بابكر سلك

القاطرة تقدمت العربات أمس الأول


[CENTER][B][SIZE=5] القاطرة تقدمت العربات أمس الأول [/SIZE][/B][/CENTER] [SIZE=5] > جرتن جت عليهن
> في عربات في الكنغو
> برضو مجرورات معاهن
> جرتن من الكنغو للمرقنبو
> امامنا فقط الامل والطموح
> كده كورتنا اتأدبت
> لان ادب الكرة هو ان تطوع نفسها للزعيم
> ليجر التوابع خلفه
> والخوف من صعاليك المحطات
> يقوموا يغيروا الرصه
> يجيبوا العربية البعد القاطرة نمرة اربعة
> ويجيبوا نمرة اتنين خلف القاطرة لنمرة واحد ورا القاطرة
> والخوف يشيلوا عربية معينة يودوها بابنوسة
> آخر القطر
> محل المطر
> المطر الجد جد
> أيها الناس
> الشفوت عادوا للمدرجات بكثرة
> وده دليل على اقتناعهم بالفريق
> وبان الاعتماد على الصغار هو اعلان العودة لمنصات التتويج
> مانديلا اسم نعشقه
> ويكرهه غيرنا
> واخاف لو قلت لكم انه يوجد بشر يكره مانديلا اكتر من كرهه لما يحدث بغزة
> ولو جاتو ليلة القدر بقول ليها
> جنوب افريقيا الجابت مانديلا دي إن شاء الله تغرق
> زي ما جبنا مانديلا
> سنعيد سيرته بكأس اخرى
> طالما الشفوت في الموعد
> والاولاد ماشين صاح
> ابوبكر اليوغندي
> حارس صغير السن
> كبير الموهبة والخبرة
> مهما كانت الكرة خطيرة
> تجده في الموعد
> توقيته السليم يسهل مهمته
> ويجعلنا لا نفكر لخطورة الكرة التي استلمها بمنتهى الراحة
> ما شاء الله عليه
> وحفظه الله ورعاه
> ونصره واوصله لمنصات التتويج
> التتويج الدولية
> وباسكال وامير اثبتا ثباتاً ودولية وحرفية في الاداء
> والمصري فرعون النص اثبت وجوده
> ديل اربعة
> ولو وصل العدد نهاية الموسم لي سبعة
> عليهم اربعة محترفين على مستوى
> والمنصات طوالي
> نعيد سيرة مانديلا
> طبعاً مانديلا كلمة بتوجع الهلالاب شديد
> واحدين يقولوا ليك زي ده ما دايرنو
> وهم لعبوا في بطولة الكؤوس وخرجوا
> ولعبوا في كأس الاتحاد وطاروا
> وبرضو يشنفوا
> بذكروني البت البايرة
> كلما يعرسوا واحدة
> تملا وشها بودرة وتتشنط وتمشي الحفلة
> وتجي تقول نحنا لو بنعرس من طرف زي ده اولادنا كان دخلوا الجامعة
> واولاد الناس دخلوا الجامعة
> وهي قاعدة تشنف
> وتردم في حفر الزمن التي ارتسمت على وجهها بالبودرة
> ده حال الاهلة
> واحدين تانين بقولوا مانديلا ده جبتوهوا زمن التقريشة ممكنة
> وهم تقول ولدوهم في التمنينات
> زمن التقريشة ده برضو حضروهوا وما جابوا شي
> وواحدين بقولوا زي مانديلا ده ما البطولة المحببة لينا
> طيب وين حبكم ده ؟؟
> ومتين حبيبتكم تبادلكم الحب
> حب من طرف واحد
> بقوا زي عمك الزين
> عمك الزين قالوا كان بحب فاتن حمامة شديد
> ساكي السينمات
> اي فيلم فيهو فاتن حمامة بدخلوا
> بحبها
> ورفض يتزوج لانو بحب فاتن حمامة
> ولما فكر للموضوع
> لقى سنونو فضلن فيهن اربعة
> واضافرينو بي سكينة ما بتتقصه
> وادرك وهمة حبو لي فاتن حمامة بعد العمر ولى
> ده حال الاهلة
> المهم
> سعيدين بالنتيجة
> وسعيدين بالعيد
> وسعيدين بيوم الوقفة
> وسعيدين بعيد المسلمين في الكنغو
> ما شاء الله
> انتشر دين الله
> وقالوا في عيد يوم الاحد القادم
> ما عارفو عيد شنو
> ما متأكد
> أنا معيد معاهم
> اللهم كتر الأعياد يا الله
> أيها الناس
> العقوبة قبل كورة مازيمبي تعني انها خفيفة والايقافات كورة كورتين لتلاتة اربعة لاعبين
> لكن اذا تأخرت الى ما بعد كورة مازيمبي
> تبقى الحكاية اعدام عديل
> وبتطول النادي
> وسنتين تلاتة قعاد ساي
> بختك يا كردنة
> لا معسكر ولا صرف ولا سفر
> ولا وجع راس
> ونحنا مننا ايقاف عداد المحاولات
> نثبتوا في سبعة وتمنين
> بعد اكتمال العقوبة نفكوا
> سنين العقوبة ما بنحسبها ليكم
> عشان ما تخرخروا
> هو الحكم ذاتو ساكنوا ليه وكت ما قادرين تحصلوهوا ؟؟؟
> حكم ما قادرين تلحقوهوا
> تغلبوا كيف
> حكم ما قادرين تلحقوهوا
> تلحقوا منصات التتويج الدولية كيف
> سبعة وتمنين وبنقرط على كده
> نبدأ بعد العقوبة تنتهي
> عقوبة عفو في العيد يفك الناس ما فيها
> إلا تنتهي
> وسنة الكاف ما زي سنة السجن تسعة شهور
> سنة عديل كده يا عمك
> اطناشر شهر
> أها
> نجي لي شمارات والي الخرتوم
> الولاية مزحومة بي طينها
> وانتوا لسه قاعدين يا والينا ؟؟؟
> تتقدلوا خلف السارينا
> تتفرجوا في الحال الفينا
> امال بتستقيلوا متين قول لينا !!!
> لما السما تقع فينا
> ولا لما الارض تخسف بينا
سلك كهربا
ننساك كيف ولما شفنا المويه اتذكرنا سيدنا نوح والسفينة

والللللللللللللى لقاء
سلللللللللللللللللللك
[/SIZE]

في السلك – بابكر سلك



اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *