدخلون سن التعليم فى سن متاخرة هذا مخالف للواقع ومنافى له تماما فالتعليم فى اغلب مناطق السودان اصبح مربوطا بالروضة فيتخرج من الروضة بسن معينه
ويدخل المدرسة بعد اجتياز مرحلة الروضة بسن معينه
لك خالص شكرى مع عتابى الحار جدا
ودبادى
مني سلمان …….اول حاجة كل سنة وانت طيبة خصوصا انو عيد ميلادك بعد عيد ميلادي بي يوم وااااااااااااااااااااااحد بس
يعني انتي اصغر مني بي يوم 😮
كل احترامي لكتاباتك المميزة وتاني مرة اتصوغري شوية عشان ماتخلي ناس (انتصار) يتبروا من عرفتك :rolleyes:
الاستاذة الفاضلة منى
كل عام وانتى بالف خير عقبال الشمعة المية
وكل عام وانتى تعطرى لينا عمودك بالكلمات الهادفة
بس خلاص ماعندى ليك تانى هدية لانو ست الاسم ذاتة قاعدين ناكلة حنك كان كترنا بجيب طورتة………….. ههههههههههه
يا ودبادي كدي روق المنقة شوية و خلي الزعل- ايه الزعل بدي؟ الاستاذة مني لما قالت ناس الجزيرة لم تحدد جزيرة معينة- خلوني شوية امارس نوع من النفاق – فهناك جزائر كثيرة مثل جزيرة توتي – جزيرة مكين- جزيرة الفيل و الجزيرة ابا وجزيرة مقرات وهلم جزرا و ده علي المستوي المحلي اما علي المستوي الاقليمي و العالمي هناك جزيرة سومطرة وجزر الكناري و شبه الجزيرة العربية- يا الله يا ود بادي هل سمعت ليك و احد من الجزائر دي مد بوزو ولا زعل و اريد ان اؤكد لك باني من الجزيرة و لما دخلت المدرسة كان عمري تسع سنوات – فكر و قدر من اي جزيرة انا؟
برّد نفس يا ود بادي لأنو الكلام في اطار المزاح .. ثم تاني يا ود أمي أنا ذاتي من الجزيرة ساس وراس .. ما تتفشخر علي بعرفة ناسي وأهلي أنا قاصدة في مناطق بعيدة بيحصل فيها فاقد تربوي وما كانوا زمان بخشوا بدري للمدارس .. وده في حتات كتيرة ما بس عندنا في الجزيرة .. وقع ليك كلامي؟
تانيا كل سنة طيبين وشكرا على الاماني الطيبة .. أنا مريخابة غير متعصبة ولا أحب التعصب .. أما عن المحاكمة فنقول كنا ولم نعد وهسي كل انتمائي لبيتي واولادي وابوهم وقاعدة في بطن بيتي وفي حالي .. شفتوا كيف؟
الاخت مني لك كل التحية والتقدير وكل سنة وانتي بالف خير وعقبال الشمة المية لوكنا بالسودان كنا جبنا ليك هدية عيدالميلاد :lool:
لفت نظرى تعليق الاخت علويه التوم ابراهيم وهذا الاسم ليس غريب عنى ربما كنا زملاء فى قاعة واحده لمدة ثلاثه سنوات بمعهد الكليات التكنلوجيه سابقا مع ثله كريمه من الاخوه والاخوات ..
ارجو من الاخت علويه التأكيد أو النفى
ودالباشا
الاخ ود الباشا ربما كان هذا الاسم اسم شهره فقط لانني لم اتزكره( انا ياي ذاتي علويه التوم) ارجو توضيح اسمك ورقم تلفونك
استاذة مني استميحك عزرا لارد علي الاخ ود بادي بعد تهنئتك بعيد ميلادك ، اخ ود بادي والله والله والله الاستاذه في كلامه ماقالت الا الحقيقه وهي تتكلم عن ناس الجزيرة زمان وانا من ناس الجزيره يعني وشهد شاهد من اهلها بس امكن انت صغير شويه بس زمان كان بدخلوا كبار وانا مابقول الكلام ده عن فراق فحقيقة الناس الفي عمر كم واربعين خصوصا اكتر من 45 ديل كانوا بدخلوا المدرسه رجال عديييييييل ولك العتبي ياخي ود بادي