بابكر سلك
كتلوك ولا جوك جوك يا مجوك
& تلقاهو ماشى ويتلفت.
& كان كشكشت وراهو ورقة سااااااى.
& يتلفت لمن يقرب يكسر رقبتو.
& فى ناس عندهم فوبيا.
& الخوف يصل لدرجة الفوبيا.
& عشان كده البخاف من الحرامى لدرجة الفوبيا.
& لو سمعك قلت نشال بفك البيرق.
& وفى ناس عندهم فوبيا الكلاب.
& وهكذا.
& عمك أتير عندو فوبيا المريخ.
& شدة ما بخاف.
& مرت الكورة عالية ماشة عليهو.
& شاف خمسة فنايل حمر جاريين عليهو.
& أداها باص لى ساكواها.
& مرت السنوات وكبرت الفوبيا.
& أمس الفوبيا كبرت شديد.
& حذروهوا من تراورى.
& كبروا الخوف الجواهو.
& تراورى قال وه.
& عمك أتير ما عليهو إلا يطير ويدخلها.
& كتلوك ولا جوج جوك يا مجوك.
& زى ديل بلعبوا فى المجموعات.
& جنس حظوظ غايتو.
& المهم.
& المريخ كان كعب.
& لأنو لو ما كعب النصر على فريق مثل الهلال ماصعب.
& وحكاية الخروج بالتعادل امام الفرق الضعيفة دى دايرة مراجعة.
& ولكن الرأى عندى.
& أنو الهلال فى كورتنا بتمها موية.
& بلعب بإصرار لأنو أى تراخى ببقن يوخن اخن آخى.
& لذا بلعبوا بى إصرار.
& وبعض ناسنا إعتادو على التراخى والإنكسار.
& عليه التخلص منهم واجب كبير.
& لأن فريق حلمه العودة لمنصات التتويج الدولية.
& لابد ان يختار لاعبيه من ذوى الطموحات التى تشبه طموح الفريق.
& ومن ذوى الشفتنة التى تشبه شفتنة المدرجات.
& ومن ذوى الإصرار الذى كان خصلة تميز لاعب المريخ.
& أيها الناس.
& كورة أول أمس أثبتت ان المريخ يلعب بدون صانع ألعاب.
& وحرام ان يكون للمريخ لاعب بقامة سيدا.
& ويبحث عن صانع العاب.
& فمن يصنع الألعاب مثل سيدا.
& ومن خبر الممرات بين سيقان المدافعين مثل سيدا.
& ومن يرفع درجة الحماسة فى الأداء مثل سيدا.
& ومن لايقبل بسيدا لاعباً فى المريخ؟؟؟
& لو فى زول كده يقول أنا.
& يتشجع ويقول انا.
& لكن زول يقولها فى سرو.
& أكيد عارف شتارة قولو.
& وأكيد له مصلحة فى اى شئ إلا المريخ.
& أيها الناس.
& الجماهير قالت كلمتها.
& التجديد لسيدا لفترة جديدة.
& ومن حر مال الجماهير.
& قالتها الجماهير بالصوت العالى.
& وهل نسمع صوتاً أعلى من صوت الجماهير؟؟؟
& أيها الناس.
& لو سيدا كان لاعب أول أمس.
& كان دخل بى شارع مساوى الستين.
& ودخلها فى شارع أتير الأربعين.
& وفتح شارع جديد.
& جمب سيسيه.
& ونسميهو شارع عبيد ختم.
& فسيسيه الذى مرت الكرة من بين أقدامه.
& لا أعتقد أن أنصاره على حق لما يقولوا المريخ فلت.
& كيف يفلت المريخ وتراورى وأوليفيه يضيعان هدفين مضمونين فى الشوط الأول.
& البفلت من الهزيمة معروف.
& وياما نجوتم يا أهلة كثيراً من هزائم كانت ستكون تاريخية.
& ولكنكم نجوتم.
& نجوتم لما سميناكم ابوالنجا.
& ولكن يا ابوالنجا مازيمبى جا.
& ولا نعتقد ان الحظ الذى أنهكتموهوا سيواصل جهوده معكم.
& أبقوا معنا.
& السرير التانى برد شدييييييييد.
& ومازيمبى اول أمس كاتل ليهو خمسطاشر من ناس فيتا كلوب.
& مازيمبى2014 غير الشكل.
& نيو لوك.
& ما يغلب ساى.
& يغلب ويكتل.
& ويا حليل ناس كتااااااااااااار.
& برغم هلاليتهم بنحبهم وما داير يوم فراقهم يجى.
& لكن الأعمار بيد الله.
& ولكل شئ سبب.
& ومازيمبى ممكن يكون أقوى سبب.
& أيها الناس.
& الأهلة قالوا مريخ التمهيدى وهلال المجموعات.
& مفروض يكون الكلام مريخ لوح الشرف وهلال الصفر.
& ولأن الدخول الى المجموعات لا يسجل فى لوح الشرف.
& يا لوح.
& يا لوح الشرف الغالى.
& المهم.
& التكميلية جات.
& وعلى المجلس قبل ان يختار.
& عليه ان يبعد الذين إعتادوا ان يجلبوا لينا المهمشين.
& على المجلس ان يكون قوى فى قراراته وإختياراته.
& لاعب بالدولار يبقى يلعب قدر الدولار الشالو.
& لاعب بالمليار يبقى يدينا بالمليار.
& ونلتفت شوية للرديف.
& بيغنينا عن كثير من الصفقات الفاشلة.
& ما ممكن نجيب لاعب بالدولار.
& ويبيض الكورة زى سيسيه بتاع الجماعة.
& نعزل صاح.
& الدورة التانية دى هى الإعداد الحقيقى للتنافس الأفريقى 2015.
& المهم.
& سمعوا قصة القرد والأسد؟؟؟
& بتشبه لى قصة تراورى وأتير.
& القرد بخاف من الأسد شديد طبعاً.
& أعصابو كلها بتبوظ لو شاف الأسد.
& ولو الأسد عفص ضل الأسد فى الواطه.
& القرد من الخوف بقع من الشجرة.
& أسى تراورى ده فى داعى يعفص ضل أتير!!
& أها.
& نجى لى شمارات والى الخرطوم.
& أكان شفت يا والينا.
& زمان كان فى زمن يربونا فيهو أهالينا.
& كانوا بقولوا لينا.
& شبعوا حتى تطبعوا.
& وفى ناس قالوا لا..أبداً طبعوا حتى تشبعوا.
& لأنو لو كان مطبع بشبع بدرى يا والينا.
& عينو بتكون مليانة.
& قالوا لينا وقالوا لينا.
& لما تاكلوا شيلوا اللقمة بأصبعينكم ما تخموها خم.
& وما تتخاتفوا فى الأكل دليل على القناعة والكرم.
& وأمضغوا بشيشكم لقمة لقمة ما تركنوا فى خشومكم اللقم.
& ولما تمضغوا أقفلوا خشومكم صموها صم.
& لأنو البياكل أكبر من خشمو.
& وببلع ما يمضغ ويخمش مع الخمشو.
& وياكل بصوت عالى بجق بجق بجق.
& بكون أكلو شين يا والينا.
& وباقى الأكل حول قدومو يسئ لينا.
& وببقى أكلو مقرف وشكلوا مقرف يا والينا.
& وكل الناس بعرفوهوا أكل يا والينا.
& هكذا ربونا.
سلك كهرباء
& ننساك كيف والناس بتتخاتف الأكل وتأكل وخشومه فاتحة ومقرفة ما بتختشى.
والللللللى لقاء
سلللللللللللللك
في السلك – بابكر سلك
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة