محمد عبد الماجد
كل سنة وانتوا (طايرين)
“”””””””””””””””””””””””””
صلاح ادريس وقت مشاكلو كترت في الهلال عملنا ليه (اعارة) لاهلي شندي اقصد (رعاية) للاهلي
“”””””””””””””””””””
اسألوا نفسكم يا مريخاب لماذا يتألق الشغيل مع الهلال وسعيد السعودي مع الاهلي شندي وعبدالحميد السعودي مع الرابطة والعجب مع مريخ الفاشر …وهيثم مصطفى تلفون ما بردوا لمجلس المريخ
“””””””””””””””””””””””””
سجلوا لينا (هامان) وافتحوا لينا الصفحات يمين نرشوا ليكم رش رش ابوريش للدريش
“””””””””””””””””””””””
· دخل الاستاذ الى الفصل ..(واضح عليه من شكلو عاوز ليه سبب مع الطلاب).
· الاستاذ من تلقاه لابس ليه قميص اصفر (باهت) اعرف طوالي انو ناوي على الشر.
· ومن الاستاذ يكتب ليك (التاريخ) فوق – في اعلى السبورة اعرف انو ما ناوي على خير.
· نحن الحاجات دي حافظنها حفظ.
· يوم (الاستاذ) يكونو قافلنها معاه في (البيت) ..بيجي يقفلها معانا في (الفصل).
· يعمل لينا الحصة كلها (تسميع).
· الاستاذ اول طالب عاوز يقفلها معاه قوّمو ليك قال ليه : (اديني اسم طاير).
· الطالب قال ليه : (الفيل).
· الاستاذ غضب غضب شديد ..قال ليه : يا ولد الفيل بطير…تطير عيشتك انت عامل سنونك زي عمال (الدريسة).
· الطالب قال ليه : بطير يا استاذ لو كان بيلعب في المريخ.
· الفيل وإلّا المريخ يا استاذ.
· الاستاذ اتهضم ما قدر يقول حاجة غير انو يقول للطالب اقعد قعد فيك قطر.
· طلبة ما عندهم ادب ..وما بحترموا زول الفيل عندهم بيطير زي (الحدية).
· هو المريخ بيطير يا استاذ …الفيل ما يطير.
· يا ريت لو بقت على الفيل.
· الدولار (طار).
· اللحمة (طارت).
· الجاز (طار) السما.
· يعني حملة (استغرابكم) دا عاوزين تعملوه في (طيران) الفيل.
· ما اي حاجة طارت في البلد دي.
· حلايب (طارت).
· بتستغربوا مالكم.
· كيف الفيل ما يطير اذا كان ناس المريخ جايبين ليهم محترف اسمو (هامان) من زمن العصور الفرعونية.
· قالوا ليك (هامان) دا من (الكبر) بلة جابر في المعسكر بقول ليه يا خال.
· وقالوا ليك (ضفر) بغسل لي عمو (هامان).
· العمر برضو ليه احكام.
· هامان يا مفتريين كورة هي وإلّا حصة تاريخ.
· خلاص غلبتكم يا مريخاب بقيتوا تجيبوا لينا (هامان) شخصيا عشان يلعب كورة في البلد دي.
· هسع (هامان) دا لو اتألق انتوا في جرايدكم ح تكتبوا شنو يا مريخاب.
· ح تقولوا شنو؟.
· اتكلموا ما تسكتوا.
· ح تقولوا (هامان) يتألق.
· دي ما حلوة في حقنا ..كيف يعني (هامان) يتألق.
· هامان يفوز بجائزة سوداني.
· سوداني ممكن تمنح (هامان) جائزة (سوداني).
· والله دا الفضل.
· اوعكم تعملوا كدا.
· المشكلة جمال الوالي يقول عاوز يجنس (هامان).
· يقوم يحصل شنو؟.
· يقوم (هامان) دا يبقى (سوداني).
· والله العظيم دي الحاجة الخايف منها.
· خايف (هامان) يطلع (سوداني).
· اقول شنو لي (عبدالماجد) ..اقول ليه (هامان) سوداني.
· اودي وشي وين؟.
· اتخيلوا كدا المريخ يكون لاعب مباراة في شندي مع الاهلي شندي.
· يعني مع احفاد المك نمر.
· يقوم (هامان) يجيب ليه قون في احفاد المك نمر…تتخيلوا الموضوع دا ممكن يمر ساكت كدا في شندي.
· يمين ناس شندي ديل لا بعرفوا ليك (هامان)..لا بعرفوا ليك (فرعون).
· الكلام دا خلوه.
· قولوا كدا …(هامان) دا عمل ليه مخالفة عنيفة مع لاعب من لاعبين اندية الممتاز.
· قام الحكم طلع (الكرت الاحمر) لهامان.
· يعني الحكم قام طرد (هامان).
· الامم المتحدة ح يكون موقفها شنو؟.
· تطردوا (هامان).
· طردة (هامان) من مباراة بالكرت الاحمر زي طرد بعثة دولية من السودان.
· يمين العالم كلو يقوم عليكم.
· بعدين السودان ما ناقص.
· جايبين لينا (هامان) يا جمال الوالي …هو نحن ناس النفطي والحضري ورمزي صالح عرفنا ليهم شنو؟…عشان تجيبوا لينا (هامان).
· عليك الله (هامان) دا ارحمو شوية ..خليه (يتسجل) اول حاجة ..ثم اكتب عنو.
· هسع اعمل فيها رايح.
· خليهم يسجلوه ..ما تطفشوا لينا.
· يمين تسجلوا لينا (هامان) نخلي شغلنا كلو ..ونقبل ليكم على الزول دا..(لو دق ليه كورة تعالوا لوموني).
· اقول ليكم حاجة تانية..(في نفس الحتة).
· هامان خليه يتسجل اول ..(اعمل فيها ما عارف).
· اعمل فيها ما عندك رأي في الحتة دي.
· هسع لو سجلتوا (هامان)..ح تطلبوا (كرتو) من وين؟.
· من الاهرامات.
· كرت هامان إلّا يرسلوا ليكم (فرعون).
· كرت هامان عند (فرعون).
· الحكاية دي معروفة من زمان في التاريخ ..(يعني ما جبتها ليكم من رأسي).
· هامان خليه هسع …(اعمل رايح).
· انتظر يسجلوه وقبل عليه.
· وكيل لاعبين …قاعد يجيب لاعبين للمريخ.
· جاب ليهم (نجاد) قال ليهم نجاد دا لاعب خطير ..بعرف لغة (بوسنية).
· ناس المريخ (شرقتهم) ليك حكاية عرفتو للغة البوسنية …قالوا الزول دا بي لغتو البوسنية ممكن يجهجه لينا ناس الهلال.
· وكيل اللاعبين جاب ليهم (ابالو) قال ليهم ابالو دا لعب ضد تيري هنري في كأس العالم.
· وجاب ليهم على النونو.
· وجاب ليهم رمزي صالح وعبدالكريم النفطي وعلاء الزهرة وعصام الحضري.
· الوكيل جاب ليهم هيثم مصطفى ذاتو.
· وكيل اللاعبين امس قالوا ليك ضرب لي جمال الوالي قال ليه : (اسمع يا ريس انا اي لاعب ظهر في القارة جبتو ليك في المريخ وبرضو ما في فائدة).
· جمال الوالي قال ليه : والله ما قصرت.
· الوكيل قال لي جمال الوالي هسع عندي ليك (لوري طوب) عاوز اجيبوا ليك وانزلوا قدام الاستاد عشان تبدأوا في (الطابق الثالث) دي الحاجة الوحيدة النجحتوا فيها.
· الوكيل جاب لي جمال الوالي (لوري الطوب) …جمال الوالي اليوم التاني شرع ليك في (تجنيس) لوري الطوب.
· اصلو قالوا ليك جمال الوالي لو جبت ليه (كيلو موز) بشرع في تجنيسو.
· ما بتلفت.
· الحاجة البتحير ..سعيد السعودي دا وقت كان بيلعب في المريخ كان الكورة بتكون ماشى على القون (هدف للمريخ) سعيد السعودي كان بلحقها ويطلعها ليك من الشبكة.
· هسع زولكم مشى اهلي شندي بقي يجيب في الاقوان.
· يعني بالواضح كدا يا جماعة المشكلة ما في سعيد السعودي ..ولا في موسى الزومة ولا في اكرم الهادي سليم.
· المشكلة في جمال الوالي.
· كدا جربوا اشطبوا جمال الوالي.
· لا شطب جمال الوالي حار ما ممكن كدا.
· زول بدفع للمريخ (11) سنة وبطيروا من البطولات.
· خلاص وقت ما قادرين تشطبوه (اعيروه).
· شوفوا ليه (اعارة).
· هسع نحن في الهلال صلاح ادريس دا وقت كتر لينا الكلام وعملها لينا كلها (ديون) وتجميد نشاط موش عملنا ليه (اعارة) لي اهلي شندي.
· اقصد عملنا ليه (رعاية) لي اهلي شندي.
· انتوا يا ناس المريخ جمال الوالي دا هسع شوفوا ليه حل.
· شوفوا ليه (اعارة).
· اعيروه (فداسي).
· خلوه يجيكم من ورا.
· يمكن عندها مشاكلكم تتحل شوية.
· شطب موسى الزومة واعارة سعيد السعودي واكرم الهادي سليم ما بتحل ليكم قضية.
· ابقوا واضحين.
· ما تبقوا رقراق.
· ابقوا (الصمود) واعيروا جمال الوالي الي (فداسي).
· نحن عارفنها صعبة عليكم.
· وتقيلة شوية.
· اعملوها زي ما عملوها ناس الهلال.
· هسع الهلال ماشى زي الطلقة بعد (اعارة) صلاح ادريس الي الاهلي شندي.
· اقصد بعد (رعاية) صلاح ادريس لاهلي شندي.
· ناس الهلال كان ممكن يشطبوا مساوي.
· وكان ممكن يعيروا عمر بخيت ومدثر كاريكا.
· لكن لا ..ما عملوا كدا.
· ناس الهلال طعنوا في (الفيل) عديل كدا ..ما طعنوا في (الضل).
· قبيل قلت ليكم الفيل بيطير قعدتوا تغالطوا فينا.
· اها هسع شوفوا ليكم طريقة (طيران) للزول دا.
· ان شاءالله طيران لي لندن.
· اتصرفوا.
· ما تقعدوا تسترجلوا على موسى الزومة.
· موسى براهو ما بعمل حاجة.
· سعيد السعودي اثبت ان الخلال في المريخ وفي الادارة وفي الاجواء.
· زولكم هسع بيلعب كورة في الاهلي زي ما بقول الكاتب.
· السعودي نفسياتو في السماء.
· نقول ليكم حاجة يا مريخاب جيبوا الورقة والقلم ..وتعالوا شوفوا الحكاية دي.
· نصرالدين الشغيل مع الهلال بقدم في احلي كورة.
· سعيد السعودي في المباراة الثالثة له مع الاهلي شندي بقدم في كورة راقية.
· فيصل العجب ابدع في مريخ الفاشر.
· تفتكروا ليه؟.
· ديل خلوهم.
· عبدالحميد السعودي ذاتو قاعد يتألق مع الرابطة كوستي.
· هيثم مصطفى دا ليه الان ما قادر يلعب مع ناس المريخ؟.
· ليه نفسو مرقت من المريخ.
· هيثم مصطفى (تلفون) بقى ما بردوا لمجلس المريخ.
· ما عاوزكم …ما تقعدوا تتجرسوا لينا ساكت.
· يا جماعة الحكاية واضحة.
· ما عاوزة ليها درس عصر.
· ملحوظة : وإلّا نعمل ليكم حصة صباحية سريعة كدا.
هوامش
· يا مريخاب لموا (هامان) دا عليكم.
· الزول دا ما تفكوه لينا كدا في الصقيعة.
· الزول دا يا ابوشيبة بجيب ليكم الهوا.
· كلمناكم.
· ان شاءالله المريخ يكمل خطوات تعاقده مع هامان.
· وان شاءالله يا رب اوليفيه الكاميروني برضو يسجلوه.
· وتراوري.
· الناس البطيروا من سيكافا ديل ..اجدع ناس.
· اتتوا احسن ناس.
· سجلوهم لينا.
· وافتحوا لينا الصفحات.
· يمين نرشهم ليكم رش ..لمن يفهموا حاجة.
· كمان نحن بنلعب.
· ما تقولوا (الرش) الحكومي واقف.
· البلف قفل.
· بس ح نكون فالحين في ناس هامان ديل.
· ما ح نقدر نقول اي حاجة.
· الجاز يزيد.
· الرغيف يولع نار.
· اللحمة تصل السما.
· المواصلات مافي.
· الخريف على الابواب.
· ونحن ما ح نقدر نقول حاجة إلّا في هامان.
· هامان بس.
· كمان هامان دا عندكم عليه (تحفظات).
· هامان دا ح نرشوا ليكم رش ابوريش للدريش.
· الحاجات دي نحن فيها لا بنلعب ولا بنجامل.
· رأيكم شنو يا ناس المريخ بعد سيكافا حوض النيل ..تعملوا لينا سيكافا حوض البحر الاحمر.
· على ان يكون في سيكافا حوض البحر الاحمر اندية من اليمن واندية من ارتيريا واندية من الصومال.
· اعملوا ليكم (سيكافا) جديدة.
· شوفوا ليكم حل ما تقعدوا لينا كدا.
· قاعدين زي شنط المدرسة.
· اول شنط المدرسة بتقعد كدا.
· الهلال في تجربته الثانية تعادل مع طلائع الجيش.
· صلاح الجزولي كان في الموعد.
· بالمناسبة النابي في اتصال هاتفي مع حسن فاروق عبر برنامج (زمن اضافي) في هلا 96 قال ان صلاح الجزولي اخطر رأس حربة في السودان.
· الكلام دا قالوا النابي.
· ….
· عاجل : مجلس المريخ قالوا بفاوض في الاهلي شندي ما اجل استعادة سعيد السعودي. [/JUSTIFY]
وإن طال السفر – محمد عبد الماجد
صحيفة قوون
[SIZE=5][COLOR=undefined]ما مشكلة نحن طرنا وركينا ونسينا الموضوع خلاص .. عقبال انت لم تطير بي فضيحة زي خمسة من مازيمبي وتطلع طيش المجموعة ونشمت فيك (رجيت ربي عليك ).[/COLOR][/SIZE]
الدعابة لا تحتاج الى كل هذا التطويل