المنشفنا ما بنشفنا
* العمل الإدارى الرياضى فى هذا البلد الطيب أهله
* فى معظم الأحيان يكون عملاً إن لم نطلق عليه عشوائياً
* نسميه عملاً من دون تخطيط
* وبالتالى هو عمل من غير إستراتيجية
* سنوياً نعلم ان التنقلات تتم فى السنة بدل المرة مرتان
* ولا نفكر من بدرى
* بل لا نحدد إحتياجاتنا
* ولا نعرف نواقصنا
* فندخل التنقلات زينا وزى ربة المنزل لما يدخل عليها العيد
* دايرة تخيط وتركب الستائر يوم الوقفة
* ودايرة تمشى السوق يوم الوقفة
* ودايرة تخبز بعد يذيعوا العيد
* ودايرة تتحنن يوم الوقفة
* تقوم تعمل الحاجات دى كلها بدون إجادة
* يطلع الخبيز حرقان
* ترد السبب لبتاع الفرن
* الله يحرق قلبو حرق الخبيز
* تطلع الستارة مكرفسة
* حتة فوق وحتة تحت
* ترجع السبب للترزى
* تطلع جزمة البت الصغيرة ضيقة
* تديها ضربة فى راسه
* ما قلتى قدرك
* يلا عيدى حفيانه يا غبيانة
* أما الحنة فتطلع زى حنة الحبش
* محمرة شديد
* تقول المحلبية ما أصلية والبلد إتملت حرامية
* لا ترجع اى سبب لإهمالها وتركها للأمور حتى ساعة الصفر
* وهذا هو حال الإدارات الرياضية فى بلدنا دى
* أيها الناس
* أى زول داير يبنى فريق
* يعمل إستراتيجيته لسنوات
* يعتمد فيها اعلى المواهب من صغار السن
* ويربى لمن يصل لى مراودو
* عندنا لا
* أى زرع دايرنو يثمر هسى
* ولعل السبب فى ذلك يعود للأنا
* فالمجلس يمكنه بناء فريق بالتدريج يثمر بعد خمسة سنوات
* أعضاء المجلس يقولوا ليك بالله
* نزرع نحنا ويحصد غيرنا؟؟؟
* مجلسنا عمرو تلاتة سنوات
* نصرف قدر سنين مجلسنا وسنوات عطاءنا
* عشان كده
* وعشان الأنا دى
* حاجاتنا كلها عمرها قصير
* نغير عمر المجلس الى ستة سنوات مثلاً
* نخلى الناس تشتغل بى مهلة شوية
* وتطلع من زنقة ست البيت يوم العيد دى
* أيها الناس
* الهلال مثلاً جاب سيرجيو البرازيلى
* الزول ده دحين ماسيرجيو بتاع إتحاد جدة
* اللعب زمن الحسن اليامى وأحمد بهجة المغربى
* إن بقى ياهو تبقى مشكلة
* زول لعب فى إتحاد جده نهاية التسعينيات وبداية الألفينات
* زمن الملك فهد عليه رحمة الله ملك
* زمن السفارة السودانية كانت فى السعودية بالإيجار
* زمن راسى ده مليان صوفى لى الجبهة
* زمن البلوى كان فى أولتراس إتحاد جدة شايل الطار ولابس الشال
* إن بقى ياهو تبقى مشكلة
* ويبقى الهلال لسه بعيد عن منصات التتويج الأفريقية
* تعال شوفنا نحنا
* نبعد إبراهومة الرديف
* ونجيب الكاميرونى الشفناهو قبل كم يوم داك
* قالوا جانا من أمريكا
* يعنى لو قعد فى أمريكا عشان يعمل ورق
* داير ليهو سبعة سنين
* يعنى أعتزل أول حتين مشى أمريكا
* ويكون قعد فى بلدو سبعة سنين تانيات حتى سافر أمريكا
* يعنى ترك الكرة قبل أربعطاشر سنة
* أسى ده فرقوا من سيرجيوا البلوى شنو؟؟؟؟
* عمل عشوائى بدون إستراتيجيات وبدون تخطيط
* وبى كده حا نطول حتى نعود لمنصات التتويج الأفريقية كمريخ
* فالفرق بيننا والأهلة
* إننا عندنا تاريخ فيهو صعود لمنصات التتويج فى مانديلا
* عشان كده تلاحظوا لى قلت
* الهلال لسه بعيد عن منصات التتويج لأنو ما ضاقها
* أما نحنا
* فحنطول على العودة
* شوف العودة دى
* لأننا أساساً ضقناها
* أيها الناس
* الحكاية دايرة وقفه
* ولم أفهم أمس لماذا التجديد والإعارة لأكرم
* يا أبيض يا أسود
* التردد لزومو شنو
* وده دليل على أن العمل يسير بالترضيات ساااااى
* بدون تخطيط ولا إستراتيجية
* المهم
* إذا لم نعد للتخطيط السليم
* حانفضل كده
* نفور ونبرد
* ونفتح صفحة جديدة
* أيها الناس
* جماهير المريخ أثبتت أنها كبيرة فعلاً
* فبعد الأداء الجنائزى يوم فكتوريا
* عادت الى المدرجات يوم الملكية
* وبأعداد أكبر
* بالله ده جمهور تحبطوهوا سنين يا عالمين؟؟؟
* لكن صدقونى
* الجمهور هو شعب دولة المريخ
* والشعب مهما بصبر بجى يوم باللاعبين والإدارة بيكفر
* وكان كفر بيكم
* يبقى دين للشعب ودين للكافرين
* تانى ما بتلموا سوا
* حصلوا قبال الحاجات تتورم أكتر من كده
* ورمنا شدييييييييد
* لأنو حمانا الله
* ما اى ورم حميد
* فى أورام خبيثة يا مجلس إدارتنا
* وحماكم الله الأورام دى إذا خليتوها تستفحل بتكتل
* وبستحيل علاجها
* ووقتها ستكون الكلمة للأورام
* تنهش فى جسد أهمل حتى تمكنت منه
* كلمتكم
* أها
* نجى لى شمارات والى الخرتوم
* أكان شفت يا والينا
* أقل خبر بقى برجفنا
* الطماطم بقت تخوفنا
* الرسوم تنضفنا
* المدارس تكسفنا
والدموع تسيل فى خدودنا وما لاقيين البكفكفنا
في السلك – بابكر سلك
