بابكر سلك
كلام وراهو كلام
* ومدى دعمها اللامحدود لفريقى القمة
* ولكن عندما نشمشم إصرار الوالى على تسليم الأمر فى أغسطس
* وعندما نسمع تصريحات عطا المنان بعدم الترشح
* وبأن حق السفر للكنغو ما عندو
* يبقى الكلام وراهو كلام
* وتبقى الحكومة قنعت ظاهراً وباطناً من الأندية الكبيرة دى
* وقنعانها ده معناهو أكلوا ناركم
* دفعنا ليكم دم قلبنا وما إستفدنا
* يبقى ما شمشمناهو من الوالى وم وصلنا من عطا المنان
* بورى انو الحيكومة زايغة فوق راى
* وزوغانهم ده ما ساى
* المهم
* نجح مجلس المريخ نجاحاً يحسب له فى التسجيلات
* وفشلت معارضة المريخ فى تقديم العون والدعم للتسجيلات
* ولكنها نجحت فى التنظيرات
* ومعارضة الهلال فشلت فى دعم التسجيلات
* وفشلت كمان فى التنظيرات
* لأنها معارضة تعمل من سكات
* وعلى الأقل ما بتبخل على فكرتها بالضحاكات
* يبقى مجلس المريخ غلب مجلس الهلال فى التسجيلات
* ومعارضة المريخ غلبت معارضة الهلال فى التنظيرات
* ومعارضة الهلال غلبت معارضة المريخ فى الضحاكات
* ده كلو هين
* شهر تمنية هل ستحسن التنظيرات قيادة المريخ؟؟؟
* ونعود لعهد المحترفين من شاكلة أربعة بى الف؟؟؟
* أم تحسن الضحاكات قيادة الهلال؟؟؟
* ويعود المريخ لمنصات التتويج الإفريقية؟؟؟
* أيها الناس
* كلنا نحسن التنظير
* فى السياسة وفى الفهم وفى تنظيم الحلة وفى اى شئ
* حتى فى تشكيلة المدرب
* بل وفى طريقة شوت اللاعب للكورة
* تلقى واحد بنظر
* يقول ليك مفروض ينوم كده ويكفيها
* وهو بمثل فى الحركة البنظر فيها يقع فى اربعة جمبو فى المدرجات
* بأيدينهم
* خمسة دقائق ما قادرين يجدعوها جوة الميدان
* ويقول ليك يكفيها كده وينوم كده ويقرصها بى جمبة الرجل كده
* وتنظير
* تنظير تنظير تنظير
* وحكى عن ماضى أساساً ما موجود
* ولذا نقبع فى مكاننا نجلس القرفصاء لنحكى
* والناس فاتت
* وصلت كاس العالم
* ونحنا
* أسسنا الأتحاد الأفريقى
* والمحجوب فى الأمم المتحدة كلمهم ليك بالأنجليزى لمن حير الخواجات
* وأزهرى لما رفع العلم قال للخواجة بالإنجليزى كلام
* الخواجة لى الليلة ما قادر يفهموا
* والخليفة عبدالله رفض تزويج الأميرة البريطانية لأحد الأمراء حقارة منو بس
* وامريكا لما كانوا يقولوا السودان
* نص الكاوبويات بجروا على مناطق الهنود طالبين الحماية
* الهنود الحمر ديل أساساً ختمية
* لأنهم إتحاد ديمقراطى أصل
* أصل لأنهم أصليون من اهل المنطقة الأصليين
* كانوا لم يشوفوا سودانى بسكلوا
* وحصينهم المبرقعة دى
* أداها ليهم السلطان هدية فى طهور أولاد الهندى الكبير
* نحكى بس والناس وصلت كاس العالم
* كلو كاس عالم ونحن بنحكى
* كلو كاس عالم والعالم بخير
* نتفرج
* حتى أثناء الفرجة وبرضو نحكى وكاس
* أها
* نجى لى شمارات والى الخرتوم
* أكان شفت يا والينا
* كاس العالم لو عملوهوا عندينا
* مابنلعب فيهو يا والينا
* عشان بنكون بنحكى
* أحكى لينا يا والينا
* حجينا
* بس ما اتبجينا
* عشان مافضل شى فينا
سلك كهربا
* ننساك كيف وكترة حجانا مسخت غنانا والعالم كلو ماشى كاس العالم إلا نحنا والحلة الورانا
والللللللللللللى لقاء
سلللللللللللللللللللك
في السلك – بابكر سلك
